ترکیہ کے شماریاتی ادارے نے ستمبر 2025 کی مہنگائی کے اعداد و شمار جاری کر دیے۔ ماہانہ افراطِ زر 3.23 فیصد ریکارڈ ہوا، جس کے ساتھ ہی کرایوں اور آئندہ برس جنوری میں سرکاری ملازمین اور پنشنرز کی تنخواہوں میں اضافے کا حساب مزید واضح ہوگیا۔
ماہ ستمبر میں مہنگائی کی شرح
اعداد و شمار کے مطابق صارف قیمت اشاریہ (سی پی آئی) میں ستمبر کے دوران پچھلے ماہ کے مقابلے میں 3.23 فیصد اضافہ ہوا۔ گزشتہ برس کے دسمبر کے مقابلے میں اضافہ 25.43 فیصد، پچھلے سال کے اسی مہینے کے مقابلے میں 33.29 فیصد جبکہ بارہ ماہ کی اوسط کے لحاظ سے اضافہ 38.36 فیصد ریکارڈ کیا گیا۔
خوراک، رہائش اور ٹرانسپورٹ میں نمایاں اضافہ
اعداد و شمار کے مطابق سب سے زیادہ وزن رکھنے والے تین بڑے شعبوں میں سالانہ بنیاد پر خوراک اور غیر الکحل مشروبات میں 36.06 فیصد اضافہ، ٹرانسپورٹ میں 25.30 فیصد اور رہائش میں 51.36 فیصد اضافہ ریکارڈ کیا گیا۔
ماہانہ بنیاد پر انہی شعبوں میں خوراک میں 4.62 فیصد، ٹرانسپورٹ میں 2.81 فیصد اور رہائش میں 2.56 فیصد اضافہ ہوا۔
یورپی اوسط سے 15 گنا زیادہ مہنگائی
محققین کے مطابق ترکیہ اس وقت یورپ میں خوراک اور عمومی مہنگائی میں سب سے آگے ہے۔ یورپی ممالک میں اوسط سالانہ افراطِ زر 2.2 فیصد جبکہ خوراک کی مہنگائی صرف 3 فیصد ہے۔ اس کے برعکس ترکیہ میں خوراک کی سالانہ مہنگائی 36 فیصد ہے جو یورپی اوسط سے بارہ گنا زیادہ ہے۔
ماہرین کے مطابق یورپی اوسط کے مقابلے میں ترکیہ کی مہنگائی پندرہ گنا زیادہ ہے، جو عوامی بجٹ پر سنگین دباؤ ڈال رہی ہے۔
اشیائے صرف کی فہرست پوشیدہ
بیان میں یہ نکتہ بھی اجاگر کیا گیا کہ ترکیہ کا شماریاتی ادارہ جون 2022 سے اشیائے ضرورت اور خدمات کی اوسط قیمتوں کی فہرست جاری نہیں کر رہا۔ عدالت کے قطعی فیصلے کے باوجود یہ فہرست عوام کے سامنے نہیں لائی گئی جس کے سبب افراطِ زر کا بنیادی ماخذ پوشیدہ رکھا جا رہا ہے۔
عوامی قوتِ خرید میں مسلسل کمی
ماہرین کے مطابق ستمبر کے اعداد و شمار ظاہر کرتے ہیں کہ مہنگائی کا دباؤ مسلسل برقرار ہے۔ خوراک میں مسلسل اضافہ متوسط اور کم آمدنی والے طبقات کے لیے سنگین مشکلات پیدا کر رہا ہے۔ کرایوں اور تعلیم کے شعبے میں غیر معمولی اضافہ شہری آبادی کو سب سے زیادہ متاثر کر رہا ہے۔اگر قیمتوں کے بڑھنے کی یہ رفتار جاری رہی تو آئندہ چند ماہ میں عوامی قوتِ خرید مزید کم ہوگی۔ حکومت کی جانب سے دی جانے والی سبسڈیز اور ٹیکس رعایتیں وقتی سہارا ضرور فراہم کرتی ہیں، مگر بنیادی مسائل پر قابو پانے کے لیے زیادہ مضبوط اور دیرپا اقدامات درکار ہیں۔
معاشی ماہرین نے خبردار کیا ہے کہ بنیادی اصلاحات کیے بغیر مہنگائی پر قابو پانا ممکن نہیں ہوگا۔
حکومت افراطِ زر پر قابو پانے کے لیے اپنی بھر پور کوششیں جاری رکھے ہوئے ہے لیکن اسء اپنے ہدف کو حاصل کرنے میں شدید مشکلات کا سامنا ہے اور اس کو آئندہ انتخابات سے قبل عوام سے کیے گئے وعدوں کو پورا کرنا ہے ورنہ انتخابات میں افراط زر کی وجہ سے مشکلات کا سامنا کرنا پڑ سکتا ہے ۔