بلومبرگ کی تازہ ترین خبروں کے مطابق ترکیہ میں 24 سال کے طویل عرصے کے بعد پہلی بار اتنی طویل مدت کے دوران مسلسل ترک لیرے کی قدرو قیمت میں کمی آتی جا رہی ہے اور یہ سلسلہ ابھی بھی جاری ہے۔
بلومبرگ کے مطابق گزشتہ ہفتے ڈالر کے مقابلے میں ترک لیرے میں 11 فیصد کی کمی دیکھی گئی ہے تو اس ہفتے اس میں ایک فیصد مزید کمی واقع ہوئی ہے۔
بلومبرگ کے مطابق حکومت 18 ماہ میں 200 بلین ڈالر صرف ترک لیرے کو مستحکم رکھنے کے لیے خرچ کرچکی ہے لیکن اتنی بڑی رقم آگ میں جھونکنے کے باوحود (ضائع کیے جانے کے باوجود ) ترک لیرا اپنی ساکھ برقرار نہیں رکھ سکا ہے۔ لیکن اس کے باوجود ترک عوام صدر ایردوان اور ان کی پالیسیوں پر مکمل بھروسہ کیے ہوئے ہیں۔
ترک عوام کا صدر ایردوان پر آنکھیں بند کرکے اعتماد کرنا
کیا وجہ ہے کے عوام کی بہت بڑی تعداد نے ملک کی خستہ اقتصادی صورتِ حال کے باوجود صدر ایردوان پر مکمل اعتماد جاری رکھا ہوا ہے۔
میں اس سے قبل کے پروگرام میں بھی کہہ چکا ہوں کہ ڈیمو کریسی کی تاریخ میں دنیا میں کوئی ایسا لیڈر موجود نہیں ہے جس نےڈیمو کریسی کے اصولوں کے مطابق 21 برس تک مسلسل عوام کے دلوں پر حکمرانی کی ہو۔ یہ اعزاز صرف صدر ایردوان ہی کو حاصل ہے اور انہوں نے 2023 کے صدارتی انتخابات بھی جیتتے ہوئے گینیس بک آف ورلڈ ریکارڈ میں اپنا نام درج کروالیا ہے۔
صدر رجب طیب ایردوان نے یہ کامیابی دراصل اپنی ماضی کی کامیابیوں کے بل بوتے پر حاصل کی ہے اور عوام کو اس بات کا احساس ہے کہ صدر ایردوان نے اس سے قبل جو وعدے کیے ہیں ان کو پورا کیا ہےکیونکہ ترک سیاستدان ایردوان سے قبل ہمیشہ بڑے بلند و بانگ دعوے کیا کرتے تھے۔ مثلا تانسو چیلر نے انتخابات جیتنے کے لیے ہر ترک کو ایک گاڑی اور ایک مکان دینے کا وعدہ کیا تھا ، لیکن وہ کہتے ہیں ناہ وہ عدہ ہی کیا جو وفا ہو جائے۔ تو یہی سب کچھ ترک سیاستدانوں کا خاصہ تھا جسے ایردوان نے تبدیل کرکے رکھدیا۔
صدر ایردوان کی جسٹس اینڈ ڈولپمینٹ پارٹی 2002 میں برسر اقتدار آئی تو ملک کی اقتصادی صورتِ حال موجودہ صورتِ حال سے بہت سنگین تھی اور افراطِ زر کی شرح آسمان کی بلندیوں کو چھو رہی تھی یعنی تین ڈیجٹ190 فیصد کے لگ بھگ افراطِ زر موجود تھا ۔
2001 میں ترک لیرا ، لیراں لیراں ہوچکا تھا
کیا آپ جانتے ہیں 2001 میں ایک ڈالر میں کتنے لیرے تھے ؟ آپ سنیں گے تو حیران رہ جائیں گے۔ سن 2001 میں ترک لیرا، لیراں لیراں ہوچکا تھا اور ایک ڈالر کے مقابلے میں ترک لیرے کی قدرو قیمت ایک ملین دو لاکھ ترک لیرا تھی یعنی بوریوں میں ترک لیرے کو جمع کیا جاتا تھا۔
جی ہاں ۔ جب ایردوان نے اقتدار سنبھالا تو یہی صورتِ حال تھی اور اس صورتِ حال سے نکلنے ہی کے لیے عوام نے صدر ایردوان کو ووٹ دیے تھے۔ ایردوان نے ملک کے عوام کو اس مشکل سے نکالنے کے لیے ملک کی اقتصادیات کی جانب خصوصی توجہ دی اور ملک کو ترقی کی راہ پر گامزن کردیا اور غیر ملکی سرمایہ کاری کے لیے کھولے جانے والے دروازوں نے ترکیہ کی ترقی میں بڑا اہم کردارا دا جبکہ ان سے قبل ترکیہ میں کبھی بھی غیر ملکی سرمایہ کاری صفر اعشاریہ چار فیصد یا صفر اعشاریہ پانچ فیصد سے نہ بڑھی تھی لیکن صدایردوان کے اس اقدام سے ترکیہ کی تاریخ میں پہلی بار غیر ملکی سرمایہ کاری پانچ فیصد کی حد کو بھی عبور کرگئی۔
تاریخ ساز فیصلہ
31 دسمبر 2004 کو ایردوان کابینہ نے ترکیہ تاریخ کا منفرد فیصلہ کیا اور ترک لیرا کی مسلسل گرتی ہوئی ساکھ کو بحال کرنے کے لیے ترک لیرا سے 6 صفر ہٹا دیے گئے اور نیو ٹرکش لیرا کے اجراء سے ایک ڈالر کے مقابلے 1٫34 لیرا کی نئی قدرو قیمت مقرر کردی گئی۔
اس دوران ترکیہ میں متعارف کردہ اصلاحات نے یورپی یونین پرمثبت اثرات مرتب کیے اور ترکیہ نے 3 اکتوبر 2005 کو یورپی یونین کی مستقل رکنیت کے لیے رجوع کیا۔ ترکیہ کا یورپی یونین کی مستقل رکنیت کے لیے رجوع کرنا ہی تھا کہ ترک کرنسی نیو ٹرکش لیرا کی قدرو و قیمت میں بے حد اضافہ ہوگیا اور ایک ایسا وقت بھی جب ایک ترک لیرا ایک ڈالر کے قریب پہنچ گیا جس پر ترک مصنوعات فرموں نے ارزاں نرخوں پر مال تیار کرنے کے لیے دوسرے ممالک کا رخ کیا۔ (یہ بھی ایردوان ہی کا دور تھا) جس پر حکومت کومالی پالیسی میں نرمی اختیار کرنا پڑی۔ یہ ترکیہ کااقتصادی لحاظ سے سنہری دور تھا اور یہ سب کچھ ایردوان ہی کی وجہ سے ممکن ہو ا تھا اور یہی وجہ ہے کہ ترک عوام آج بھی آنکھیں بند صدر ایردوان پر بھروسہ کررہے ہیں۔
ترک لیرا کی قدرو قیمت میں کمی کا آغاز
اور پھر 2008 میں عالمی اقتصادی بحران برپا ہوا لیکن اس عالمی بحران کے ترکیہ پر کوئی زیادہ منفی اثرات مرتب نہ ہوئے بلکہ صدر ایردوان کے بقول عالمی اقتصادی بحران، ترکیہ کو چھو کر گزرگیا۔
تاہم ترکیہ میں فلاٹنگ کرنسی سسٹم پر عمل درآمد کے نتیجے میں 2013 میں ترک لیرے کی قدرو قیمت میں کمی دیکھی گئی اور ایک ڈالر دو لیرے کے مساوی ہوگیا۔
اور پھر 7 جون 2015 میں ترکیہ میں عام انتخابات سے قبل سیاسی کشیدگی میں اضافے کے نتیجے میں ترک لیرے کی قدور قیمت میں مسلسل کمی ہوتی چلی گئی اور اگست 2015 میں ایک ڈالر تین لیروں کے مساوی ہوگیا۔
2017 میں ایک ڈالر میں چار لیرے اور 24 جون 2018 کے صدارتی اور پارلیمانی انتخابات میں پانچ لیرے ایک ڈالر کے مساوی ہوگئے۔
دیکھا جائے تو ترک لیرے کی قدرو قیمت میں چند سال تک کوئی زیادہ کمی نہ دیکھی گئی تاہم نومبر 2020 میں ایک ڈالر 8٫58 کی سطح پر پہنچ گیا اور پھر اسٹیٹ بینک کے گورنر کو تبدیل کیے جان کے نتیجے میں ترک لیرا نے ایسی جمپ لگائی کہ یہ ایک ڈالر کے مقابلے میں 13٫50 لیرے تک گرگیا اور پھر دو دسمبر 2021 کو وزیر خزانہ کی تبدیلی نے رہی سہی کسر بھی پوری کردی مسلسل ترک لیرے کی قدور قیمت میں کمی اور عوام کے ڈالر خریدنے کی دوڑ نے حکومت کو ڈالر کی خرید کو روکنے کے لیے بند باندھنا پڑا اور اس کے لیے حکومت نے currency protection سسٹم یعنی کرنسی تحفظاتی نظام جسے ترکی زبان میں Kur koruma کہا جاتا ہے نظام متعارف کروایا۔ (اس نظام پر بعد میں کسی پروگرام میں روشنی ڈالوں گا )
ترکیہ کی تاریخ میں متعارف کروائے جانے والے اس نئے نظام سے اگرچہ فوری طور عوام کے ڈالر خریدنےکی دوڑ پر تو قابو پالیاگیا لیکن اس نظام کی بدولت ترکیہ کی تار یخ میں بڑے منفی اثرات مرتب ہوئے ہیں اور حکومت کو اس سلسلے میں فرق کو اپنی جیب سے دینا پڑرہا ہےجس کے منفی اثرات ترک خزانے پر مرتب ہو رہے ہیں۔