استنبول: ترقی پذیر آٹھ ممالک کی تنظیم برائے اقتصادی تعاون (ڈی-8) نے جمہوریہ انڈونیشیا کے 81ویں یومِ آزادی کے موقع پر انڈونیشیا کی قیادت، حکومت اور عوام کو دلی مبارک باد اور نیک تمنائیں پیش کی ہیں۔
ڈی-8 کی جانب سے جاری تہنیتی پیغام میں کہا گیا ہے کہ آزادی کے بعد سے انڈونیشیا نے اقتصادی ترقی، سماجی بہبود اور عالمی سطح پر مؤثر کردار سمیت مختلف شعبوں میں جو نمایاں کامیابیاں حاصل کی ہیں، وہ بلاشبہ انڈونیشی قوم کے لیے باعثِ فخر ہیں۔
پیغام میں کہا گیا کہ انڈونیشیا کا قومی دن ایک ایسے وقت میں منایا جا رہا ہے جب ملک کو حالیہ تباہ کن زلزلوں کے باعث ایک قدرتی آفت کا سامنا ہے۔ ڈی-8 نے اس مشکل گھڑی میں انڈونیشیا کی حکومت اور عوام سے دلی تعزیت، بھرپور ہمدردی اور یکجہتی کا اظہار کرتے ہوئے متاثرہ خاندانوں کے ساتھ اپنی گہری وابستگی کا اعادہ کیا ہے۔
تنظیم نے اس یقین کا اظہار کیا کہ برادر ملک انڈونیشیا کے عوام اپنی روایتی ثابت قدمی، حوصلے اور غیر معمولی عزم کے ساتھ اس قدرتی آفت کے اثرات پر قابو پانے میں کامیاب ہوں گے۔
ڈی-8 نے اپنے پیغام میں مزید کہا کہ بانی رکن کی حیثیت سے انڈونیشیا نے تنظیم کے رکن ممالک کے درمیان اقتصادی تعاون کے فروغ، پائیدار ترقی اور باہمی یکجہتی کو مستحکم کرنے میں گراں قدر کردار ادا کیا ہے۔
ترقی پذیر آٹھ ممالک کی تنظیم نے انڈونیشیا کے لیے مسلسل امن، ترقی اور خوش حالی کی دعا کرتے ہوئے اس عزم کا اظہار کیا کہ ڈی-8 اور انڈونیشیا کے درمیان دیرینہ شراکت داری کو مزید مضبوط اور مستحکم بنانے کے لیے مشترکہ کوششیں جاری رکھی جائیں گی۔
پیغام میں اس امر کو بھی اہم سنگِ میل قرار دیا گیا کہ انڈونیشیا جکارتہ میں ڈی-8 سربراہ اجلاس کے 12ویں اجلاس کی میزبانی کرے گا، جو تنظیم اور اس کے رکن ممالک کے درمیان تعاون کے فروغ اور دیرینہ شراکت داری کو نئی جہت دینے کے حوالے سے ایک اور اہم پیش رفت ثابت ہوگا۔