تحریر ڈاکٹر فرقان حمید
اگر یہ کہا جائے کہ روس اور یوکرین کے درمیان ہونے والی جنگ کا سب سے زیادہ فائدہ ترکیہ کو پہنچا ہے تو غلط نہ ہوگا۔دنیا اور خاص طور پر یورپ توانائی کے بحران سے دوچار ہے اور اس کیے لیے لوڈ شیڈنگ کے پلان اور پروگرام مرتب کیے جا رہے ہیں تو ترکیہ جس کا توانائی کے شعبے زیادہ تر انحصار غیر ممالک پر اپنے تئیں بھی پٹرول اور گیس کے ذخائیر کی تلاش میں سرگرداں ہیں اور اسے کچھ حد تک تو ضرور کامیابی حاصل ہوئی ہے لیکن ابھی بھی وہ اپنی توانائی کی زیادہ تر ضروریاتغیر ممالک ہی سے پورا کرتا ہےلیکن روس اور یوکرین کی جنگ نے اسے ایک یسا موقع فراہم کیا ہے جس کے نتیجے میں وہ توانائی کے ڈپو کی حیثیت اختیار کرنے والا ہے۔ اگر روس یوکرین جنگ جاری رہی تو یورپ توانائی کے شدید بحران سے دوچار ہو جائے گا اور سردیوں میں ٹھٹھر نے سے بچنے کے لیے اسے کوئلے کو بھی استعمال کرنا پڑے گا لیکن اس کے برعکس ترکیہ جو ماضی میں ہمیشہ ہی توانائی کے حصول میں مشکلات سے دوچار رہا ہے موجودہ دور اور مستقبل میں توانائی کے مرکز کی حیثیت اختیار کر جائے گا۔
اس سلسلے میں ترکیہ اور روس کے درمیان طویل عرصے سے مذاکرات جاری تھے اور اب ان مذاکرات نے پھل دینا شروع کردیا ہے۔
ترکیہ کو توانائی کے مرکز بنانے کے سلسلے میں روس کے گازپروم ( GAZPROM)کے سی ای او الیکسی ملر ان دنوں ترکیہ کے دورے پر تشریف لائے ہوئے ہیں اور انہوں نے صدر رجب طیب ایردوان سے ملاقات کی ہے۔ ملاقات کے دوران ترکیہ کو روسی گیس کی فراہمی سے اور مرکز قائم کرنے اور اسے حتمی شکل دینے کے بارے میں تبادلہ خیال کیا گیا۔
گاز پروم کے سی ای او نے اپنے دورے کے دائرہ کار میں ترکیہ کے توانائی اور قدرتی وسائل کے وزیر فاتح دونمیز سے بھی ملاقات کی ہے۔
اس سے قبل روس کے صدر اپنے بیان میں کہہ چکے ہیں کہ وہ ترکیہ کو خطے کے قدرتی گیس کا مرکز بنانے کے لیے تیار ہیں۔ انہوں نے کہا ہے کہ ہم ترکیہ کے راستے یورپی ممالک کو گیس فراہم کرسکتے ہیں اور ترکیہ نے یورپی یونین کو گیس کی فراہمی کا سب سے قابل اعتماد طریقہ ہو سکنے کو ثابت کردیا ہے۔
وہ کہہ چکے ہیں کہ ترک سٹریم قدرتی گیس پائپ لائن کے بارے میں صدر ایردوان کے نقطہ نظر ہی کی بدولت یہ سب کچھ ممکن ہوا ہے ۔ یہ مرکز نہ صرف گیس کی ترسیل کے لیے، بلکہ قیمت کے تعین کے لیے بھی ایک پلیٹ فارم ثابت ہوگا، کیونکہ قیمتوں کا مسئلہ بہت اہم ہے۔ آج قیمتیں غیر مستحکم ہیں۔ ہم سیاست کیے بغیر مارکیٹ کی سطح پر قیمتوں کو کنٹرول کر سکتے ہیں۔
ترکیہ اور روس کے درمیان بڑی تیزی سے تجارتی حجم میں اضافہ ہوتا جا رہا ہے اور روس اپنے اوپر لگائی جانے والی پابندیوں کی وجہ سے ترکیہ کے توسط سے اپنی تمام ضروریات پوری کررہا ہے جس سے ترکیہ کے تجارتی حجم پر بڑے مثبت اثرات مرتب ہوئے ہیں اور اب روس کے صدر پوتن کی جانب سے ترکیہ کو قدرتی گیس اور ہائیڈرو کاربن کی ترسیل کی تیاریاں مکمل کیے جانے کے اعلان کے بعد ترکیہ کی لاٹری نکل آئی ہے اورروس – یوکرین جنگ میں اگر کسی ملک کو فائدہ پہنچا ہے تو وہ بلاشبہ ترکیہ ہی ہے اور مزے کی بات ہے صدر رجب طیب ایردوان روس کے صدر پوتن کے جتنے قریب ہیں اتنی ہی قربت صدر ایردوان اور صدر زیلنسکی کے درمیان بھی دیکھی جاسکتی ہے اور یہی وجہ ہے کہ صدر ایردوان ہی کی کوششوں کے نتیجے میں یوکرین کے اناج کو عالمی منڈیو ں تک پہنچایا جا رہا ہے۔ ایک طرف روسی سیاحوں کا ترکیہ آمد کا سلسلہ جاری ہے اور ترکیہ کے سیاحتی شہر اس وقت روسی سیاحوں کی توجہ کا مرکز بنے ہوئے ہیں تو دوسری طرف ترکیہ بڑی تعداد میں اپنے ڈرانز یوکرین کو فروخت کرتے ہوئے یوکرین کے عوام کی ہمدردیاں بھی حاصل کررہا ہے۔ یعنی دوسرے الفاظ میں روس اور یوکرین کے عوام دونوں ہی ترکیہ کے عشق میں ڈوبے ہوئے آپس میں جنگ کو جاری رکھتے ہوئے ترکیہ کے لیے جیب گرم کررہے ہیں اور ترکیہ کے مالی بحران پر قابو پانے میں کچھ حد تک مددگار ثابت ہو رہے ہیں۔