صدر رجب طیب ایردوان نے کہا ہے کہ اسرائیل کی جارحانہ پالیسیوں نے پورے خطے کو ایک سنگین بحران کی طرف دھکیل دیا ہے۔ ان کا کہنا تھا کہ امریکہ اور اسرائیل کی جانب سے ایران پر کیے جانے والے حملے خطے میں تباہی اور عدم استحکام کو مزید گہرا کر رہے ہیں۔
ان خیالات کا اظہار انہوں نےجسٹس اینڈ ڈولپمینٹ پارٹی (آق پارٹی ) کے صوبائی صدور کے اجلاس سے خطاب کرتے ہوئے کیا۔
صدر ایردوان نے کہا کہ 28 فروری کو اسرائیل کی اشتعال انگیزی کے نتیجے میں ایران کے خلاف شروع ہونے والی جنگ نے پورے خطے کو خون اور بارود کی لپیٹ میں لے لیا ہے۔
انہوں نے نہایت دکھ کے ساتھ کہا کہ معصوم بچے، جن کا کسی تنازع سے کوئی تعلق نہیں، اسکولوں میں تعلیم حاصل کرتے ہوئے بمباری کا نشانہ بن رہے ہیں۔ ان کے مطابق خطہ گزشتہ صدی کے مشکل ترین اور تکلیف دہ دور سے گزر رہا ہے، جہاں نفرت اور تعصب میں ڈوبی ایک “قتل و غارت کی مشینری” مذہبی جواز کا سہارا لے کر تباہی پھیلا رہی ہے۔
صدر ایردوان نے زور دے کر کہا کہ جہاں کہیں بھی بے گناہ لوگ قتل کیے جا رہے ہیں، وہ سب ہمارے اپنے ہیں۔ اسکولوں میں جان دینے والے بچے ہمارے بچے ہیں اور اپنے لختِ جگر کھونے والی مائیں کربلا کے دکھ کی تصویر بن چکی ہیں۔ بمباری سے تباہ ہونے والے شہر درحقیقت ہمارے ہی شہر ہیں۔
انہوں نے سوال اٹھایا کہ اس سفاکیت کے سامنے کسی کا نام علی ہو یا عمر، عائشہ ہو یا زینب، حسن ہو یا حسین، آخر کیا فرق رہ جاتا ہے؟ ان کے بقول ایران ہو یا خلیجی ممالک، ہر داغا جانے والا میزائل دراصل پورے خطے کو زخمی کر رہا ہے، اور اس جنگ کی بھاری قیمت خطے کی معیشت اور عوام ادا کر رہے ہیں۔
صدر ایردوان نے اس امر پر بھی افسوس کا اظہار کیا کہ اربوں ڈالر کی بنیادی تنصیبات تباہ ہو رہی ہیں اور گزشتہ 27 دنوں سے جاری حملوں میں نہ مسلک کی تمیز رہی ہے نہ نسل کی، چاہے کوئی شیعہ ہو یا سنی، ترک ہو یا کرد، عرب ہو یا کوئی اور، سب یکساں طور پر متاثر ہو رہے ہیں۔
انہوں نے واضح کیا کہ ترکیہ نہ تو اپنے ہمسایہ اور برادر ممالک کے درمیان کوئی امتیاز برتتا ہے اور نہ ہی ان کے دکھ درد سے لاتعلق رہ سکتا ہے۔ ان کا کہنا تھا کہ مشکل کی گھڑی میں دوستوں اور بھائیوں کو تنہا چھوڑ دینا ترکیہ کی روایت نہیں۔
صدر ایردوان نے اسرائیل کو تنقید کا نشانہ بناتے ہوئے کہا کہ یہ جنگ درحقیقت اسرائیل کی جنگ ہے، مگر اس کے تباہ کن اثرات پوری انسانیت کو بھگتنا پڑ رہے ہیں۔ انہوں نے الزام عائد کیا کہ نیتن یاہو حکومت نہ صرف ایران بلکہ لبنان اور شام کے خلاف بھی جارحانہ اقدامات جاری رکھے ہوئے ہے۔
انہوں نے بتایا کہ 2 مارچ سے اب تک لبنان میں اسرائیلی حملوں کے نتیجے میں 1100 افراد جاں بحق جبکہ 11 لاکھ 65 ہزار سے زائد بے گھر ہو چکے ہیں۔ اسی طرح شام کی خودمختاری اور علاقائی سالمیت بھی مسلسل پامال کی جا رہی ہے۔
صدر ایردوان نے مسجد اقصیٰ کی بندش کو سخت الفاظ میں تنقید کا نشانہ بناتے ہوئے کہا کہ اسے 27 دنوں سے بند رکھنا ایک کھلی جارحیت ہے۔ انہوں نے دوٹوک الفاظ میں کہا کہ مسلمانوں کو مسجد اقصیٰ میں عبادت سے روکنا کسی صورت قابل قبول نہیں اور یہ حق نہ کبھی سلب کیا جا سکتا ہے اور نہ ہی اس پر پابندی عائد کی جا سکتی ہے۔