ترکیہ ہمارا ایک ایسا عظیم اور سچا دوست ہے جس کے لیے ہمار اتن من دھن سب کچھ قربان

وزیراعظم پاکستان کی مخیر حضرات، صنعتکاروں اور کاروباری افراد سے وزیرِ اعظم فنڈ برائے زلزلہ زدگانِ ترکیہ میں حصہ لینے کی اپیل

جمعرات کو وزیراعظم آفس کے میڈیاونگ سے جاری بیان کے مطابق وزیرِ اعظم محمد شہباز شریف کی زیرِ صدارت ترکیہ میں زلزلہ زدگان کیلئے امدادی سرگرمیوں کے حوالے سے اجلاس ہوا جس میں زلزلہ متاثرین کے لئے امدادی سرگرمیوں کا جائزہ لیاگیا۔

وزیراعظم نے ہدایت کی کہ سکولوں، کالجوں اور یونیورسٹیوں میں ترکیہ کے زلزلہ متاثرین کے لئے فنڈ ریزنگ کی جائے۔

وزیراعظم نے پاکستان کے مخیر حضرات، صنعتکاروں اور کاروباری افراد سے وزیرِ اعظم فنڈ برائے زلزلہ زدگانِ ترکیہ  میں بڑھ چڑھ کر حصہ لینے کی اپیل کی۔ وزیر اعظم نے کہا کہ پاکستانی عوام زلزلہ زدگان کیلئے امدادی اشیاء این ڈی ایم اے کے کلیکشن سینٹرز پر جمع کروا سکتے ہیں۔ مصیبت کی اس گھڑی میں پاکستان ترکیہ جیسے اپنے دیرینہ دوست کے ساتھ شانہ بشانہ کھڑا ہے۔

وزیراعظم کی ہدایت پر ترکیہ اور شام کے زلزلہ زدگان کی امدادی کاروائیوں کو منظم کرنے کیلئے اعلی سطح کی کمیٹی تشکیل دی گئی ۔ وزیرِ منصوبہ بندی احسن اقبال کی سربراہی میں وزیرِ ریلوے و ہوابازی خواجہ سعد رفیق، وزیرِ اطلاعات و نشریات مریم اورنگزیب کمیٹی کے رکن ہوں گے۔وزیرِ تعلیم رانا تنویر حسین، وزیرِ مذہبی امور مفتی عبدالشکور، چیئرمین این ڈی ایم اے ، پاکستان کے ترکیہ  میں سفیر ڈاکٹر یوسف جنید  اور معاونِ خصوصی طارق فاطمی بھی کمیٹی کے ممبر ہوں گے۔ وزیراعظم نے ہدایت کی کہ کمیٹی کا روزانہ کی بنیادوں پر اجلاس امدادی سامان کی ترکیہ کو  ترجیحی بنیادون پر ترسیل یقینی بنائے۔

پاکستان سے ترکیہ اور شام کے زلزلہ زدگان کیلئے زمینی، فضائی اور سمندری راستوں سے امدادی سامان بھیجا جائے۔ این ڈی ایم اے ہنگامی بنیادوں پر پاکستان کے ہر ضلع میں ترکیہ کے زلزلہ زدگان کیلئے امداد اکٹھی کرنے کیلئے کلیکشن سینٹر بنائے۔

ترکیہ نے 2010 اور 2022 کے سیلاب میں پاکستانیوں کی ہر طرح سے مدد کی۔محدود وسائل کے باوجود پاکستان اپنے ترک بہن بھائیوں کی امداد میں کوئی کسر نہیں اٹھا رکھے گا۔پاکستان نے امدادی سامان بھجوانے کیلئے ایئر کوریڈور قائم کر دیا ہے۔بہت جلد پاکستان سے امدادی سامان کے ٹرکوں کا قافلہ بھی ترکیہ روانہ ہو گا۔پاکستان کی طرف سے تیس بستروں پر مشتمل موبائل ہسپتال کیلئے ٹیم اور سامان بھی ترکیہ پہنچ کر کام کر رہا ہے۔ اجلاس کو بریفنگ دی گئی کہ دوسرا موبائل ہسپتال بھی عملے و سامان سمیت روانہ کیا جا رہا ہے۔ وزیراعظم نے کہاکہ ترکیہ کے زلزلہ زدگان کی آواز پاکستانیوں تک پہنچانے کیلئے وزیرِ اطلاعت مریم اونگزیب، ان کی ٹیم اور پاکستانی میڈیا کی کوششیں قابلِ ستائش ہیں۔

پاکستان ایئرفورس، پی آئی اے اور این ڈی ایم اے کی اس آپریشن میں بھرپور شمولیت بھی لائقِ تحسین ہے۔پاکستان کی ریسکیو ٹیمیں اور پاک فوج کی ٹیمیں بھی ترکیہ میں بہترین طریقے سے امدادی کاروائیوں میں حصہ لے رہی ہیں۔ پوری پاکستانی قوم سے اپیل ہے کہ ترکیہ میں جس قدر ہو سکے اپنے مسلمان بہن بھائیوں کی مدد کریں۔

اجلاس کو ترکیہ میں پاکستان کے سفیر  ڈاکٹر یوسف جنید نے زلزلے سے تباہی کے اعدادو شمار کے حوالے سے آگاہ کیا۔ وزیرِ اعظم نےان کی امدادی کوششوں میں بہتر کردار کو سراہتے ہوئے انہیں ہدایت کی کہ وہ ترک حکومت اور پاکستانی اداروں کے درمیاں روابط کو مزید مضبوط کریں۔ اجلاس کو بتایا گیا کہ پاکستان کی طرف سے نہ صرف امدادی سامان اور ریسکیو ٹیمیں اس وقت ترکیہ پہنچ چکی ہیں اور امدادی کاروائیوں میں ہاتھ بٹا رہی ہیں جبکہ پی آئی اے مسلسل پروازوں سے لاہور اور اسلام آباد سے ترکیہ اور شام سامان کی ترسیل یقینی بنا رہا ہے۔ مزید برآں آئندہ چند دن میں ٹرکوں کے قافلے بذریعہ ایران امدادی سامان لے کر ترکیہ اور روانہ ہوں گے۔

اجلاس کو مزید بتایا گیا کہ زلزلہ زدگان کی امداد کیلئے ملک گیر آگاہی مہم جاری ہے۔وزیرِ اعظم کے زلزلہ زدگان کیلئے قائم کردہ فنڈ کے اکاؤنٹ نمبر G-12166 میں امدادی رقوم جمع کروائی جاسکتی ہیں جبکہ دیگر امدادی سامان کا عطیہ این ڈی ایم اے کے کسی بھی کلیکشن سینٹر میں جمع کروایا جا سکتا ہے۔ اس سلسلے میں این ڈی ایم اے ملک بھر میں 13 کلیکشن سینٹرز بنا چکی ہے جبکہ وزیرِ اعظم کی ہدایت پر ان کلیکشن سینٹرز کو ہر ضلع میں توسیع دی جا رہی ہے۔ درکار امدادی سامان میں سرد موسم کی مناسبت سے خیمے، گرم کپڑے، کمبل، موزے، بچوں کی تیار خوارک وغیرہ شامل ہیں۔