رپورٹ : ڈاکٹر فرقان حمید
صدر ایردوان کا دوحہ میں امت مسلمہ کو اتحاد و مزاحمت کا پیغام
صدر رجب طیب ایردوان نے قطر کے دارالحکومت دوحہ میں منعقدہ اسلامی تعاون تنظیم اور عرب لیگ کے مشترکہ ہنگامی اجلاس سے خطاب کرتے ہوئے کہا کہ ‘اسلامی دنیا کو اسرائیل کے خلاف سفارتی کوششوں کو مزید تیز کرنا ہوگا اور اسرائیلی حکام کو انصاف کے کٹہرے میں لانے کے لیے بین الاقوامی قانونی ذرائع کو بروئے کار لانا ہوگا۔’
انہوں نے کہا کہ حالیہ دنوں میں بعض اسرائیلی سیاست دان بار بار ‘گریٹر اسرائیل’کے خواب کو دہرا رہے ہیں، اور اسرائیل کے خطے میں توسیع پسندانہ اقدامات اس خواب کی عینی مثال ہیں۔ صدر ایردوان کے مطابق ‘امت مسلمہ، اللہ کے فضل سے، اسرائیل کی ان جارحانہ عزائم کو ناکام بنانے کی صلاحیت اور ہمت رکھتی ہے۔’
اسرائیل کی غنڈہ گردی نئی سطح پر
ایردوان نے کہا کہ 7 اکتوبر 2023 سے غزہ میں جاری قتلِ عام نے اسرائیل کی درندگی کو بے نقاب کر دیا ہے۔ لبنان، یمن، ایران اور شام پر حملے، تیونس کے ساحل پر شہری جہازوں کو نشانہ بنانا اور منتخب سیاسی رہنماؤں پر قاتلانہ حملے، اس کی شدت پسندی کے چند مظاہر ہیں۔ انہوں نے کہا’اب قطر جیسے ثالث ملک پر حملہ کر کے اسرائیل نے اپنی غنڈہ گردی کو ایک نئی سطح پر پہنچا دیا ہے۔’
انہوں نے اجلاس کی میزبانی پر امیرِ قطر شیخ تمیم بن حمد الثانی کا شکریہ ادا کرتے ہوئے شہید ہونے والے فلسطینیوں اور قطری پولیس اہلکاروں کے لیے دعائے مغفرت کی۔
ہم اسرائیل کو روکنے کی بھرپور صلاحیت رکھتے ہیں
صدر ایردوان نے کہا کہ’ نتن یاہو حکومت کا اصل مقصد فلسطینی نسل کشی کو جاری رکھتے ہوئے پورے خطے کو عدم استحکام سے دوچار کرنا ہے۔ ہمارے سامنے ایک ایسا دہشت گرد ذہن ہے جو خون اور انتشار سے جیتا ہے اور بین الاقوامی قوانین کو کھلے عام روندتا ہے۔’
انہوں نے زور دیا کہ امت مسلمہ کو اس چیلنج کا مقابلہ کرنے کے لیے متحد ہونا ہوگا اور اسرائیل کو سخت سفارتی و معاشی دباؤ میں لانا ہوگا۔ ایردوان نے کہا کہ ترکیہ نے گزشتہ ڈیڑھ سال سے اسرائیل کے ساتھ تمام تجارتی تعلقات معطل کر رکھے ہیں جس کی مالیت 9.5 ارب ڈالر سالانہ تھی۔
دفاعی تعاون کی پیشکش
صدر ایردوان نے کہا کہ ‘ترکیہ اپنی دفاعی صنعت میں حاصل کردہ کامیابیاں اور تجربات برادر ممالک کے ساتھ بانٹنے کے لیے تیار ہے۔ انہوں نے زور دیا کہ ’’اب وقت آگیا ہے کہ امت مسلمہ اپنی سلامتی کے لیے خود کفالت کی راہ اپنائے اور مشترکہ دفاعی و ترقیاتی منصوبوں کو آگے بڑھائے۔’
انہوں نے یہ بھی کہا کہ اسرائیل کے خلاف عالمی عدالت میں دائر کیے گئے مقدمے کی حمایت نہایت اہم ہے اور جب تک 1967 کی سرحدوں پر مشتمل، مشرقی القدس کو دارالحکومت بنانے والی آزاد فلسطینی ریاست قائم نہیں ہوتی، جدوجہد جاری رہے گی۔
دوحہ میں اہم ملاقاتیں
صدر ایردوان نے اجلاس کے دوران سعودی ولی عہد شہزادہ محمد بن سلمان سے بھی ملاقات کی۔ اجلاس میں ان کے ہمراہ وزیر خارجہ حقان فیدان، قومی خفیہ ادارے کے سربراہ ابراہیم قالن، صدارتی رابطہ ڈائریکٹر بُرہان الدین دوران اور دیگر اعلیٰ حکام شریک تھے۔
اجلاس کے اختتام پر صدر ایردوان اپنی اہلیہ امینے ایردوان اور وفد کے ہمراہ قطر سے وطن واپس روانہ ہوگئے۔