رپورٹ: ڈاکٹر فرقان حمید
صدر ایردوان کا اسرائیل کے وزیر اعظم نتَن یا ہو کو منہ توڑ جواب
جب اسرائیلی وزیرِ اعظم نتَن یا ہو نے تکبر بھرے لہجے میں یہ کہا کہ ’ اے ایردوان یہ القدس تمہارا نہیں ہمارا ہے ‘ تو اس کا جواب دنیا کے کسی اور لیڈر نے نہیں بلکہ ترکیہ کے مردِ آہن رجب طیب ایردوان نے دیا۔
وزارتِ خارجہ کی نئی عمارت کی سنگِ بنیاد تقریب سے صدائے ایردوان نے نہ صرف نتَن یا ہو کے گھمنڈ کو توڑا بلکہ پوری امتِ مسلمہ کو یہ پیغام دیا کہ ‘القدسِ شریف کو نامحرم ہاتھوں کی نجاست سے آلودہ کرنے کی ہرگز اجازت نہیں دی جائے گی۔’
ایردوان نے براہِ راست نتَن یا ہو کو مخاطب کرتے ہوئے کہا کہہٹلر کے دلدادہ ان کرداروں کا زخم شاید کبھی مندمل نہ ہو، مگر ہم مشرقی القدس پر اپنے حقوق سے ایک انچ بھی پیچھے نہیں ہٹیں گے۔’یہ الفاظ محض جذبات کا اظہار نہیں، بلکہ ایک عہد اور عزم کا اقرار ہیں۔
ترکیہ کا عزم، امت کی آواز
صدر ایردوان نے زور دے کر بتایا کہ ترکیہ کی خارجہ پالیسی کا محور امن، استحکام اور بھائی چارہ ہے۔ مگر اس امن پسندی کو کسی طور کمزوری سمجھا نہ جائے۔
انہوں نے کہا کہ ‘ہم کھوکھلے نعروں یا سستی سیاست کے پیچھے نہیں بھاگتے۔ ہماری نظریں اپنے اہداف پر جمی ہیں، چاہے وہ ہماری سرزمین کے اندر ہوں یا اس کے باہر۔ آج ترکیہ ایک ایسا ملک ہے جو اپنی حکمتِ عملی خود طے کرتا ہے اور اپنی قوتِ ارادی سے انہیں نافذ کرتا ہے۔ ہم شطرنج کے ماہر کھلاڑی کی مانند ہر چال سوچ سمجھ کر چلتے ہیں۔ کوئی بھی اشتعال ہمیں اپنے مقصد سے نہیں ہٹا سکتا۔ نہ ہم کسی سازش میں پھنسیں گے اور نہ ہی کسی کی دھمکیوں سے مرعوب ہوں گے۔ سفارت کاری کی زبان شائستگی ہے، مگر یہ بدتمیزی کے سامنے خاموش رہنے کی دلیل نہیں۔ ہم کل بھی ڈٹے تھے، آج بھی ڈٹے ہیں اور کل بھی ڈٹ کر کھڑے رہیں گے۔’
یہ بیان صرف ترک صدر کا نہیں بلکہ ایک پورے خطے کے دل کی آواز ہے ، ایک ایسی آواز جو خاموشی کو شرمندگی سمجھتی ہے اور حق کی ہر صدا کو بلند رکھتی ہے۔
غزہ کے لہو میں ڈوبی انسانیت
ایردوان نے دنیا کو یاد دلایا کہ غزہ کے معصوم بچے اسرائیلی بمباری کے نیچے زندگی کی جنگ لڑ رہے ہیں۔ انہوں نے دوٹوک الفاظ میں کہا کہ ‘ ہمیں کوئی طاقت ان مظلوم فلسطینیوں کی حمایت سے نہیں روک سکتی۔’
ان کے خطاب میں شام، یمن، لبنان اور قطر تک کی تکالیف کا ذکر تھا ۔ یہ جنگ محض فلسطینیوں کی نہیں بلکہ پوری امت کی آنکھوں کے سامنے ہو رہی انسانیت کی پامالی ہے۔ ان کے الفاظ کا وزن اس وقت محسوس ہوتا ہے جب وہ کہتے ہیں کہ ‘جو لوگ بچوں کے خون پر اپنے مستقبل کی عمارت کھڑی کرنا چاہتے ہیں، وہ تاریخ کے کوڑے دان میں پھینکے جائیں گے۔ ظلم کبھی دوام نہیں پاتا۔’
القدس: امتِ مسلمہ کی مشترکہ امانت
صدر ایردوان نے تاریخ کے آئینے میں جھانکتے ہوئے یاد دلایا کہ ترک قوم نے چار سو برس تک القدس کی خدمت کا شرف پایا۔ وہ عرصہ اسی بات کا ثبوت ہے کہ القدس کبھی کسی ایک قوم کی ملکیت نہیں رہا، بلکہ یہ سب مذاہب کے ماننے والوں کے لیے امن و آشتی کا گہوارہ رہا۔
انہوں نے کہاکہ ‘ہمارے دل کا ایک حصہ مکّہ ہے، دوسرا مدینہ، اور ان دونوں کے اوپر ایک نازک پردے کی مانند القدس سایہ فگن ہے۔ القدس پورے عالمِ اسلام کا مشترکہ سرمایہ، حافظہ اور میراث ہے۔ ہم اسے کسی نامحرم کے ناپاک ہاتھ میں نہیں جانے دیں گے۔’
یہ الفاظ دراصل دنیا بھر کے مسلمانوں کے جذبات کی زبان ہیں ۔ ایک ایسا عہد جسے زبانی جمع خرچ سمجھا نہیں جا سکتا۔
27 سالہ موقف اب بھی زندہ ہے
صدر ایردوان نے یاد دلایا کہ استنبول میئر شپ کے دورِ اقتدار میں 27 برس پہلے جو مؤقف اپنایا گیا تھا، آج بھی وہی مؤقف زندہ ہے اور بالکل اسی شدت کے ساتھ برقرار ہے۔ انہوں نے کہا کہ نتَن یا ہو جیسے لوگ شاید اس تاریخی ذمہ داری اور روایات سے ناخبر ہوں،
مگر ترکیہ اس موقف پر ڈٹا رہے گا، انہوں نے کہا کہ ‘ہم القدس پر اپنے حقوق سے ایک انچ بھی پیچھے نہیں ہٹیں گے۔ وہ چاہیں تو غصے میں بپھرتے رہیں، ہمارا عزم کم نہیں ہوگا۔’
مستقبل کا نقشہ: مشرقی القدس کے ساتھ آزاد فلسطین
خطاب کے آخر میں صدر ایردوان نے واضح طور پر اعلان کیا کہ ترکیہ پوری قوت کے ساتھ ایک آزاد، خودمختار فلسطینی ریاست کے قیام کے لیے سرگرم ہے، جس کا دارالحکومت مشرقی القدس ہوگا۔ ان کے الفاظ میں ‘یہ ہمارا سیاسی فریضہ ہے اور ایمان کا تقاضا بھی۔ 1967ء کی سرحدوں کی بنیاد پر قائم ہونے والی ایک آزاد فلسطینی ریاست کے لیے ہماری جدوجہد جاری رہے گی۔’
یہ بيان ترکیہ کی خارجہ پالیسی کا وہ بنیادی ستون ہے جو نہ صرف خطے بلکہ عالمی سیاست میں ایک واضح سمت کا پیغام دیتا ہے۔