ترکیہ کے ملت اتحاد نے ترکیہ کے مستقبل کا متفقہ طور پر فیصلہ کرنے کے لیے اور صدر ایردوان کو صدارت سے ہٹانے کے لیے انتخابات کے لیے مشترکہ متفقہ متن کا اعلان کردیا ہے۔
اس متفقہ متن میں ترکیہ میں صحت سے لے کر تعلیم تک، عدلیہ سے لے کر خارجہ پالیسی تک 2000 سے زائد موضوعات کو جگہ دی گئی ہے۔صدر ایردوان کے مخالف اتحاد میں شامل جماعتوں کے رہنماوں نے ایک تقریب میں انتخابی منشور کی حیثیت رکھنے والی مشترکہ پالیسیوں کی مفاہمت کی یادداشت پر دستخط کیے۔
ری پبلیکن پیپلز پارٹی کے چئیرمین کمال کلیچدار اولو ، گڈ پاڑرٹی کی چئیر پرسن میرال آق شینر، سعادت پارٹی کے چئیرمین تیمل قارا مولا اولو ، دیوا پارٹی کے چئیرمین علی باباجان، فیوچر پارٹی کے چیئرمین احمد داود اولو اور ڈیموکریٹ پارٹی کے چیئرمین گل تیکن اویئسال نے شرکت کی۔
متن پر چھ رہنماوں کے دستخط
اجلاس سے پہلے تیار کردہ “مشترکہ پالیسیوں کی یادداشت کتابچہ ، ہال میں موجود لوگوں میں تقسیم کیا گیا۔ مرکزی عنوانات کے 240 صفحات، 75 ذیلی عنوانات، اور 2,300 سے زیادہ ٹھوس اہداف پر مشتمل ہے۔مشترکہ اہداف میں کہا گیا ہے کہ
* ملت اتحاد ایک آزادی پسند، صرف پارلیمانی نظام پر عمل درآمد کا خواہاں ہے۔ یہ قومی اتحاد ملک میں موثر، شراکتی مقننہ، ایک مستحکم، شفاف، جوابدہ ایگزیکٹو، اور ایک آزاد اور غیر جانبدار عدلیہ کا مطالبہ کرتا ہے۔ ملت اتحاد پارلیمنٹ میں قانون سازی کرتے ہوئے پارلیمنٹ کی سرگرمیوں میں تکثیریت کو یقینی بنائے گا۔
* عدالتی اصلاحات کے ذریعے آزاد اور غیر جانبدار عدلیہ قائم کرتے ہوئے اعلیٰ عدالتی کمیشن کو ختم کردیا جائے گا اور دو مختلف بورڈ کونسل آف ججز اور کونسل آف پراسیکیوٹرز قائم کیے جائیں گے۔ وزیر انصاف اور ان کے انڈر سیکرٹری ججز کے بورڈ میں شامل نہیں ہوں گے۔
* آئینی عدالت کے ارکان کی تقرری کے نظام میں تبدیلی کی جائے گی ، آزادی صحافت کو یقینی بنایا جائے گا۔ ایوان صدر کے اندر موجود بورڈز اور دفاتر کو ختم کر دیا جائے گا اور ان کے فرائض اور حکام متعلقہ وزارتوں کو منتقل کر دیے جائیں گے۔
مقامی حکومتوں پر مرکزی حکومت کا تسلط ختم کردیا جائے گا
* سرکاری ملازمین کی بھرتی کے لیے انٹرویو کے نظام کو ختم کردیا جائے گا۔ میرٹ اور مساوات کے اصولوں پر عمل درآمد کیا جائے گا۔ کرپشن کے ذریعے حاصل کیے گئے اثاثوں اور بیرون ملک سمگل کیے گئے اثاثوں کو واپس لانے کے لیے اثاثہ جات ریکوری آفس قائم کیا جائے گا۔ ترکیہ کو گرے لسٹ کی شرمندگی سے بچایا جائے گا اور منی لانڈرنگ کے ذریعہ ٹیکس ایمنسٹی کو روکا جائے گا۔
ایوانِ صدر کو قصر چانکایہ منتقل کیا جائے گا
* اپنے بنیادی معاشی اہداف کے دائرہ کار میں، دو سال کے اندر مہنگائی کو مستقل طور پر سنگل ڈیجٹ تک لایا جائے گا۔ مہنگائی کے خلاف جنگ کو بغیر کسی نرمی کے جاری رکھا جائے گا اور ملک کی شرح نمو کو 5 فیصد سے زاہد رکھا جائے گا اور 5 سال کے اختتام پر فی کس آمدنی کو کم از کم دو گنا کیا جائے گا۔ 5 سالوں میں کم از کم 50 لاکھ نئی ملازمتوں کے مواقع پیدا کیے جائیں گے ۔
* مرکزی بینک پر قیمت اور مالی استحکام کو برقرار رکھنے کے علاوہ کسی قسم کی کوئی ذمہ داریاں عائد نہیں کی جائیں گی۔
*استنبول میں بینک کے یونٹوں کو جلد از جلد واپس دارالحکومت انقرہ منتقل کر دیا جائے گا۔ نئے دور میں ریزرو کے انتظام کو مکمل شفافیت کے ساتھ انجام دیا جائے گا۔
*ڈالر کی قدرو قیمت پر قابو پانے کے لیے کرنسی سے محفوظ ڈپازٹس میں نئے اکاؤنٹس نہیں کھولیں جائیں گے اور موجودہ اکاؤنٹس کو ان کی معیاد پوری ہونے پر بند کردیا جائے گا۔
* شہرت کو بنیاد بناتے ہوئے تمام غیر ضروری اخراجات کو ختم کر دیا جائے گا۔
* ایوان صدر کو واپس قصر چانکایہ منتقل کردیا جائے گا۔ ایوان صدر سے منسلک تمام محلات اور قصر وغیرہ کو عوام کے لیے کھول دیا جائے گا۔
* صدارتی انوینٹری میں موجود طیارے فروخت کرتے ہوئے جنگل میں آگ بجھانے والے طیارے خریدیں جائیں گے۔
*ایک سےزاہد مقام سے تنخواہ حاصل کرنے کے نظام کو ختم کردیا جائے گا۔
* موجودہ حکومت ملک کے وسائل کو دکھاوے اور شو کے لیے برباد کر رہی ہے تو دوسری طرف عوامی خسارے اور نقصانات کو قالین کے نیچے چھپانے کی کوششوں مصروف ہے۔ ملت اتحاد کے برسر اقتدار آنے کی صورت میں صدر کے ماتحت کام کرنے والے تمام اداروں کے آڈٹ کے لیے تجربہ کار آڈٹ ماہرین پر مشتمل کمیٹی قائم کی جائے گی۔
* سرکاری اہلکاروں کو ایک سے زیادہ جگہوں سے تنخواہیں وصول کرنے سے روکا جائے گا۔
* ملکی وسائل کو کنال استنبول جیسے کرائے کے منصوبوں کے بجائے زرعی آبپاشی کے منصوبوں کے لیے استعمال کیا جائے گا۔
ترکیہ میں اعلیٰ تعلیمی کمیشن YÖKکو ختم کردیا جائے گا
* اعلیٰ تعلیمی ادارے YÖK کو ختم کر دیں گے اور اعلیٰ تعلیمی اداروں کی تعلیمی، انتظامی اور مالی خودمختاری میں مداخلت کیے بغیر اعلیٰ تعلیم کی منصوبہ بندی اور اعلیٰ تعلیمی اداروں کے درمیان ہم آہنگی کو یقینی بنانے جیسے محدود فرائض کے ساتھ ایک کمیٹی قائم کی جائے گی۔
* بجٹ سے زیادہ سے زیادہ وسائل ہائر ایجوکیشن کے لیے مختص کیے جائیں گے۔ یونیورسٹیوں کے ہاسٹل کے مسئلے کو مکمل طور پر حل کیا جائے گا۔
* صنعتی پیداوار اور برآمدات کو جدید ٹیکنالوجی پر مبنی ہائی ویلیو ایڈڈ ڈھانچے میں تبدیل کیا جائے گااور برآمدات میں ہائی ٹیک مصنوعات کا حصہ 10 فیصد اور درمیانے درجے کی اعلی ٹیکنالوجی کی شدت کو 40 فیصد تک بڑھا دیا جائے گا۔
* پہلا پروجیکٹ سرکاری اسکولوں میں تمام بچوں کو مفت ناشتہ اور دوپہر کا کھانا دیا جائے گا اور کوئی بچہ بھوکا نہیں سوئے گا، کوئی والدین اپنے بچے کی جیب میں پیسے ڈالنے کی فکر نہیں کرے گا۔ غریب خاندانوں کے بچوں کو خوراک اور حفظان صحت سے متعلق معاونت فراہم کی جائے گی۔
*ترکیہ میں رہائش کے مسئلے کو بھی حل کیا جائے گا۔ TOKİ اپنے اصل مشن پر واپس آئے گا اور صرف سماجی رہائش تیار کرے گا۔ ان سماجی رہائشوں میں، کم آمدنی والے خاندانوں کے پاس ایسے مکانات ہوں گے جیسے وہ پیشگی ادائیگی کیے بغیر کرایہ ادا کر رہے ہوں۔
* یونیورسٹی کے طلباء کی رہائش کا مسئلہ حل کیا جائے گا۔ غیر ملکیوں کو رئیل اسٹیٹ خرید کر ترکیہ کی شہریت حاصل کرنے کے نظام پر عمل درآمد کو روکا جائے گا۔