ہونہار پاکستانی طلباء کا انقرہ میں علمی و ثقافتی دن
وزیراعظم کے خصوصی اقدام کے تحت ترکیہ کا دورہ، تعلیم و ثقافت کے رشتوں میں نئی روح
وزیراعظم پاکستان کے خصوصی اقدام کے تحت ترکیہ کے دورے پر موجود اعلیٰ کارکردگی کے حامل پاکستانی طلباء کے نمائندہ وفد نے دارالحکومت انقرہ میں ایک نہایت بامقصد، معلوماتی اور یادگار دن گزارا۔
یہ وفد اُن طلباء پر مشتمل ہے جنہیں ان کی غیر معمولی تعلیمی کارکردگی، علمی لیاقت اور تحقیقی سرگرمیوں کے اعتراف کے طور پر منتخب کیا گیا ہے۔ پاکستانی ہونہار طلباء کے اس دورے کا مقصد پاکستان اور ترکیہ کے درمیان تعلیمی و ثقافتی تبادلے کو فروغ دینا اور نوجوان نسل کے درمیان باہمی تعاون کے نئے دروازے کھولنا ہے
وفد کی قیادت ترکیہ میں پاکستان کے سفیر ڈاکٹر یوسف جنید کر رہے تھے، جنہوں نے مختلف مواقع پر طلباء کو ترکیہ کی علمی، تاریخی اور ثقافتی جہتوں سے روشناس کرایا۔
مزارِ اتاترک پر حاضری، بانیِ جمہوریہ ترکیہ کو خراجِ عقیدت
دن کا آغاز جدید جمہوریہ ترکیہ کے بانی غازی مصطفی کمال اتاترک کے مزار (Anıtkabir) پر حاضری سے ہوا۔
وفد کے اراکین نے پھولوں کی چادر چڑھائی، فاتحہ خوانی کی اور جمہوریہ ترکیہ کے عظیم معمار کو گہرے احترام کے ساتھ خراجِ عقیدت پیش کیا۔
اس موقع پر طلباء کو ترکیہ کی آزادی کی تحریک، جدید ریاست کے قیام، اور اتاترک کی اصلاحی و انقلابی جدوجہد کے بارے میں تفصیلی آگاہی دی گئی۔
طلباء نے اعتراف کیا کہ ترکیہ کی موجودہ ترقی، جمہوری شعور اور قومی وحدت دراصل اتاترک کے اُس وژن کی مظہر ہے جس نے ترک قوم کو علم، نظم و ضبط اور خود اعتمادی کی راہ دکھائی۔
وائی ٹی بی (YTB) کا دورہ
بین الاقوامی تعلیم اور اسکالرشپس پر بریفنگ
بعد ازاں وفد نے ترک نژاد اور متعلقہ کمیونٹی کے ادارے( (YTB کا دورہ کیا، جو ترکیہ میں بین الاقوامی طلباء کے لیے تعلیمی مواقع فراہم کرنے والا ایک اہم ادارہ ہے۔
ادارے کے حکام نے پاکستانی وفد کو ترکیہ کے نظامِ اعلیٰ تعلیم، بین الاقوامی اسکالرشپس، اور غیر ملکی طلباء کے لیے سہولیات کے بارے میں جامع بریفنگ دی۔
اس موقع پر وفد نے اُن پاکستانی طلباء سے بھی ملاقات کی جو اس وقت ترکیہ کی مختلف یونیورسٹیوں میں زیرِ تعلیم ہیں۔
ان طلباء نے اپنے تعلیمی و تحقیقی تجربات، ترک معاشرے کے مثبت رویوں اور ترکیہ کے تعلیمی معیار پر مفصل گفتگو کی۔
وفد کے اراکین نے اس موقع کو نہایت متاثر کن قرار دیتے ہوئے کہا کہ وہ پاکستان واپس جا کر دیگر طلباء کو بھی ترکیہ میں اعلیٰ تعلیم حاصل کرنے کی ترغیب دیں گے۔
علم و تحقیق کی دنیا میں قدم
ترکیہ کے علمی و تحقیقی منظرنامے کا ایک روشن ستون مڈل ایسٹ ٹیکنیکل یونیورسٹی (Middle East Technical University – METU) ہے، جس کا دورہ پاکستانی طلباء کے لیے نہایت متاثر کن تجربہ ثابت ہوا۔
یونیورسٹی کے حکام نے وفد کو مختلف فیکلٹیز، تحقیقی مراکز، اور جدید تجربہ گاہوں کا دورہ کرایا۔ طلباء کو تعلیمی پروگرامز، بین الاقوامی تحقیقی منصوبوں اور جدید تدریسی طریقوں کے بارے میں بریفنگ دی گئی۔
وفد کے اراکین نے یونیورسٹی کے اساتذہ اور وہاں زیرِ تعلیم پاکستانی طلباء سے تفصیلی تبادلۂ خیال کیا۔
اس موقع پر دونوں ممالک کے طلباء نے مشترکہ تحقیقی منصوبوں، اکیڈمک تبادلے اور ٹیکنالوجیکل تعاون کے امکانات پر گفتگو کی۔ اس موقع پر پاکستانی سفیر ڈاکٹر یوسف جنید نے کہا کہ پاکستان اور ترکیہ کے تعلیمی اداروں کے درمیان تعلقات کا فروغ نہ صرف ہمارے دوطرفہ تعلقات کو مضبوط بنائے گا بلکہ دونوں قوموں کے روشن مستقبل کی ضمانت بھی بنے گا۔
صدارتی قومی کتب خانے کا دورہ
علمی و تحقیقاتی مرکز
دن کے اختتام پر وفد نے ترکیہ کے صدارتی قومی کتب خانے (Presidential National Library) کا دورہ کیا، جو ترکیہ میں علم و تحقیق کا سب سے بڑا مرکز اور فکری ورثے کا امین ہے۔
وفد کو کتب خانے کے وسیع ذخیرے، جدید سہولیات، ڈیجیٹل ریسرچ سسٹم اور خودکار مطالعہ جاتی نظام کے بارے میں تفصیلی معلومات فراہم کی گئیں۔
طلباء نے نادر مخطوطات، تاریخی دستاویزات اور ترکیہ کے مختلف ادوار سے متعلق علمی ذخائر کا مشاہدہ کیا۔
اس موقع پر طلباء نے کہا کہ یہ کتب خانہ ترکیہ کے علمی ذوق، تحقیق سے وابستگی اور فکری عظمت کی علامت ہے۔
پاکستانی طلباء کے تاثرات
ترکیہ سے علمی و ثقافتی رشتہ مزید مضبوط
وفد کے اراکین نے ترکیہ کے تعلیمی نظام، تحقیقی ماحول، اور ثقافتی ہم آہنگی کو سراہتے ہوئے کہا کہ یہ دورہ اُن کے لیے نہ صرف تعلیمی لحاظ سے اہم تجربہ تھا بلکہ روحانی و فکری طور پر بھی غیر معمولی اہمیت رکھتا ہے۔
انہوں نے اس عزم کا اظہار کیا کہ وہ پاکستان واپس جا کر ترکیہ کے اعلیٰ تعلیمی اداروں کے بارے میں آگاہی پھیلائیں گے اور دونوں ممالک کے درمیان تعلیمی، تحقیقی اور ثقافتی تعلقات کو مزید فروغ دیں گے۔
یہ دورہ پاکستانی طلباء کے لیے ایک تاریخی سنگِ میل کی حیثیت رکھتا ہے، جس نے اُنہیں ترکیہ کے علمی ورثے، ثقافتی عظمت، اور جمہوری جذبے سے گہرا تعلق جوڑنے کا موقع فراہم کیا۔
یہ سفر نہ صرف دو ممالک کے درمیان محبت، بھائی چارے اور اعتماد کی علامت ہے بلکہ مستقبل کے اُن تعلیمی پلوں کی بنیاد بھی ہے جو پاکستان اور ترکیہ کے تعلقات کو نئی بلندیوں تک لے جائیں گے۔