پاکستان تحریک انصاف نے 28 اکتوبر کو لاہور کے لبرٹی چوک سے اپنے لانگ مارچ کا آغاز کیاتھا اور ابھی تک کامونکی ہی پہنچ سکے ہیں۔ لوگوں کا ٹھاٹھیں مارتا سمندرمنزل کی جانب رواں دواں۔
پاکستان تحریک انصاف کے چیئرمین عمران خان نے کامونکی میں حقیقی آزادی مارچ کے چوتھے روز لانگ مارچ کے آغاز سے قبل شرکا سے خطاب کے دوران چیف الیکشن کمشنر سکندر سلطان راجا کو مخاطب کرتے ہوئے کہا کہ میں نے تم سے بڑا دو نمبر آدمی کبھی الیکشن کمیشن میں بیٹھے نہیں دیکھا، یہ بدنیت آدمی ن لیگ شریف خاندان کے گھر کا نوکر ہے، میں اس کے خلاف 10 ارب روپے ہرجانے کا مقدمہ کر رہا ہوں، سکندر سلطان کو عدالت میں کھڑا کرکے ہرجانہ لوں گا اور وہ شوکت خانم میں دونگا۔
پی ٹی آئی چیئرمین نے کہا کہ الیکشن کمیشن نے مجھے نا اہل قرار دیا تھا، چوروں کو خوش کرنے کیلیے ممنوعہ فنڈنگ اور توشہ خانہ میں میرا نام لیا، میں نے اگر ایک بھی غیر قانونی کام کیا ہو توعدالتی فیصلے کا انتظار نہیں کرونگا بلکہ خود چھوڑ دوں گا۔
عمران خان کا کہنا تھا کہ کرم کے پی میں میں نے الیکشن مہم نہیں کی، وہاں سارا چوروں کا ٹولہ میرے خلاف لڑ رہا تھا، میں وہاں کے عوام کو سلام کرتا ہوں انہوں نے دُگنی لیڈ سے پھینٹا لگایا ہے، میں نے 8 حلقوں میں سے 7 میں الیکشن جیتا جو ورلڈ ریکارڈ بن گیا ہے، ان میں سے کراچی کی ایک نشست پر جو پیپلز پارٹی جیتی ہے وہ بھی دھاندلی، ریاستی مشینری کے بغیر نہیں جیت سکتی تھی۔
سابق وزیراعظم نے کہا کہ ملک تب مضبوط ہوگا جب ادارے مضبوط ہونگے اور ادارے تب مضبوط ہوتے ہیں جب قوم ان کے ساتھ کھڑی ہو، عوام اور اسٹیبلشمنٹ مل کر ملک کو مضبوط کرتے ہیں، چوروں کو ڈرائی کلین کرکے ہم پر پھر مسلط کر دیا گیا، لیکن جو بھی ان چوروں کے ساتھ ملے گا وہ انہی کے ساتھ رنگا جائے گا، میرے لندن میں فلیٹس یا باہر جائیداد نہیں ہے، میں اسی ملک میں رہوں گا، اللہ سے دعا کرتا ہوں مجھے ارشد شریف والی موت دینا گیدڑوں والی نہیں۔
سابق وزیراعظم نے کہا کہ جی ٹی روڈ پر لوگ ہمارا انتظار کر رہے ہیں، جنون اتنا ہے کہ ہم ایک دن میں 12 کلومیٹر سے زیادہ سفر نہیں کر پا رہے ہیں، مجھے پتہ ہے امپورٹڈ حکومت کوریج بند کر رہی ہے، انصاف کے انقلاب کو اسلام آباد بڑھتے دیکھ کر کوریج بند کر رہے ہیں، لیکن سوشل میڈیا پر سب کو نظر آ رہا ہے کہ انقلاب کتنی تیزی سے اسلام آباد کی جانب بڑھ رہا ہے، جب اسلام آباد پہنچوں گا سب نے میرے ساتھ ہونا ہے، یہ آزادی کی جنگ ہے جس میں قربانیاں دینا پڑتی ہیں، ہم جب تک ڈاکوؤں کو قانون کے نیچے نہیں لائیں گے ملک آگے نہیں بڑھ سکتا۔