اسرائیلی حملے خطے کے لیے سب سے بڑا خطرہ: صدر ایردوان
صدر رجب طیب ایردوان نے آذربائیجان میں منعقدہ ترک ریاستوں کی تنظیم کے 12ویں سربراہی اجلاس سے خطاب کرتے ہوءے کہا کہ اسرائیلی حکومت کے حملے یہ ظاہر کرتے ہیں کہ ہمارے خطے کے استحکام کے لیے سب سے بڑا خطرہ اسی ملک کی موجودہ حکومت سے ہے۔
صدر رجب طیب ایردوان آج آذربائیجان کے صدر الہام علییف کی دعوت پر باضابطہ سرکاری دورے پر آذربائیجان پہنچے، جہاں انہوں نے قبالا شہر میں منعقدہ ترک ریاستوں کی تنظیم (TDT) کے 12ویں اجلاس میں شرکت کی۔
اپنے خطاب میں صدر ایردوان نے کہا کہ “اسرائیلی حکومت کے حملے اس امر کا ثبوت ہیں کہ خطے کے امن و استحکام کو سب سے بڑا خطرہ اسی حکومت سے لاحق ہے۔انہوں نے مزید کہا کہ فلسطین میں دو ریاستی حل ہی پائیدار اور منصفانہ امن کا واحد راستہ ہے۔
انہوں نے کہا کہ ہم ایسے عالمی نظام کے سامنے ہیں جس میں اقوامِ متحدہ کی سلامتی کونسل انسانیت کے ضمیر کو مجروح کرنے والے کئی مسائل پر خاموش تماشائی بنی ہوئی ہے۔
انہوں نے شام کی صورتحال پر بھی گفتگو کرتے ہوئے کہا کہ اگرچہ شام کو بے شمار مشکلات کا سامنا ہے، تاہم گزشتہ 9 ماہ میں شامی حکومت کی پیش رفت مستقبل کے لیے امید کی کرن ہے۔
صدر ایردوان نے زور دیتے ہوئے کہا کہ غزہ میں قتلِ عام رکنے کے حوالے سے حالیہ دنوں میں جو پیش رفت ہوئی ہے، وہ اطمینان بخش ہے۔ انہوں نے واضح کیا کہ “اسرائیل کے حملے خطے کے استحکام کے لیے براہِ راست خطرہ ہیں اور شام میں امن و سلامتی کا قیام ناگزیر ہے۔
اسرائیل کو میز پر نہیں بلکہ بہ زورِ ہتھیار روکنا ہوگا : دولت باہچے لی
دریں اثنا ء صدر ایردوان کے اتحاد میں شامل جماعت نیشنلسٹ موومنٹ پارٹی (MHP)کے چئیرمین دولت باہچے لی نے کہا ہے کہ اگر اسرائیل کو مذاکرات کی میز پر نہیں روکا جا سکتا تو اسے اسلحے کے زور پر روکنا ہوگا۔
نیشنلسٹ موومنٹ پارٹی کے سربراہ دولت باہچے لی نے پارلیمان کے افتتاحی اجلاس میں سی ایچ پی کی غیر حاضری پر ردِعمل دیتے ہوئے اپنی تقریر میں غزہ کے حوالے سے بھی دوٹوک مؤقف اختیار کیا۔انہوں نے کہا کہ اگر اسرائیل کو مذاکرات کی میز پر نہیں روکا جا سکتا تو اسے ہتھیار سے روکا جانا چاہیے۔ غزہ کو اپنی زنجیروں سے آزاد کرانا ناگزیر ہو چکا ہے۔
نیشنلسٹ موومنٹ پارٹی (MHP)کے چئیرمین دولت باہچے لی نے کہا ہے کہ غزہ کا مسئلہ دنیا کے ایجنڈے پر نمایاں ہے۔ حماس کی جانب سے امن منصوبے پر مثبت اشارہ جزوی سکون کے لیے باعثِ اطمینان ہے، لیکن یہ عمل اب بھی مشکلات اور خطرات سے بھرا ہوا ہے۔ یہ بھی واضح نہیں کہ اسرائیل مذاکرات کے دوران تخریب کاری کرے گا یا نہیں۔ حقیقت یہ ہے کہ اسرائیل انسانیت اور امن کی ہر امید کا دشمن ہے۔ اگر مصر میں جاری مذاکرات رک جاتے ہیں اور اسرائیل اپنی جنگ، تشدد اور نسل کشی جاری رکھتا ہے، تو پھر ہر طرح کے عسکری اقدامات ناگزیر اور جائز ہو جائیں گے۔ اگر اسرائیل کو میز پر نہیں روکا جا سکتا، تو اسے میدان میں اور ہتھیار کے ذریعے روکنا تاریخ کا فیصلہ کن لمحہ بن سکتا ہے۔
دو ریاستی حل کے سوا کوئی راستہ باقی نہیں رہا
نیشنلسٹ موومنٹ پارٹی (MHP)کے چئیرمین دولت باہچے لی نے مزید کہا کہ “سمود فلوٹیلا” کے شرکا کو ترکی واپس لانا ایک بڑی کامیابی ہے اور اس میں حصہ لینے والے سب افراد مبارکباد کے مستحق ہیں۔ میں اقوام متحدہ کی جنرل اسمبلی میں فلسطین کو تسلیم کرنے والے ممالک کا بھی شکریہ ادا کرتا ہوں۔انہوں نے دو ٹوک انداز میں کہا کہ حماس کوئی دہشت گرد تنظیم نہیں، بلکہ ایک مزاحمتی تحریک ہے۔ اصل دہشت گرد وہ اسرائیل ہے جو ظلم اور بربریت کی انتہا کر چکا ہے۔
انہوں نے کہا کہ حماس کی طرف سے امن منصوبے پر مثبت ردِعمل حوصلہ افزا ہے، لیکن راستہ کٹھن اور سازشوں سے بھرا ہوا ہے۔ جنگ کے خاتمے اور حماس کی شمولیت کے لیے اصل مرکز مصر ہے۔ انہوں نے کہا کہ ٹرمپ نے نیتن یاہو سے ملاقات سے قبل ترکیہ اور دیگر ممالک کے ساتھ اجلاس کیا، جس میں غزہ منصوبے میں تبدیلیاں کی گئیں۔ غزہ کو زنجیروں سے آزاد کروایا جانا چاہیے۔ ہم تجویز دیتے ہیں کہ خطے کے ممالک کی مشترکہ کاوشوں سے ایک ’القدس معاہدہ‘ تشکیل دیا جائے۔ فوری طور پر جنگ بندی کا اعلان ہونا چاہیے اور صیہونی درندگی کو قبضہ شدہ علاقوں سے پیچھے ہٹنے پر مجبور کیا جانا چاہیے۔
آخر میں باہچے لی نے اقوام متحدہ کی جنرل اسمبلی میں اسپین کے وزیراعظم کے اس قول کا حوالہ دیا:
“تاریخ خاموش رہنے والوں کا فیصلہ کرے گی” — اور وہ بالکل درست تھے۔انہوں نے زور دیا کہ مزید خون بہنے سے پہلے یہ سلسلہ رُکنا چاہیے۔ دو ریاستی حل کے سوا کوئی اور راستہ باقی نہیں رہا۔ 1967 کی سرحدوں کے مطابق فلسطینی ریاست قائم کی جائے اور اسے اقوامِ متحدہ کی مکمل رکنیت دی جائے۔