انقرہ کےضلع کیچی اورین (Keçiören) کی بلدیہ کے زیرِ اہتمام آج ایسٹرگون قلعہ کلچرل سینٹر میں یومِ استحصالِ کشمیر کے موقع پر ایک خصوصی تصویری نمائش کا انعقاد کیا گیا۔ اس نمائش کا مقصد 5 اگست 2019 کو بھارت کی جانب سے مقبوضہ جموں و کشمیر کی خصوصی آئینی حیثیت کے یکطرفہ اور غیرقانونی خاتمے کے سات برس مکمل ہونے پر کشمیری عوام کے ساتھ اظہارِ یکجہتی کرنا تھا۔
تقریب میں سفارت خانۂ پاکستان کے نمائندوں، کیچی اورین بلدیہ کے حکام، مختلف ممالک کے سفارتی نمائندوں، جامعات سے وابستہ شخصیات، ذرائع ابلاغ کے نمائندوں اور سول سوسائٹی کے اراکین نے شرکت کی۔
تقریب کا آغاز شہدائے کشمیر کی یاد میں ایک منٹ کی خاموشی، اس کے بعد ترکیہ اور پاکستان کے قومی ترانوں اور تلاوتِ کلامِ پاک سے ہوا۔
افتتاحی خطاب کرتے ہوئے کیچی اورین بلدیہ کے ڈپٹی میئر اتیلا زورلو نے میئر ڈاکٹر مسعود اوزارسلان کا خیرسگالی کا پیغام حاضرین تک پہنچایا۔ انہوں نے کہا کہ یہ تقریب محض ایک تصویری نمائش نہیں بلکہ کشمیر کے عوام کے ساتھ مشترکہ جذبات، تاریخی رشتے اور انسانی ہمدردی کے اظہار کی علامت ہے۔
انہوں نے ترکیہ اور پاکستان کے درمیان دیرینہ برادرانہ تعلقات کو دونوں ممالک کی مشترکہ تاریخ کا سرمایہ قرار دیتے ہوئے کہا کہ ترکیہ کی جنگِ آزادی کے دوران قائم ہونے والی یہ دوستی آج بھی پوری قوت کے ساتھ قائم ہے۔ انہوں نے ترک قومی شاعر محمد عاکف ایرسوئے اور شاعرِ مشرق علامہ محمد اقبال کا ذکر کرتے ہوئے دونوں اقوام کے فکری اور تہذیبی روابط کو اجاگر کیا اور اس عزم کا اعادہ کیا کہ ترکیہ دنیا کے تمام مظلوم خطوں، بالخصوص کشمیر، میں امن، انصاف اور استحکام کے لیے اپنی دعائیں اور حمایت جاری رکھے گا۔
پاکستان کے سفارت خانے کے ڈپٹی ہیڈ آف مشن شائق احمد بھٹو نے اپنے خطاب میں مقبوضہ جموں و کشمیر کی موجودہ انسانی صورتِ حال پر روشنی ڈالتے ہوئے کہا کہ نمائش میں پیش کی گئی تصاویر کشمیری عوام کی مشکلات، قربانیوں اور ثابت قدمی کی عکاس ہیں۔ انہوں نے کہا کہ جموں و کشمیر کے تنازع کا منصفانہ اور پائیدار حل صرف اقوامِ متحدہ کی سلامتی کونسل کی متعلقہ قراردادوں اور کشمیری عوام کے حقِ خودارادیت کے مکمل احترام کے ذریعے ہی ممکن ہے۔
تقریب کے اختتام پر معزز مہمانوں نے تصویری نمائش کا باقاعدہ افتتاح کیا اور مختلف تصاویر کا مشاہدہ کیا، جن میں مقبوضہ جموں و کشمیر میں انسانی صورتحال، کشمیری عوام کی جدوجہد اور ان کے عزم و استقلال کو مؤثر انداز میں پیش کیا گیا تھا۔