انقرہ سفارتخانہ پاکستان کےلان میں پاکستان مینگو فیسٹویل میں بڑی تعداد میں ممتاز ترک شخصیات کی شرکت، کنگ آف فروٹ مینگو کی لذت کےچرچے

سفیرِ پاکستان ڈاکٹر یوسف جنید کا تمام شرکاء کا فرداً فرداً گرمجوشی سے استقبال

انقرہ میں پاکستان  کے  سفارتخانے میں پاکستان روائتی  مینگو فیسٹیول کا انعقاد کیا گیا جس میں شریک مہمان دنیا  بھر میں مشہور پاکستانی مینگوز کے ذائقے سے لطف اندوز ہوئے۔

مینگو فیسٹویل کی اس تقریب کے موقع پر ترکیہ میں پاکستان کے سفیر ڈاکٹر  یوسف جنید  نے  تمام شرکاء کا فرداً  فرداً خیر مقدم کیا۔

فیسٹیول میں پاکستان ترک پارلیمانی فرینڈشپ گروپ کے چیئرمین  اور غازی انتیپ سے رکنِ پارلیمنٹ  علی  شاہین ، وان سے رکنِ پارلیمنٹ  برہان قایا ترک ، سابق وزیر زراعت مہمت مہدی ایکر، گورنر انقرہ واسپ شاہین ، سفارتکاروں ، تاجروں، میڈیا اور  دیگر ممتاز ترک شخصیات  نے بڑی تعداد میں شرکت کی۔

اس موقع پر سفیر پاکستان ڈاکٹر یوسف جنید  نے حاضرین سے خطاب کرتے ہوئے کہا کہ آپ سب لوگ مینگو کے کنگ آف فروٹ ہونے کی حقیقت سے بخوبی آگاہ ہوں گے اور آج آپ خود مینگوز کی لذت سے آشنا بھی ہوئے ہیں۔ موسم کے لحاظ سے سفید چونسا کو اس مینگو فیسٹیول میں پیش کیا گیا ہے۔ پاکستان کے مینگوز دنیا میں اپنی مثال آپ ہیں جن کا منفرد ذائقہ اور خوشبو اسے دوسرے پھلوں سے ممتاز بناتی ہے اور اسی لیے اسے ہم ’’پھلوں کا بادشاہ‘‘ کہتے ہیں۔ پاکستان مینگو پیدا کرنے والا پانچواں بڑا اور ایکسپورٹ کرنے والا  ساتوں  بڑا ملک ہے۔ انہوں نے مزید کہا کہ پاکستان میں اعلیٰ قسم کے آموں کی 200 سے زائد اقسام پیدا کی جاتی ہیں جن میں سندھڑی، انور راٹول، لنگڑا، مالدیو، دوسہری، فجری اور دیگر شامل ہیں۔

فیسٹیول میں مختلف اقسام کے مینگوز کو بڑے خوب صورت انداز میں سجا کر پیش کیا گیاتھا، مینگوز کی مختلف اقسام کی ڈشز بھی تیار کی گئی تھیں جس میں مینگو  کھیر، مینگو جوس،  مینگو ملک شیک ، مینگو آئس کریم   کے علاوہ  مینگو   چکن کری، مینگو  سلاد،  مینگو اچار روایتی مکئی کی روٹی  اور مینگو  پنیر پالک    کی لذت نے پاکستانی کھانوں کو گرویدہ بنادیا۔