صدر ایردوان نے کابینہ کے اجلاس کے بعد بیان دیتے ہوئے کہا کہ سویڈن کے دارالحکومت سٹاک ہوم میں ترکیہ کے سفارت خانے کے سامنے قرآن کریم کو نذر آتش کرنا ایک گھٹیا ذہن کا گھناؤنا حملہ ہے جو ہمارے مذہب اور ہماری قومیت پر ایک وار ہے جس پر قطعی خاموشی اختیار نہیں کی جاسکتی۔ سویڈن میں ہونے والا بدصورت حملہ انسانیت کی اور خاص طور پر مسلمانوں کی توہین ہے، جسے ہرگز برداشت نہیں کیا جاسکتا ۔
انہوں نے کہا کہ سویڈن میں یہ سب کچھ ایک ایسے وقت میں ہو رہا ہے جب سویڈن اپنے تحفظ کے لیے نیٹو کی رکنیت کا خواہا ں ہے ۔ قرآنِ کریم کو نذر آتش کرنے کے بعد اب سویڈن ہم سے نیٹو کی رکنیت کے بارے میں حمایت کرنے کی ہرگز توقع نہ رکھے۔ ترکیہ نے اب یہ دروازہ بند کردیا ہے کیونکہ سویڈن کو اب اپنے تحفظ کے لیے نیٹو کی نہیں ان دہشت گردوں اور اسلام دشمن عناصر کی ضرورت ہے ۔ ان اسلام دشمن عناصر کی موجودگی میں سویڈن کو اب ترکیہ سے کسی قسم کی حمایت کی توقع نہیں رکھنی چاہیے۔ ۔ ہمارے لیے سب سے اہم مذہب اسلام، اس کی تعلیمات اور پوری دنیا کے لیے ہدایت کی کتاب قرآن کریم ہے اس کے بعد ہی ہم کسی دیگر موضوع کو اہمیت دیتے ہیں۔
صدر ایردوان نے کہا کہ اس مہذب ، جدید ڈیموکریسی کی دنیا میں انسانی حقوق اور آزادیوں کی ایک بہت ہی سادہ تعریف کی گئی ہے۔ فرد کے حقوق اور آزادیاں صرف وہاں تک جائز ہیں جہاں سے دوسرے لوگوں کے حقوق اور آزادی شروع ہوتی ہے۔ کسی فرد کو مقدس ہستیوں یا مقدس کتابوں کی توہین کرنے کو آزادی نہیں کہا جاسکتا ۔ یہ جہالت کے سوا کچھ نہیں ہے۔
صدر ایردوان نے کہا کہ جب ہم کسی کو کچھ سمجھاتے ہیں تو ایمانداری سے سمجھاتے ہیں اور ان کو ان ہی کے مفاد میں اس قسم کی کاروائیوں کی اجازت نہ دینے کی تلقین کرتے ہیں ۔ جب کوئی دیگر شخص ہماری اور ہمارے مذہب کا احترام نہیں کرے گا تو تو ہم بھی جواب دینا جانتے ہیں۔ سویڈش انتظامیہ کو اب ہم سے حقوق اور آزادیوں کے بارے میں بات چیت کرنے کی ضرورت نہیں ہے۔ اگر آپ واقعی حقوق اور آزادیوں کا اتنا ہی احترام کرتے ہیں تو آپ کو مسلمانوں کے مذہبی عقائد کا بھی احترام کرنے کی ضرورت ہے۔ اگر آپ یہ احترام نہیں کریں گے تو پھر ہم بھی نیٹو کی رکنیت کے بارے میں آپ کی ذرہ بھر پروا نہیں کریں گے۔اس لیے اب سویڈن کو ترکیہ سے نیٹو کی رکنیت کی حمایت کرنے کی ہرگز توقع نہیں رکھنی چاہیے۔ ترکیہ اس وقت تک سویڈن کی نیٹو کی رکنیت کے لیے اپنے دروازےبند رکھے گا جب تک سویڈن اس قسم بے ہودہ ، بدصورت اور گری ہوئی حرکات کو روکنے سے باز نہیں آجاتا ۔