وزیرِاعظم شہباز شریف کی صدر رجب طیب ایردوان سے ملاقات ، پاکستان اور ترکیہ کے برادرانہ تعلقات میں نئی جہت
ترکیہ کے دو روزہ سرکاری دورے پر آئے ہوئے وزیرِاعظم پاکستان محمد شہباز شریف نے آج استنبول میں جمہوریہ ترکیہ کے صدر رجب طیب ایردوان سے ایک نہایت گرمجوش اور پُرخلوص ملاقات کی، جس میں پاکستان اور ترکیہ کے گہرے، تاریخی اور برادرانہ تعلقات کا بھرپور اعادہ کیا گیا۔ یہ تعلقات مشترکہ اقدار، باہمی احترام اور ترقی و خوشحالی کے ایک ہم آہنگ وژن پر استوار ہیں۔
اس سے قبل استنبول ہوائی اڈے پر ترکیہ کے قومی وزیر دفاع یشار گیولر نے وزیراعظم شہباز شریف کا سرکاری تقریب کے ساتھ استقبال کیا اور انہیں گارڈ آف آنر پیش کیا گیا۔
وزیراعظم شہباز شریف کے استنبول میں دولما باہچے محل کے صدارتی آفس میں صدر رجب طیب ایردوان نے شرفِ ملاقات بخشا ۔
صدر ایردوان نے ملاقات کے دوران کہا کہ وہ ترکیہ اور پاکستان کے تعلقات کو آگے بڑھانے اور تجارتی حجم کے 5 بلین ڈالر کے ہدف تک پہنچنے کے لیے اقدامات جاری رکھیں گے۔ صدر ایردوان نے کہا کہ انہوں نے مسئلہ فلسطین پر پاکستان کے اصولی موقف کو سراہا ہے اور ترکیہ جلد از جلد غزہ تک انسانی امداد پہنچانے کی کوششیں کر رہا ہے۔
وزیرِاعظم شہباز شریف، جو چیف آف آرمی اسٹاف فیلڈ مارشل سید عاصم منیر کے ہمراہ اس ملاقات میں شریک تھے، نے جنوبی ایشیا کی حالیہ پیش رفت کے تناظر میں پاکستان کے مؤقف کی غیر متزلزل حمایت پر ترک حکومت اور عوام کا دل کی گہرائیوں سے شکریہ ادا کیا۔ انہوں نے ترکیہ کی اصولی پالیسی اور ترک عوام کی طرف سے پاکستان کے ساتھ اظہارِ یکجہتی کو ایک عظیم حوصلہ افزائی اور مضبوطی کا ذریعہ قرار دیا۔
وزیرِاعظم نے “معرکۂ حق” اور “آپریشن بنیان مرصوص” میں مسلح افواجِ پاکستان کے عزم، قربانی اور قوم کی بے مثال حب الوطنی کو بھرپور انداز میں خراجِ تحسین پیش کرتے ہوئے کہا کہ اس قومی جذبے نے وطنِ عزیز کے دفاع میں شاندار کامیابی کو یقینی بنایا۔
معاشی اشتراک اور سرمایہ کاری کے فروغ پر زور دیتے ہوئے وزیرِاعظم نے زور دیا کہ دونوں ممالک مشترکہ منصوبہ جات کے ذریعے قابلِ قدر پیش رفت کر سکتے ہیں۔ خاص طور پر قابلِ تجدید توانائی، انفارمیشن ٹیکنالوجی، دفاعی پیداوار، انفراسٹرکچر کی ترقی اور زراعت جیسے شعبے باہمی تعاون کے وسیع امکانات سے بھرپور ہیں۔
دونوں رہنماؤں نے دوطرفہ تعلقات کے تمام پہلوؤں کا جامع جائزہ لیا اور اس عزم کا اعادہ کیا کہ پاکستان اور ترکیہ کے اسٹریٹجک شراکت داری کو نئی بلندیوں تک پہنچایا جائے گا۔ انہوں نے 13 فروری 2025 کو اسلام آباد میں منعقد ہونے والے ساتویں اعلیٰ سطحی تزویراتی تعاون کونسل (HLSCC) کے اجلاس میں طے پانے والے فیصلوں پر عمل درآمد کا بھی جائزہ لیا، اور سالانہ پانچ ارب ڈالر کی دوطرفہ تجارت کے ہدف کو جلد از جلد حاصل کرنے پر اتفاق کیا۔
علاقائی اور عالمی امور پر گفتگو کے دوران وزیرِاعظم شہباز شریف اور صدر ایردوان نے ایک دوسرے کے بنیادی قومی مفادات کی غیر مشروط حمایت کا اعادہ کیا، بالخصوص جموں و کشمیر کے دیرینہ مسئلے پر ترکیہ کے اصولی مؤقف پر پاکستان نے بھرپور شکریہ ادا کیا۔ دونوں رہنماؤں نے غزہ میں جاری سنگین انسانی بحران پر گہری تشویش کا اظہار کرتے ہوئے فوری جنگ بندی اور فلسطینی عوام تک بلاروک ٹوک انسانی امداد کی فراہمی کا مطالبہ کیا۔
ملاقات کا اختتام اس پختہ عزم کے ساتھ ہوا کہ پاکستان اور ترکیہ کے مابین ہمہ جہتی تعاون کو مزید وسعت دی جائے گی اور دونوں ممالک علاقائی امن، پائیدار ترقی اور اپنی اقوام کی مشترکہ خوشحالی کے لیے قریبی اشتراک عمل جاری رکھیں گے۔
پاکستانی وفد میں نائب وزیرِاعظم محمد اسحاق ڈار، وفاقی وزیرِ اطلاعات و نشریات عطااللہ تارڑ، وزیراعظم کے معاون خصوصی سید طارق فاطمی اور پاکستان کے سفیر برائے ترکی ڈاکٹر یوسف جُنید بھی شامل تھے۔
صدرِ ترکیہ رجب طیب ایردوان نے وزیرِاعظم شہباز شریف اور اُن کے ہمراہ آئے ہوئے وفد کے اعزاز میں ایک پُرتکلف عشائیے کا بھی اہتمام کیا۔