رپورٹ: ڈاکٹر فرقان حمید
دنیا بدل رہی ہے۔ طاقت کے مراکز تبدیل ہو رہے ہیں۔ جو قومیں ٹیکنالوجی اور دفاع میں خود کفیل ہیں وہی مستقبل کی فاتح ہوں گی۔ ایسے وقت میں ترکیہ نے تاریخ رقم کرتے ہوئے اپنی مقامی فضائی دفاعی ڈھال اسٹیل ڈومSteel Dome-متعارف کروا دیا ہے۔ یہ کوئی معمولی کامیابی نہیں بلکہ ایک ایسا تاریخی موڑ ہے جس نے ترکیہ کو دفاعی صنعت کی بلند چوٹیوں پر پہنچا دیا ہے۔
ترکیہ: دوستوں کے لیے ڈھال، دشمنوں کے لیے خوف
صدر رجب طیب ایردوان نے افتتاحی تقریب سے اپنے تاریخی خطاب میں کہا:
سسٹمز آف سسٹم ، یعنی نظاموں کا نظام اسٹیل ڈومSteel Dome- ہماری فضائی دفاعی صلاحیت کو ایک بالکل مختلف درجے پر لے جائے گا۔ یہ نظام دوستوں کو اعتماد اور دشمنوں کو خوف دلائے گا۔
یہ الفاظ صرف ایک اعلان نہیں تھے بلکہ ایک عہد تھے۔ ترکیہ نے دنیا کو بتا دیا ہے کہ اب وہ اپنی سلامتی کا دارومدار کسی بیرونی قوت پر نہیں چھوڑے گا۔
عالمِ اسلام کا پہلا جبکہ دنیا کے سر فہرست ممالک کی صف میں شامل
اسٹیل ڈومSteel Dome- کی تیاری سے ترکیہ نے ایک ایسا کارنامہ سرانجام دیا ہے جو پوری مسلم دنیا کے لیے باعثِ فخر ہے۔ ترکیہ وہ پہلا ملک ہے جس نے عالمِ اسلام میں ایک مکمل اور مربوط فضائی دفاعی ڈھال تیار کی ہے۔ آج دنیا کے صرف چند گنے چنے ممالک کے پاس یہ صلاحیت موجود ہے، اور ترکیہ اب ان گنے چنے ممالک کی صف میں شامل ہو چکا ہے۔
یہ کامیابی صرف ترکیہ کی نہیں بلکہ پوری امتِ مسلمہ کے لیے ایک امید کا چراغ ہے۔ آج ہر مسلمان یہ کہہ سکتا ہے کہ ایک اسلامی ملک نے دشمن کے طیاروں، میزائلوں اور ڈرونز کے مقابلے میں فولادی دیوار کھڑی کر دی ہے۔
قومی وقار میں اضافہ
افتتاحی تقریب میں اعلان کیا گیا کہ 460 ملین ڈالر مالیت کے اسٹیل ڈوم سسٹم فوج کے حوالے کیے جا رہے ہیں، جن میں 47 گاڑیاں اور 3 عدد حصار درمیانی فاصلے کے فضائی دفاعی نظام شامل ہیں۔ یہ لمحہ ترکیہ کے وقار میں ایک نئے باب کا اضافہ ہے۔ اب ترکیہ اپنے ہر دشمن کو یہ پیغام دے رہا ہے۔
اول بے Oğul Beyٹیکنالوجی مرکزکا قیام
ترکیہ صرف آج کی نہیں بلکہ آنے والی نصف صدی کی بھی تیاری کر رہا ہے۔ 1.5 ارب ڈالر کی لاگت سے تعمیر ہونے والا اول بے ٹیکنالوجی مرکز جمہوریہ ترکیہ کی دفاعی صنعت کی تاریخ کی سب سے بڑی سرمایہ کاری ہے۔
یہ مرکز 6500 ایکڑ پر محیط ہوگا، ASELSAN کی پیداواری صلاحیت کو دوگنا کرے گا اور چار ہزار سے زائد نوجوانوں کو روزگار فراہم کرے گا۔ یہ دراصل ترکیہ کے اس یقین کا مظہر ہے کہ آنے والے پچاس برسوں میں وہ نہ صرف اپنی ضروریات پوری کرے گا بلکہ دنیا کو اپنی ٹیکنالوجی فراہم کرنے والا رہنما بھی ہوگا۔
خود انحصاری سے عالمی قیادت کی راہ پر
صدر ایردوان نے بڑے فخر سے کہاکہ گزشتہ نصف صدی میں ایک چھوٹی سی چنگاری آج ایک عظیم مشعل میں بدل چکی ہے۔ آج ہم اپنی فوجی ضروریات کا 80 فیصد مقامی وسائل سے پورا کر رہے ہیں۔ ترکیہ اب صرف اپنی ضرورتیں پوری کرنے والا ملک نہیں رہا بلکہ دنیا کو اپنی ٹیکنالوجی فراہم کرنے کی صلاحیت رکھنے والے ملک کی حیثیت اختیار کرچکا ہے۔
ایک ناقابلِ تسخیر پیغام
“اسٹیل ڈومSteel Dome-صرف ایک دفاعی نظام نہیں بلکہ ایک نظریہ ہے، ایک اعلان ہے اور ایک ناقابلِ تسخیر پیغام ہے۔
- ترکیہ اب دوستوں کے لیے ایک مضبوط ڈھال ہے۔
- دشمنوں کے لیے ایک مستقل خوف ہے۔
- اور دنیا کے لیے ایک نئی حقیقت ہے۔
ترکیہ کی یہ پیش رفت یہ ثابت کر رہی ہے کہ اب اسے روکنے والا کوئی نہیں۔ آج کا ترکیہ نہ صرف اپنے عوام کا بلکہ پوری امتِ مسلمہ کا فخر ہے۔ترکیہ نے یہ ثابت کردیا ہے کہ مستقبل، اُن اقوام کا ہے جو اپنی قوتِ باوز پر بھروسہ کرتی ہیں اور ترکیہ اس نظرے پر عمل درآمد کرتے ہوئے بہت آگے نکل چکا ہے جہاں اسے روکنا ممکن نہیں ۔