پاکستان ترکیہ کی جان ہے، اسلام آباد ترکیہ کی سرحدی چوکی ہے ، انقرہ کی سیکورٹی اسلام سے شروع ہوتی ہے، اسلام آباد ہماری ریڈ لائین ہے

ہم کبھی پاکستانیوں کی جنگِ آزادی پر ترکیہ کی مدد کو فراموش نہیں کرسکتے

ترکیہ گرینڈ نیشنل اسمبلی   میں غازی انتیپ  سے آق پارٹی کے رکنِ پارلیمنٹ اور ترکیہ-پاکستان بین الپارلیمانی دوستی گروپ کے چیئرمین  علی  شاہین نے  ترکیہ کے  ٹی وی نٹ کو بیان دیتے ہوئے کہا ہے کہ پاکستان ہمارے لیے بڑی اہمیت کا حامل ملک ہے ، پاکستان کے باشندوں نے جس طرح ترکیہ کی جنگِ آزادی کے موقع پر  ترکیہ کی حمایت  اور مدد کی تھی  اس کو بھلا کون فراموش کرسکتا ہے۔

انہوں نے  پاکستان اور بھارت کے درمیان جاری کشیدگی کے بارے میں کہا کہ اس کی بنیادی وجہ  مسئلہ کشمیر ہے  جب تک مسئلہ کشمیر کو حل نہیں کرلیا جاتا  پاکستان اور بھارت کے درمیان کشیدگی جاری رہے گی۔

انہوں مسئلہ کشمیر کی اپنے ترک ناظرین کو وضاحت دیتے ہوئے کہا کہ  جس طرح ترکیہ اور  یونان کے درمیان مسئلہ قبرص جاری ہے اور  یہ جزیرہ دو حصوں میں تقسیم ہو چکا ہے بالکل اسی طرح کشمیر  دو حصوں میں  تقسیم ہوچکا ہے حالانکہ پورے کشمیر میں  مسلمان  اکثریت میں آباد ہیں  اور اس مسئلے کو   کشمیر  کو بھی  کشمیری عوام  کی خواہشات کے مطابق ہی حل کیا جانا چاہیے۔

انہوں نے کہا کہ  ترکیہ اس مسئلے کو  اقوام متحدہ کی  قرار دادوں  کے مطابق حل کرنے کی حمایت کرتا ہے ، انہوں نے کہا کہ اس مسئلے کو تین طریقوں سے  حل کیا جاسکتا  ہے ۔ پہلا طریقہ  اقوام متحدہ کی قراردادوں  کے مطابق ہے  جبکہ دوسرا طریقہ پُر امن مذکرات  کے ذریعے اور  تیسرا طریقہ   کشمیر کے عوام کی رائے کا احترام کرتے ہوئے کیا جاسکتا ہے لیکن بدقسمتی سے بھارت اچھی طرح جانتا ہے کشمیری عوام  پاکستان  کے حق میں فیصلہ سنائیں گے اس لیے وہ  اس مسئلے کو حل کرنے کے لیے اقوام متحدہ کی قرادادوں  پر عمل درآمد کرنے سے گریز کررہا ہے اور وہ اب بھی علاقے میں استصوابِ رائے کروانے سے گریز کررہا ہے کیونکہ اسے معلوم ہے کہ علاقے میں آباد 80 فیصد کشمیری مسلمان یا آزادی  یا پھر پاکستان کے ساتھ الحاق  کے حق میں ووٹ دیں گے۔

انہوں نے موجودہ صورتِ حال پر روشنی دالتے ہوئے کہا کہ مو جودہ  صورتِ حال  ماضی کی  کشمیر کے موضوع  سے متعلق ہونے والی جنگوں سے مختلف  ہے۔ انہوں نے کہا کہ اب اس جنگ کو بیرونی عناصر ہوا دے  رہے ہیں ۔

 علی شاہین نے اس موقع پر  اینکر کی جانب سے پوچھے جوانے والے  سوال “ترکیہ کیونکر پاکستان  کی حمایت کررہا ” کا جواب دیتے ہوئے کہا کہ  پاکستان ترکیہ کی جان ہے۔  ترکیہ میں پیدا ہونے والا بچہ پاکستان کی محبت  لے کے پیدا ہوتا ہے اسی طرح  پاکستان میں پیدا ہونے والا بچہ ترکیہ کی محبت سے سرشار ہوتا ہے۔ برصغیر پاکو ہند میں ترکوں کی حکومت قائم رہی ہے اس طرح پاکستانی ہمارے خون کا حصہ ہیں ہمارے رشتہ دار ہیں ۔ظہیر الدین بابر سے لے کر آخری مغل حکمران  ترک النسل ہیں ، اسی لیے پاکستان ہمارے لیے بڑی اہمیت کا حامل ہے ۔ پاکستان  ہماری جان ہے  ، پاکستان ہمارے وجود کا حصہ ہے۔  پاکستان پر ہماری جان قربان ہے۔  

انہوں نے کہا  بھارت اس وقت  اسرائیل  کی طرح کی پالیسی اختیار کرتے ہوئے خطے سے کشمیریوں کو  ختم کرنے  کی  کوششوں کا آغاز کرچکا ہے ۔ 

انہوں نے کہا کہ اسلام آباد ترکیہ  کی سرحدی چوکی ہے اور انقرہ کی سیکیورٹی اسلام آباد سے شروع ہوتی ہےیعنی  اسلام آباد ہماری ریڈ لائن ہے”