ڈی ایٹ کے سیکرٹری جنرل(D8)سہیل محمود کی استنبول میں بحیرۂ اسود اقتصادی تعاون تنظیم (بی ایس ای سی) کے سیکرٹری جنرل اور رومانیہ کے سابق وزیرِ خارجہ، جنابِ عالی سفیر لازر کومانسکو سے ملاقات۔
دونوں سیکرٹری جنرلز کے درمیان ہونے والی ملاقات میں عالمی منظرنامے میں رونما ہونے والی تیز رفتار تبدیلیوں کے تناظر میں درپیش چیلنجز اور دستیاب مواقع پر تفصیلی بات چیت ہوئی ۔
دونوں سفارتکاروں نے امر پر زور دیا کہ موجودہ عالمی حالات میں کثیرالجہتی تعاون (ملٹی لیٹرل ازم) کی اہمیت پہلے سے کہیں زیادہ بڑھ چکی ہے، جبکہ عالمی مسائل سے نمٹنے کے لیے بین الاقوامی تعاون اور یکجہتی ناگزیر ہو چکی ہے۔
گفتگو میں ڈی-ایٹ (D8) اور بی ایس ای سی (BSEC) کے اقتصادی تعاون کے ایجنڈوں کے درمیان موجود ہم آہنگی اور باہمی تکمیل کے پہلوؤں کا بھی جامع جائزہ لیا گیا۔ اس موقع پر دونوں تنظیموں کے مابین ادارہ جاتی شراکت داری کو مزید مضبوط اور گہرا کرنے پر اتفاق کیا گیا، تاکہ مشترکہ اہداف کے حصول کے لیے عملی پیش رفت ممکن بنائی جا سکے۔
مزید برآں، باہمی دلچسپی کے کلیدی شعبوں میں ڈی-ایٹ اور بی ایس ای سی کے درمیان تعاون کو فروغ دینے کے لیے مخصوص اور قابلِ عمل طریقۂ کار کی نشاندہی بھی کی گئی، تاکہ اقتصادی ترقی، علاقائی استحکام اور مشترکہ خوشحالی کے اہداف کو مؤثر انداز میں آگے بڑھایا جا سکے۔
یہ ملاقات دونوں تنظیموں کے درمیان مستقبل میں قریبی تعاون اور مضبوط شراکت داری کی ایک اہم بنیاد قرار دی جا رہی ہے، جو بدلتے ہوئے عالمی حالات میں مشترکہ چیلنجز سے نمٹنے اور نئے مواقع سے فائدہ اٹھانے میں معاون ثابت ہو سکتی ہے۔