ترکیہ کے روزنامہ “ترکیہ ” کی تازہ ترین خبر کے مطابق (آر ایس ایس) کے رہنما اندریش کمار نے مقبوضہ کشمیر کے دورے کے دوران پاکستان، چین اور ترکیہ کو کھلے عام للکارا اور دھمکیاں دی ہیں۔ بھارت ایک بار پھر اپنی انتہا پسندانہ سوچ اور جارحانہ عزائم کے ساتھ دنیا کے امن کو خطرے میں ڈال رہا ہے۔ راشٹریہ سویم سیوک سنگھ (آر ایس ایس) کے رہنما اندریش کمار نے مقبوضہ کشمیر کے دورے کے دوران پاکستان، چین اور ترکیہ کو کھلے عام للکارا اور دھمکیاں دی ہیں ۔ ان کے یہ بیانات نہ صرف پاکستان اور ترکیہ کے عوام کے خلاف اشتعال انگیزی ہیں بلکہ خطے میں امن کو تہس نہس کرنے کی ایک کھلی سازش بھی ہیں۔
“ترکیہ کو سبق سکھانے کے لیے ڈرون ز کو نشانہ بنایا جائے گا “
اندریش کمار نے اپنی ہرزہ سرائی میں دعویٰ کیا کہ پہلگام حملے کے بعد پاکستان پر ’سندور آپریشن‘ کیا گیا، جس میں فضائی اڈے نشانہ بنائے گئے۔ ترکیہ کو سبق سکھانے کے لیےان کے ڈرونز کو نشانہ بنایا گیا اور اگر انقرہ مخالفت جاری رکھے گا تو اسے بھی براہِ راست نشانہ بنایا جائے گا۔
یہ زہر آلود الفاظ دراصل بھارتی انتہا پسندوں کی بوکھلاہٹ کا ثبوت ہیں، جو پاکستان اور ترکیہ کی بڑھتی ہوئی طاقت اور اسلامی دنیا میں ان کے اثرورسوخ سے خائف ہیں۔
“دنیا کے سامنے بھارت کونئی طاقت کے طور پر پیش کرنا ہے “
اندریش کمار نے بڑھک مارتے ہوئے کہا کہ بھارت کو یہ ثابت کرنا تھا کہ وہ ایک نئی اور آزاد طاقت ہے۔ تجزیہ کاروں کے مطابق یہ بیان صرف بھارت کی احمقانہ شیخی اور بے جا غرور ہے، جو حقیقت سے کوسوں دور ہے۔ پاکستان اور ترکیہ جیسے مضبوط ملکوں کو ڈرون سے دھمکانا دراصل بھارت کی اپنی کمزوری کو چھپانے کی کوشش ہے۔
“کشمیر پر ہٹ دھرمی “
کشمیر کے بارے میں بھی اندریش کمار نے اپنی پرانی ہٹ دھرمی دہرائی اور کہا:
“کشمیر ہندوستان کا لازمی جزو ہے، مسلمان اور ہندو الگ الگ قوم نہیں بلکہ ایک ہیں۔ شاید ایک دن ہم لاہور میں جمع ہوں اور یہ اجتماع وہیں منعقد کریں۔“
یہ الفاظ بھارتی قیادت کے توسیع پسندانہ عزائم کو بے نقاب کرتے ہیں۔ دہلی سرکار کے نزدیک نہ صرف کشمیر بلکہ پاکستان کے وجود کو بھی نشانہ بنانا ایک دیرینہ خواب ہے۔
“کانگریس نے آزادی نہیں، تقسیم دی”
اپنی تقریر میں کمار نے ماضی کی سیاست پر بھی وار کیا اورکہا کہ
“ہندوستان کو آزادی کانگریس نے نہیں دی بلکہ تقسیم دی۔ 14 اگست کو پاکستان وجود میں آیا اور جو بچا اسے ہندوستان کہہ دیا گیا، یہی ان کی دی ہوئی آزادی ہے۔“
یہ بیان ظاہر کرتا ہے کہ بھارتی انتہا پسند آج بھی پاکستان کے وجود کو تسلیم کرنے کے لیے تیار نہیں اور اپنی تاریخ کو مسخ کر کے نئی نسل کو گمراہ کر رہے ہیں۔
” بھارت خطے کو جنگ کی آگ میں جھونکنے پر تلا ہوا ہے”
سفارتی ماہرین کا کہنا ہے کہ اندریش کمار جیسے انتہا پسند بیانات دراصل مودی حکومت کی پالیسیوں کی عکاسی کرتے ہیں۔ بھارت ایک طرف پاکستان کی سرحدوں پر شرپسندی میں مصروف ہے، تو دوسری جانب ترکیہ جیسے برادر اسلامی ملک کو کھلے عام دھمکیاں دے رہا ہے۔ یہ رویہ خطے میں امن و استحکام کو شدید خطرات سے دوچار کر رہا ہے۔
پاکستان اور ترکیہ کے عوام ان گیڈر بھبکیوں سے مرعوب نہیں ہوں گے۔ دونوں ممالک نے بارہا ثابت کیا ہے کہ وہ اپنی خودمختاری اور وقار کے تحفظ کے لیے ہر قربانی دینے کو تیار ہیں۔ بھارت کی یہ گیدڑ بھبکیاں اس کی اندرونی ناکامیوں کو چھپانے کی ناکام کوشش کے سوا کچھ نہیں۔