صدرِ جمہوریہ ترکیہ رجب طیب ایردوان نے کہا ہے کہ 2028 کے لیے ہمارا ہدف یہ ہے کہ دفاعی اور ہوابازی کی برآمدات میں 11 ارب ڈالر تک پہنچ کر دنیا کے اولین دس ممالک میں شامل ہوں۔ آج دنیا میں صرف دس ممالک ایسے ہیں جو اپنے جنگی بحری جہاز خود تیار کر کے سمندر میں اتارنے کی صلاحیت رکھتے ہیں، اور فخر کے ساتھ کہتا ہوں کہ ترکیہ اُن میں شامل ہے۔
پاکستان ہمارا سچا اور کھرا اتحادی ملک ہے
اپنی تقریر کے آغاز میں صدر ایردوان نے پاکستان سے تشریف لانے والے اعلیٰ سطحی وفد اور دفاعی صنعت سے وابستہ نمائندوں کو خوش آمدید کہا۔ انہوں نے کہا کہ آج استنبول کے لیے دفاعی صنعت کے حوالے سے ایک نہایت اہم اور تاریخی دن ہے۔
صدرِ ترکیہ نے کہا:”آج ہم اپنے بحری پلیٹ فارمز کی خدمت میں شمولیت، پرچم کشائی اور نئے جہازوں کی ابتدائی تیاری (ساک کَسِمی) کی تقریبات کے موقع پر یہاں جمع ہیں۔ پاکستان سے تشریف لانے والے معزز مہمانوں کو، جن کے لیے ترکیہ ان کا دوسرا گھر ہے، دل کی گہرائیوں سے خوش آمدید کہتا ہوں۔”
انہوں نے ترک شپ بلڈنگ انڈسٹری کی ترقی پر فخر کا اظہار کرتے ہوئے استنبول شپ یارڈ کمانڈ کے کارکنان کو مبارکباد دی اور کہا کہ آج ایک بار پھر ثابت ہو گیا ہے کہ ترک قوم نے اپنی شپ یارڈز پر جو اعتماد کیا، وہ بالکل درست تھا۔
ترکیہ-پاکستان دوستی قیامت تک پھیلتی پھولتی رہے گی
صدر ایردوان نے پاکستان کے ساتھ 2018 میں طے پانے والے چار مِلگیم (MİLGEM) جنگی جہازوں کے معاہدے پر پیش رفت سے آگاہ کرتے ہوئے کہا کہ ستمبر 2018 میں ہم نے پاکستان بحریہ کی ضروریات کو پورا کرنے کے لیے چار مِلگیم جہازوں کی تعمیر کا معاہدہ کیا تھا۔ پہلا جہاز PNS بابر 24 مئی 2024 کو پاکستان کے حوالے کیا گیا۔ آج ہم مکمل کامیاب آزمائشوں کے بعد PNS خیبر کی حوالگی بھی کر رہے ہیں۔
انہوں نے مزید بتایا کہ منصوبے کے تیسرے اور چوتھے جہاز کراچی شپ یارڈ میں تیار کیے جا رہے ہیں۔
تیسرا جہاز PNS بدر جون 2026 کے اختتام تک جبکہ چوتھا جہاز PNS طارق 2027 کی پہلی سہ ماہی میں پاکستان بحریہ کے حوالے کیا جائے گا۔
صدر ایردوان نے کہا کہ جدید ترین ٹیکنالوجی سے لیس یہ جہاز برادر پاکستان کی بحریہ کے لیے باعثِ تقویت ہوں گے۔ ترکیہ اور پاکستان کی دوستی، جس کی جڑیں مشترکہ تاریخ میں پیوست ہیں، اللہ کے حکم سے قیامت تک قائم رہے گی، ترقی کرے گی اور مزید مضبوط ہوگی۔
صدرِ ترکیہ نے کہا کہ آج جن بحری پلیٹ فارمز کو سمندر کے حوالے کیا جا رہا ہے، وہ محنت، علم، ہمت اور قومی وابستگی کا مظہر ہیں۔
دفاعی برآمدات 8.6 ارب ڈالر سے تجاوز کر چکی ہیں
صدر ایردوان نے کہا کہ ترکیہ اس وقت دفاعی برآمدات میں دنیا کا گیارھواں بڑا ملک ہے۔
گزشتہ 11 ماہ میں دفاعی و ہوابازی برآمدات میں 30 فیصد اضافہ ہوا ہے اور یہ حجم 8.6 ارب ڈالر سے تجاوز کر چکا ہے۔
انہوں نے واضح کیا کہ 2028 تک 11 ارب ڈالر کی برآمدات کے ساتھ دنیا کے اولین دس ممالک میں شامل ہونا ہمارا واضح ہدف ہے۔
اسٹیل ڈوم اور قزل ایلما ہماری قوت کی علامت ہیں
صدرِ ترکیہ نے بتایا کہ حال ہی میں اسٹیل ڈوم فضائی دفاعی نظام کو فوجی بیڑے میں شامل کیا گیا ہے جبکہ بغیر پائلٹ جنگی طیارہ قزل ایلما عالمی فضائی تاریخ میں ایک سنگِ میل ثابت ہوا ہے۔
انہوں نے کہا کہ تمام تر منفی پروپیگنڈے کے باوجود ترکیہ نے اپنے دفاعی سفر کو نہ صرف جاری رکھا بلکہ نمایاں کامیابیاں حاصل کیں۔
ہماری کسی کی سرزمین پر کوئی نگاہ نہیں ہے
اپنی تقریر کے اختتام پر صدر ایردوان نے دو ٹوک الفاظ میں کہاکہ ترکیہ کی کسی کے علاقے یا خودمختاری پر نظر نہیں ہے۔ ہم امن، استحکام اور انصاف کے خواہاں ہیں۔ تاہم اپنے حق اور خودمختاری کے تحفظ سے کبھی پیچھے نہیں ہٹیں گے۔
انہوں نے تمام نئے بحری جہازوں اور پلیٹ فارمز کے ترک بحریہ اور پاکستان بحریہ کے لیے نیک تمناؤں کا اظہار کرتے ہوئے کہاکہ اللہ کرے ہمارے جہازوں کے سمندر پُرسکون ہوں اور ان کی سمت ہمیشہ درست رہے۔
تقریب کے اختتام پر پاکستان اور ترکیہ کے اعلیٰ عسکری حکام نے بھی خطاب کیا، یادگاری تصاویر بنوائی گئیں اور جہازوں کے کمانڈرز کو پرچم و علامتی نشانات حوالے کیے گئے۔