اسلامی جمہوریہ پاکستان سے تعلق رکھنے والے سینئر سفارت کار سفیر سہیل محمود نے ڈیولپنگ-8 (ڈی-8) تنظیم برائے اقتصادی تعاون کے نئے سیکریٹری جنرل کی حیثیت سے باضابطہ طور پر اپنی ذمہ داریاں سنبھال لی ہیں۔ اس حوالے سے ایک پروقار تقریب استنبول میں واقع ڈی-8 سیکریٹریٹ کے ہیڈکوارٹر میں منعقد ہوئی، جہاں عہدے کی ذمہ داریوں کا چارج باضابطہ طور پر انہوں نے سنبھال لیا ہے۔
تقریب سے خطاب کرتے ہوئے سبکدوش ہونے والے سیکریٹری جنرل سفیر امام نے سفیر سہیل محمود کا پرتپاک خیرمقدم کیا، انہیں عہدہ سنبھالنے پر مبارکباد دی اور ان کے لیے کامیاب اور نتیجہ خیز مدتِ کار کے لیے نیک تمناؤں کا اظہار کیا۔
اس موقع پر سفیر سہیل محمود نے سفیر امام کا گرمجوش استقبال اور تنظیم کے لیے ان کی خدمات پر دلی شکریہ ادا کیا اور ان کے مستقبل کے لیے نیک خواہشات کا اظہار کیا۔
اپنے خیالات کا اظہار کرتے ہوئے سفیر سہیل محمود نے ڈی-8 تنظیم کی بے پناہ صلاحیت پر زور دیا اور کہا کہ ترجیحی پروگراموں، اسٹریٹجک اقدامات اور فلیگ شپ منصوبوں کے مؤثر نفاذ کے ذریعے رکن ممالک کے درمیان تعاون کو نئی بلندیوں تک لے جایا جا سکتا ہے۔ انہوں نے ڈی-8 چارٹر اور دس سالہ روڈ میپ میں متعین اہداف کے حصول کے لیے رکن ممالک، شراکت داروں اور سیکریٹریٹ کے ساتھ قریبی اور نتیجہ خیز تعاون کے عزم کا اعادہ کیا۔
تقریب کے اختتام پر حوالگی کی دستاویزات پر دستخط کیے گئے اور ایک یادگاری گروپ فوٹو لیا گیا، جس کے ساتھ ہی سفیر سہیل محمود کی بطور سیکریٹری جنرل ڈی-8 تنظیم برائے اقتصادی تعاون مدتِ کار کا باضابطہ آغاز ہو گیا، جو یکم جنوری 2026 سے مؤثر ہے۔
چار دہائیوں پر محیط شاندار سفارتی اور عوامی خدمات کے حامل سفیر سہیل محمود اس سے قبل 2019 سے 2022 تک پاکستان کے 30ویں سیکریٹری خارجہ کے طور پر خدمات انجام دے چکے ہیں۔ اس کے علاوہ وہ 2013 سے 2019 تک جمہوریہ ترکیہ میں پاکستان کے سفیر بھی تعینات رہے، جہاں انہوں نے پاک-ترک تعلقات کے فروغ، سیاسی، دفاعی اور معاشی تعاون کو نئی جہت دینے میں اہم کردار ادا کیا۔ بعد ازاں 2023 سے 2025 تک انہوں نے پاکستان کے ممتاز پالیسی تھنک ٹینک، انسٹی ٹیوٹ آف اسٹریٹجک اسٹڈیز اسلام آباد (ISSI) کی سربراہی بھی کی۔