خصوصی تجزیہ: ڈاکٹر فرقان حمید
پاکستان میں انتظامی اصلاحات اور نئے صوبوں کے قیام کی بحث کوئی نئی نہیں، مگر وفاقی وزیرِ داخلہ محسن نقوی کے حالیہ بیان نے اس دیرینہ موضوع کو ایک مرتبہ پھر قومی مکالمے کے مرکز میں لا کھڑا کیا ہے۔ ان کا یہ کہنا کہ “جس نظام کے اندر ہم رہ رہے ہیں وہ کولیپس کر چکا ہے” محض ایک سیاسی بیان نہیں بلکہ موجودہ طرزِ حکمرانی پر ایک سنجیدہ سوالیہ نشان بھی ہے۔ مزید اہم بات یہ ہے کہ انہوں نے صرف مسئلے کی نشاندہی نہیں کی بلکہ یہ بھی کہا کہ ملک کو نئے انتظامی یونٹس یا صوبوں کی طرف جانا ہوگا اور اس مقصد کے لیے تمام سیاسی قوتوں کو ایک میز پر بیٹھ کر قومی اتفاقِ رائے پیدا کرنا چاہیے۔
اسی بحث کو اس وقت مزید تقویت ملی جب اگلے روز پاک فوج کے شعبۂ تعلقاتِ عامہ (آئی ایس پی آر) کے سربراہ لیفٹیننٹ جنرل احمد شریف چوہدری نے بھی گڈ گورننس کے تناظر میں کہا کہ ریاستی نظام جامد نہیں رہ سکتا، وقت کے ساتھ انتظامی اصلاحات ناگزیر ہو جاتی ہیں اور ایسے تمام فیصلے آئین، قانون، عوامی خواہشات اور منتخب نمائندوں کے ذریعے ہی ہونے چاہییں۔ اس بیان نے واضح کر دیا کہ انتظامی اصلاحات پر غور کرنا کوئی غیر معمولی یا ممنوع موضوع نہیں بلکہ ایک جائز قومی بحث ہے جسے آئینی اور جمہوری دائرے میں آگے بڑھایا جا سکتا ہے۔
تاہم اس پوری بحث میں سب سے اہم سوال یہ نہیں کہ نئے صوبے بننے چاہییں یا نہیں، بلکہ یہ ہے کہ پاکستان کو اکیسویں صدی کے تقاضوں کے مطابق کس نوعیت کے انتظامی ڈھانچے کی ضرورت ہے۔ کیا آج کا پاکستان اسی انتظامی ماڈل کے ساتھ مؤثر انداز میں چل سکتا ہے جو کئی دہائیاں قبل نسبتاً کم آبادی، محدود شہری پھیلاؤ اور مختلف معاشی حالات کے لیے تشکیل دیا گیا تھا؟
پاکستان کی آبادی اب پچیس کروڑ سے تجاوز کر چکی ہے۔ لاہور، کراچی، فیصل آباد، راولپنڈی، پشاور، کوئٹہ، ملتان، حیدرآباد، گوجرانوالہ اور دیگر بڑے شہری مراکز دنیا کے بڑے شہروں میں شمار ہونے لگے ہیں۔ دوسری جانب پورا انتظامی ڈھانچہ آج بھی بنیادی طور پر چند بڑے صوبوں کے گرد گھومتا ہے جن کی آبادی کئی خودمختار ممالک سے بھی زیادہ ہے۔ اتنے بڑے جغرافیے، اتنی بڑی آبادی اور متنوع معاشی ضروریات کو ایک ہی صوبائی انتظامیہ کے ذریعے مؤثر انداز میں چلانا یقیناً ایک مشکل کام بنتا جا رہا ہے۔
یہ حقیقت بھی نظرانداز نہیں کی جا سکتی کہ حکومتوں کے بدلنے سے مسائل اپنی جگہ برقرار رہتے ہیں۔ ہر نئی حکومت سابقہ حکومت کو ذمہ دار قرار دیتی ہے، مگر قرضوں کا بوجھ بڑھتا رہتا ہے، ترقیاتی منصوبوں میں تاخیر ہوتی ہے، شہری سہولیات پر دباؤ بڑھتا جاتا ہے اور عوامی خدمات کی فراہمی میں وہ رفتار پیدا نہیں ہو پاتی جس کی ایک جدید ریاست سے توقع کی جاتی ہے۔ محسن نقوی کا یہ کہنا کہ ہر سال بجٹ خسارے کا بنتا ہے اور پہلے ہی قرض لینے کی منصوبہ بندی کرنا پڑتی ہے، دراصل اسی تلخ حقیقت کی نشاندہی کرتا ہے۔
یہاں ایک بنیادی سوال پیدا ہوتا ہے کہ کیا صرف ٹیکس بڑھانے، مزید قرض لینے یا ترقیاتی منصوبوں کے اعلانات سے مسائل حل ہو جائیں گے؟ یا پھر اصل ضرورت اس بات کی ہے کہ ریاست کے انتظامی ڈھانچے کو ازسرِ نو اس انداز سے ترتیب دیا جائے جس سے حکمرانی کی لاگت کم، اداروں کی کارکردگی بہتر اور عوام تک خدمات کی فراہمی زیادہ تیز اور مؤثر ہو سکے؟
یہی وہ مقام ہے جہاں “انتظامی اصلاحات” کا تصور محض نئے صوبے بنانے سے کہیں زیادہ وسیع ہو جاتا ہے۔ اصل مقصد اختیارات کو عوام کے قریب منتقل کرنا، فیصلہ سازی کو تیز کرنا، وسائل کی تقسیم کو زیادہ منصفانہ بنانا اور ریاستی اداروں کے درمیان غیر ضروری تکرار کو کم کرنا ہونا چاہیے۔
پاکستان جیسے ترقی پذیر ملک میں یہ جائز سوال بھی اٹھایا جا سکتا ہے کہ کیا موجودہ انتظامی ڈھانچے میں موجود متعدد سطحوں کی بیوروکریسی، ادارہ جاتی تداخل اور گورننس کی بڑھتی ہوئی لاگت کو زیادہ مؤثر بنایا جا سکتا ہے؟ اگر جامع اصلاحات کے ذریعے غیر ضروری انتظامی اخراجات کم کیے جائیں تو بچنے والے وسائل تعلیم، صحت، جدید انفراسٹرکچر، صاف پانی، زرعی تحقیق، مصنوعی ذہانت، ڈیجیٹل معیشت، سائنسی جدت اور نوجوانوں کے لیے روزگار کے نئے مواقع پیدا کرنے پر خرچ کیے جا سکتے ہیں۔ ریاست کی مالی مضبوطی صرف زیادہ محصولات سے نہیں بلکہ وسائل کے دانشمندانہ، شفاف اور مؤثر استعمال سے بھی حاصل ہوتی ہے۔
یہاں یہ وضاحت بھی ضروری ہے کہ نئے انتظامی یونٹس یا شہری صوبوں کی حمایت کا مطلب کسی موجودہ صوبے کی تاریخی، ثقافتی یا آئینی حیثیت کو چیلنج کرنا نہیں۔ پاکستان ایک وفاق ہے اور آئین نئے صوبوں کے قیام کا واضح طریقۂ کار فراہم کرتا ہے۔ پیپلز پارٹی سمیت مختلف سیاسی جماعتوں نے بھی یہی مؤقف اختیار کیا ہے کہ اگر کہیں نئے صوبوں کی ضرورت محسوس ہو تو اس کا فیصلہ آئینی طریقہ کار اور متعلقہ صوبائی اتفاقِ رائے سے ہونا چاہیے۔ یہی جمہوری راستہ پاکستان کی سیاسی پختگی کی علامت بھی ہوگا۔
اس پوری بحث میں ترکیہ کا تجربہ خصوصی توجہ کا مستحق ہے۔ پاکستان اور ترکیہ کے سیاسی نظام، تاریخ اور آئینی ڈھانچے میں یقیناً نمایاں فرق موجود ہے، اس لیے کسی بھی ماڈل کو من و عن نقل کرنا نہ ممکن ہے اور نہ ہی مناسب۔ تاہم کامیاب تجربات سے رہنمائی ضرور حاصل کی جا سکتی ہے۔
گزشتہ تین دہائیوں میں ترکیہ نے مقامی حکومتوں اور میٹروپولیٹن بلدیاتی نظام کو غیر معمولی طور پر مضبوط کیا ہے۔ استنبول، انقرہ، ازمیر، بُرصہ، قونیہ، غازی عینتاب، قیصری اور دیگر بڑے شہر صرف انتظامی مراکز نہیں بلکہ ترقی، سرمایہ کاری، جدید ٹرانسپورٹ، شہری منصوبہ بندی، ماحولیات، ڈیجیٹل خدمات اور عوامی سہولیات کے میدان میں ایک دوسرے سے آگے بڑھنے کی مثبت مسابقت میں شریک ہیں۔ یہی مسابقت مقامی حکومتوں کو زیادہ جواب دہ بھی بناتی ہے کیونکہ عوام اپنی روزمرہ زندگی میں نتائج کو براہِ راست محسوس کرتے ہیں۔
ترکیہ میں مرکزی حکومت قومی سلامتی، خارجہ پالیسی، مالیاتی استحکام اور قومی منصوبہ بندی جیسے امور پر توجہ مرکوز رکھتی ہے جبکہ شہری سطح کے بہت سے معاملات مقامی ادارے مؤثر انداز میں انجام دیتے ہیں۔ اس انتظامی تقسیم نے نہ صرف خدمات کی فراہمی بہتر بنائی بلکہ شہری ترقی کی رفتار بھی تیز کی۔
پاکستان بھی اس تجربے سے سبق حاصل کر سکتا ہے۔ اگر مستقبل میں آئینی اتفاقِ رائے کے ذریعے آبادی، معاشی سرگرمی، جغرافیائی ضرورت اور انتظامی سہولت کو مدنظر رکھتے ہوئے نئے شہری یا انتظامی صوبے تشکیل دیے جائیں تو اس سے کئی فوائد حاصل ہو سکتے ہیں۔ عوامی نمائندے اپنے حلقوں کے زیادہ قریب ہوں گے، ترقیاتی منصوبوں پر تیزی سے عمل درآمد ممکن ہوگا، علاقائی وسائل کی بہتر منصوبہ بندی ہو سکے گی اور مقامی قیادت میں صحت مند مقابلے کا رجحان پیدا ہوگا۔
یہاں سابق صدر جنرل پرویز مشرف کے دور میں متعارف کرائے گئے ضلعی حکومتوں اور ناظم کے نظام کا ذکر بھی ضروری ہے۔ اس نظام پر مختلف سیاسی اعتراضات ضرور کیے گئے، تاہم اس بات سے انکار مشکل ہے کہ کئی علاقوں میں اختیارات نچلی سطح تک منتقل ہونے کے باعث عوامی مسائل کے حل میں نسبتاً بہتری محسوس کی گئی۔ بعد ازاں جب اس نظام کو ختم کیا گیا تو اختیارات دوبارہ مرکزیت کی طرف منتقل ہوتے گئے اور مقامی حکومتوں کا کردار کمزور پڑ گیا۔ اس تجربے سے یہ سبق ضرور ملتا ہے کہ اختیارات کی نچلی سطح تک منتقلی، اگر مضبوط ادارہ جاتی ڈھانچے کے ساتھ ہو، تو عوام کو اس کے مثبت نتائج مل سکتے ہیں۔
یقیناً نئے صوبوں کے قیام کے ساتھ کئی خدشات بھی وابستہ ہیں۔ بعض حلقے مالی بوجھ، نئی بیوروکریسی، سیاسی تنازعات اور علاقائی حساسیت کا خدشہ ظاہر کرتے ہیں۔ یہ خدشات اپنی جگہ اہم ہیں اور انہیں نظرانداز نہیں کیا جا سکتا۔ اسی لیے انتظامی اصلاحات کا ہر قدم جامع آئینی مشاورت، غیرجانبدار ماہرین کی سفارشات، مالیاتی جائزے اور قومی اتفاقِ رائے کے بعد ہی اٹھایا جانا چاہیے۔ مقصد صرف نقشے تبدیل کرنا نہیں بلکہ حکمرانی کو بہتر بنانا ہونا چاہیے۔
اس کے ساتھ ساتھ یہ امر بھی ضروری ہے کہ اگر نئے انتظامی یونٹس تشکیل دیے جائیں تو ان کی بنیاد لسانی یا نسلی تقسیم کے بجائے انتظامی کارکردگی، آبادی، معاشی صلاحیت، شہری ضروریات اور عوامی سہولت پر رکھی جائے۔ دنیا کے کئی کامیاب وفاقی ممالک میں انتظامی اکائیاں اسی اصول کے تحت قائم کی گئی ہیں تاکہ ترقی کا معیار شناختی سیاست کے بجائے کارکردگی بن سکے۔
آج پاکستان ایک ایسے موڑ پر کھڑا ہے جہاں بڑھتی ہوئی آبادی، شہری توسیع، معاشی دباؤ اور محدود وسائل ایک نئے انتظامی وژن کا تقاضا کر رہے ہیں۔ شاید یہی وہ وقت ہے کہ سیاسی قیادت، آئینی ماہرین، معاشی منصوبہ ساز، سول سوسائٹی، کاروباری حلقے اور جامعات ایک جامع قومی مکالمہ شروع کریں کہ آنے والے پچیس سے پچاس برسوں کے لیے پاکستان کا بہترین انتظامی ڈھانچہ کیا ہونا چاہیے۔
محسن نقوی کے بیان سے اختلاف کیا جا سکتا ہے، اس کے وقت یا انداز پر بھی بحث ہو سکتی ہے، مگر اس حقیقت سے انکار مشکل ہے کہ انہوں نے ایک ایسے سوال کو دوبارہ زندہ کیا ہے جس سے مسلسل نظریں چرانا شاید اب ممکن نہیں رہا۔ اگر اس بحث کو سیاسی پوائنٹ اسکورنگ سے نکال کر قومی مفاد، آئینی حدود، انتظامی بہتری اور عوامی سہولت کے تناظر میں آگے بڑھایا جائے تو یہی مکالمہ مستقبل کے پاکستان کے لیے ایک اہم سنگِ میل ثابت ہو سکتا ہے۔
حقیقت یہ ہے کہ مضبوط ریاستیں صرف زیادہ وسائل سے نہیں بلکہ بہتر نظم و نسق سے بنتی ہیں۔ پاکستان کے لیے بھی اصل چیلنج یہی ہے کہ وہ ایسا انتظامی نظام تشکیل دے جو کم خرچ، زیادہ مؤثر، عوام کے زیادہ قریب، جواب دہ اور مستقبل کے تقاضوں سے ہم آہنگ ہو۔ اگر ترکیہ سمیت دیگر کامیاب تجربات سے رہنمائی لیتے ہوئے پاکستان اپنے وفاقی ڈھانچے کے اندر رہ کر جدید انتظامی اصلاحات کی طرف پیش قدمی کرتا ہے تو ممکن ہے کہ یہی سفر بہتر حکمرانی، مضبوط معیشت اور زیادہ خوشحال پاکستان کی بنیاد بن جائے۔