ترک صدر کا بروقت فیصلہ
ترک صدر ، رجب طیب ایردوان جو شرم الشیخ سربراہی اجلاس” میں شرکت کے لیے اپنے خصوصی طیارے “TUR” طیارے کے ذریعے مصر کے دورے پر روانہ ہوئے تو جیسے ہی ان کا طیارہ شرم الشیخ پر ائیرپورٹ کے رن وے کو چھونے ہی والا تھا کہ صدر ایردوان کے حکم سے پائلٹ نے رن وے کو عبور کر کے دوبارہ فضا میں چکر لگانا شروع کر دیا۔ کچھ وقت بحیرہ احمر کے اوپر پرواز کرنے کے بعد طیارے نے آخرکار ہوائی اڈے پر دوبارہ لینڈ کیا۔
خبر کے مطابق صدر ایردوان کے طیارے کا رن وے کو عبور کرنے کا فیصلہ اس وقت کیا گیا جب انہیں اسرائیلی وزیرِاعظم نیتن یاہو کے بھی اس اجلاس میں شرکت کرنے کی اطلاع ملی تھی۔
طیارے کے لینڈ کرنے کے بعد مصر کے وزیرِ ثقافت احمد فؤاد حنو، وزیرِ نوجوانان و کھیل اشرف صبھی، ترکیہ کے قاہرہ میں تعینات سفیر صالح مطلو شن اور سفارت خانے کے عملے کے اراکین نے صدر ایردوان کا استقبال کیا ۔
ایردوان کے طیارے نے رن وے کیوں عبور کیا؟
ابتدائی طور پر صدر ایردوان کے طیارے نے رن وے پر اترنے کے بجائے پرواز جاری رکھتے ہوئے بحیرہ احمر کے اوپر کچھ وقت گزارا۔ ذرائع کے مطابق، جیسے ہی مصر کے صدارتی دفتر کی جانب سے یہ اعلان کیا گیا کہ اسرائیلی وزیرِاعظم بن یامین نیتن یاہو بھی شرم الشیخ کے اجلاس میں شریک ہوں گے جس پر صدر ایردوان نے اپنے ہم منصبوں کو یہ پیغام پہنچایا کہ وہ کسی ایسے اجلاس میں شرکت نہیں کریں گے جس میں نتن یاہو موجود ہو، تو اس کے بعد اطلاع ملی کہ نتن یاہو نے اپنی شرکت منسوخ کر دی ہے۔ اس اعلان کے فوراً بعد صدر ایردوان کا طیارہ دوبارہ شرم الشیخ کے ہوائی اڈے کی طرف آیا اور باضابطہ طور پر لینڈنگ کی۔
حاندہ فرات: ترکیہ کا دو ٹوک فیصلہ
صدر ایردوان کے طیارے میں موجود معروف صحافی حاندہ فرات نے “سی این این ترک” پر گفتگو کرتے ہوئے کہا کہ نتن یاہو کی شرکت کی خبر آنے کے بعد ترکیہ نے نہایت واضح اور دوٹوک انداز میں اپنا مؤقف ظاہر کیا۔
حاندہ فرات نے کہا، “شروع میں ہم نے سمجھا کہ شاید ہوائی اڈے پر کسی تکنیکی خرابی کے باعث ایسا ہوا ہے ، لیکن بعد میں ہمیں اپنے ذرائع سے معلوم ہوا کہ معاملہ اس سے کہیں زیادہ اہم تھا۔”
انہوں نے مزید کہا کہ نتن یاہو کی شرکت کے اعلان کے بعد ترکیہ سمیت کئی ممالک کے رہنماؤں نے اجلاس میں شرکت نہ کرنے کا عندیہ دیا۔ ترکیہ نے اس فیصلے پر اپنا شدید ردعمل ظاہر کر کے واضح کر دیا کہ وہ اسرائیلی قیادت کے ساتھ کسی ایسے پلیٹ فارم پر موجود نہیں رہنا چاہتا جہاں فلسطین کے مظلوم عوام کے خلاف جارحیت کے مرتکب رہنما کو مدعو کیا گیا ہو۔
حاندہ فِرات کے مطابق یہ دراصل ایک بہت بڑی سفارتی بدتمیزی تھی۔ نتن یاہو کو اس اجلاس میں مدعو کرنا دوسرے عالمی رہنماؤں کے لیے ایک کھلی بے ادبی کے مترادف تھا۔ اسی نوعیت کی سفارتی گستاخی صدر ٹرمپ نے بھی اسرائیلی پارلیمان میں اپنے خطاب کے دوران کی تھی، جب انہوں نے نہایت واضح انداز میں اسرائیل کے ساتھ اپنی وابستگی کا اظہار کیا۔
عبدالقادر سلوی کے مشاہدات
معروف تجزیہ کار عبدالقادر سلوی نے بھی اس ‘رن وے بحران’ کے حوالے سے اپنے مشاہدات بیان کرتے ہوئے کہا کہ جب ہم قاہرہ کے قریب پہنچ رہے تھے تو اطلاع ملی کہ نیتن یاہو نے اجلاس میں شرکت کا فیصلہ کر لیا ہے۔ اس لمحے ہمارے ذہن میں آیا کہ اب یہ سربراہی اجلاس نتن یاہو کے سائے تلے منعقد ہوگا ۔ ہم سوچ رہے تھے کہ کہیں کوئی نیا واقعہ پیش نہ آجائے کہ اچانک طیارہ رن وے پر پہیے چھونے ہی والا تھا کہ پائلٹ نے دوبارہ فضا میں بلند ہونے کا فیصلہ کیا۔سلوی نے مزید کہا کہ واپسی کے دوران اطلاع ملی کہ نتن یاہو نے اپنی شرکت منسوخ کر دی ہے۔ اس طرح طیارہ تقریباً 19 منٹ تک فضا میں چکر لگانے کے بعد دوبارہ رن وے پر بحفاظت اتر گیا۔
یہ پورا واقعہ اس بات کی علامت ہے کہ ترکیہ نے اسرائیلی قیادت کے خلاف اپنے مؤقف پر کسی قسم کی لچک نہیں دکھائی اور ایک بار پھر عالمی برادری کے سامنے مظلوم فلسطینی عوام کے حق میں اپنی اصولی اور غیر متزلزل پالیسی کو دہرا دیا۔