کابینہ کے اجلاس کے بعد صدر ایردوان نےترکیہ میں بڑھتی ہوئی مہنگائی کے بارے میں بیان دیتے ہوئے کہا ہے کہ ہم ایک ایسا پروگرام نافذ کرنے جا رہے ہیں جس سے ملک میں افراطِ زر کی شرح کم ہو کر بیس فیصد تک رہ جائے گی۔
انہوں نے کہا کہ ہم نے گزشتہ تین سہہ ماہیوں سے ملکی معیشت کو نہ صرف سنبھالا دیا ہے بلکہ ریکارڈ حد تک ملک کو ترقی کی راہ پر گامزن کرنے کا سلسلہ جاری رکھا ہوا ہے۔ ہم نے 31.2 ملین ملازمتوں کے ساتھ اپنے اقتصادی پروگرام کی کامیابی کے ساتھ جاری رکھا ہوا ہے۔ ہم نےاس دوران برآمدات میں جمہوریہ کی تاریخ کا نیا ریکارڈ قائم کیا ہےہمارے لیے مہنگائی اور افراطِ زر کا مسئلہ اب مسئلہ نہیں رہا ہے کیونکہ 64.27 فیصد سالانہ افراطِ زر کو بیس فیصد تک لانے کا تہیہ کررکھا ہے اور اپنے اس پروگرام پر عمل درآمد کررہے ہیں۔ ہم نے مالیاتی نظم و ضبط پر کوئی سمجھوتہ نہیں کیا۔ اس وقت استنبول اسٹاک ایکسچینج دنیا کے بہترین اسٹاک ایکسچینج میں سے ایک ہے۔ ہم کرنسی پروٹیکشن ڈپازٹ اکاؤنٹس پروگرام کو سال کے آخر تک بڑھا رہے ہیں۔ ہم زندگی کے تمام شعبوں سے تعلق رکھنے والے اپنے شہریوں کو گھر کے مالک بننے کے لیے قرض کے مواقع فراہم کرتے رہیں گے۔
سیاحت میں ترکیہ کا ہدف
صدر ایردوان نے کہا کہ ہم نے سیاحت کے شعبے میں آمدنی کے لحاظ سے دنیا کے تیسرے بڑے ملک کی حیثیت اختیار کرلی ہے۔ سیاحت کے شعبے میں اہل افراد کی ضروریات کو پورا کرنے کے لیے، ہم نے 3 زبانوں میں ٹریننگ دینے کا سلسلہ جاری رکھا ہوا ہے۔ اس سال، ہم ثقافت اور سیاحت میں شروع کیے گئے کام کو کئی گنا بڑھا کر اپنے ملک کی برانڈ ویلیو کو مضبوط کیا ہے۔ ہم سیزن کا آغاز 60 ملین سیاحوں کے ہدف کے ساتھ کر رہے ہیں اور ثقافتی مراکز کی تعداد میں اضافہ کررہے ہیں۔
انہوں نے غیر ممالک کے ساتھ بڑھتے ہوئے ترکیہ کے تعلقات کا ذکر کرتے ہوئے کہا کہ اس سال ہم نے ریاست اور حکومت کے سربراہ کی سطح پر کل 200 فون کالز کیں۔ ہم نے اپنے ملک میں 37 سربراہان مملکت اور حکومت کی میزبانی کی۔ ہم نے 27 ممالک کا دورہ کیا۔ استنبول اناج کے معاہدے کو نافذ کرکے، ہم نے 17 ملین ٹن اناج کو عالمی منڈیوں تک پہنچانے کے قابل بنایا۔ آذربائیجان کے ساتھ ہمارے تعلقات اور تعاون ہماری تاریخ کی بلند ترین سطح پر پہنچ گئے۔ پاکستان میں سیلاب کی تباہ کاریوں کے دوران ہم نے 15 طیارے اور 13 ٹرینیں بھیجیں۔ Covid 19 کی وبا کے خلاف جنگ کے ایک حصے کے طور پر، ہم نے افریقہ میں اپنے بھائیوں کو ویکسین کی 4.5 ملین خوراکیں عطیہ کیں۔ ہم عالمی اور علاقائی مسائل میں اپنی مثبت شراکت میں اضافہ کرتے رہیں گے اور امن اور تعاون کے دروازوں کو کھلا رکھیں گے۔