ترکیہ کی معیشت، سیاسی استحکام اور اعتماد کے ماحول کے سائے میں ایک مرتبہ پھر اہم سنگِ میل عبور کرنے کے قریب دکھائی دیتی ہے۔ ترک لیبر کنفیڈریشن HAK İŞ کی 50 ویں سالگرہ کی تقریب میں صدر رجب طیب ایردوان نے ملک کی گزشتہ 23 برسوں پر محیط اقتصادی پیش رفت کا جامع تقابلی جائزہ لینے کے ساتھ ساتھ مستقبل کے معاشی اہداف کے حوالے سے بھی واضح اور فیصلہ کن پیغام دیا ہے۔
مہنگائی پر قابو پانا اور اسے سینگل ڈیجٹ تک لے جانا حکومت کا اہم ہدف
انہوں نے اس موقع پر اپنے خطاب میں کہا ہے کہ ترکیہ زندگی کی بڑھتی ہوئی مہنگائی کے مسئلے کو جلد از جلد حل کرے گا اور افراطِ زر کی شرح کو سنگل ڈیجٹ تک لے جانے میں جلد ہی کامیاب ہو جائے گا۔ انہوں نے اس ضمن میں دو نکات پر زور دیتے ہوئے کہا کہ :
- افراطِ زر کی شرح کو سینگل ڈیجٹ تک لانے کے لیے ضروری اقدامات جاری رہیں گے۔
- حکومت اس مقصد کے لیے سیاسی عزم، انتظامی قوت اور معاشی حکمتِ عملی پر عمل درآمد کرتی رہے گی۔
صدر کا کہنا تھا کہ ہمیں معلوم ہے کہ افراطِ زر کی شرح کو سنگل ڈیجٹ تک نیچے لے جانا کوئی آسان کام نہیں ہے ۔ لیکن اللہ کے فضل سے ہم میں یہ راستہ چلنے کی طاقت بھی ہے اور ارادہ بھی۔ ہم اس ہدف کو مکمل کر کے رہیں گے۔
معاشی کارکردگی کا 23 سالہ جائزہ
تقریب سے خطاب کرتے ہوئے صدر ایردوان نے اس حقیقت پر زور دیا کہ ترکیہ کی معاشی کامیابیوں کے پیچھے بنیادی عنصر مسلسل سیاسی استحکام اور انتظامی تسلسل ہے۔
ان کے مطابق:
- 2002 میں 238 ارب ڈالر، مجموعی قومی آمدنی 2024 میں بڑھ کر ڈیڑھ کھرب ڈالر کی حد تک پہنچ گئی ہے۔
- فی کس آمدنی 3608 ڈالر سے بڑھ کر 2024 میں 14,751 ڈالر ہوگئی جبکہ 2025 کی دوسری سہ ماہی میں یہ شرح 17 ہزار ڈالر کے قریب رہے گی۔
-
صدر رجب طیب ایردوان - مرکزی بینک کے زرمبادلہ ذخائر 27 ارب ڈالر سے بڑھ کر 185 ارب ڈالر تک پہنچ چکے ہیں۔
- برآمدات، جو 2002 میں 36 ارب ڈالر تھیں، آج 270 ارب ڈالر سے تجاوز کر چکی ہیں۔
یہ اعداد و شمار ترکیہ کی اس اقتصادی حکمتِ عملی کا ثبوت ہیں جس میں پیداوار، روزگار اور برآمدات تینوں کو یکساں اہمیت دی گئی۔
روزگار اور لیبر مارکیٹ: مستقل بہتری
صدر ایردوان نے بتایا کہ گزشتہ 29 ماہ سے ملک میں بیروزگاری کی شرح سینگل ڈیجٹ پر برقرار ہے۔
ترکیہ کے محکمہ شماریات TÜİK کے تازہ اعداد و شمار کے مطابق:
- 2025 کی تیسری سہ ماہی میں موسمی اثرات سے پاک بیروزگاری کی شرح 8.5 فیصد رہی۔
- محنت کش آبادی 3 کروڑ 55 لاکھ 68 ہزار تک پہنچ چکی ہے۔
- جبکہ روزگار پانے والے افراد کی تعداد 3 کروڑ 25 لاکھ 58 ہزار ہے۔
یہ اعداد و شمار ترکیہ کی لیبر مارکیٹ میں مضبوط بحالی اور مستقل بہتری کی واضح عکاسی کرتے ہیں۔
زلزلہ متاثرہ علاقوں پر تاریخی سرمایہ کاری
صدر ایردوان نے اس حقیقت کی جانب بھی اشارہ کیا کہ معیشت میں ترقی کے ساتھ ساتھ حکومت نے جنوبی ترکیہ کے زلزلہ متاثرہ علاقوں پر تقریباً 90 ارب ڈالر خرچ کیے ہیں۔
گزشتہ ہفتے ادیامان میں 3 لاکھ 50 ہزار متاثرہ خاندانوں کے گھروں کے قرعہ اندازی مکمل ہونا اس بڑے منصوبے کی تازہ ترین مثال ہے۔
آئندہ تین سال کے لیے نئی حکمتِ عملی
انہوں نے بتایا کہ گزشتہ ماہ نافذ ہونے والا درمیانی مدت کا پروگرام (OVP) ترکیہ کی معیشت کا اگلے تین برسوں کے لیے بنیادی روڈ میپ ثابت ہوگا۔
اس پروگرام کے تحت:
- مالیاتی نظم و ضبط
- سرمایہ کاری میں اضافہ
- پیداوار اور برآمدات کی وسعت
- لیبر مارکیٹ کی مضبوطی
- اور مہنگائی میں کمی
مزدور تنظیموں کے لیے پیغام
تقریب کے اختتام پر انہوں نے HAK-İŞ کنفیڈریشن کی 50ویں سالگرہ پر مبارک باد دی اور مزدوروں، محنت کشوں اور تمام ملازمین کے لیے نیک خواہشات کا اظہار کرتے ہوئَ کہا کہ ہم اپنے محنت کش بھائیوں کے ساتھ مل کر ترکیہ کی تعمیر جاری رکھیں گے۔ اللہ ہمارے راستے کو آسان کرے اور ہمارے قدم مضبوط رکھے۔