استنبول: ترقی پذیر آٹھ اسلامی ممالک کی تنظیم (ڈی ایٹ) کے سیکریٹری جنرل نے ترک وزارتِ خارجہ کے استنبول نمائندہ دفتر کی سربراہ، سفیر ڈاکٹر عائشہ سوزَن اُسلُوئر سے ملاقات کے دوران تنظیم کے قیام سے لے کر آج تک ڈی ایٹ سیکریٹریٹ کی استنبول میں میزبانی اور مسلسل بھرپور تعاون پر حکومتِ ترکی سے دلی تشکر کا اظہار کرتے ہوئے کہا ہے کہ ترکی نے تنظیم کے ادارہ جاتی استحکام اور بین الاقوامی کردار کے فروغ میں ہمیشہ کلیدی کردار ادا کیا ہے۔
ملاقات میں سیکریٹری جنرل نے سفیر ڈاکٹر عائشہ سوزَن اُسلُوئر کی سفارتی خدمات کو سراہتے ہوئے کہا کہ استنبول میں مختلف ممالک کے سفارتی مشنز اور بین الاقوامی اداروں کے ساتھ مؤثر روابط اور تعاون کے فروغ میں ان کی کاوشیں قابلِ تحسین ہیں، جن سے ڈی ایٹ کی سفارتی سرگرمیوں کو مزید تقویت ملی ہے۔
دونوں رہنماؤں کے درمیان ڈی ایٹ کے تاریخی ارتقا، موجودہ ترجیحات اور آئندہ کے لائحۂ عمل پر بھی تفصیلی تبادلۂ خیال ہوا۔ اس موقع پر اس امر پر اتفاق کیا گیا کہ ڈی ایٹ ترقی پذیر رکن ممالک کے درمیان تجارت، سرمایہ کاری، صنعتی تعاون، ٹیکنالوجی کے تبادلے اور پائیدار اقتصادی ترقی کے فروغ کے لیے ایک مؤثر اور بااعتماد بین الاقوامی پلیٹ فارم کی حیثیت اختیار کر چکی ہے۔
ملاقات میں اس عزم کا اعادہ بھی کیا گیا کہ ڈی ایٹ رکن ممالک کے درمیان اقتصادی انضمام اور باہمی تعاون کو مزید مضبوط بنانے کے ساتھ ساتھ بین الاقوامی اور کثیرالجہتی فورمز پر مشترکہ مفادات اور متفقہ مؤقف کے مؤثر اظہار کے لیے اپنی کاوشیں مزید وسعت دے گی۔
سیکریٹری جنرل نے اس امید کا اظہار کیا کہ ترکی اور ڈی ایٹ کے درمیان قریبی تعاون مستقبل میں بھی اسی جذبے کے ساتھ جاری رہے گا، جس سے تنظیم کے رکن ممالک کے درمیان اقتصادی شراکت داری اور علاقائی و بین الاقوامی تعاون کو مزید فروغ حاصل ہوگا۔