وزیراعظم محمد شہباز شریف نے آج انقرہ پہنچنے پر صدارتی کمپلیکس میں صدر رجب طیب ایردوان سے ملاقات کی ہے۔
وزیراعظم شہباز شریف نے ہولناک زلزلے کے نتیجے میں ہزاروں قیمتی جانوں کے ضیاع اور بنیادی ڈھانچے کو ہونے والے شدید نقصان پر صدر ایردوان اور ترک قوم سے دلی تعزیت کا اظہار کیا ہے ۔
پاکستان اور ترکیہ کے درمیان برادرانہ تعلقات کا ذکر کرتے ہوئے وزیر اعظم نے کہا کہ پاکستانی عوام نے اپنے ترک بھائیوں اور بہنوں کی طرح درد اور کرب کو اپنے دل میں محسوس کیا۔ وزیراعظم نے مزید کہا کہ پاکستان کے عوام متاثرہ افراد کی بحالی تک اپنی ہر ممکنہ امداد کو جاری رکھیں گے۔
صدرایردوان نے تباہ کن زلزلے کے تناظر میں ترکیہ کے لیے پاکستان کی قاب@ قدر امداد کا شکریہ ادا کیا۔ ۔ انہوں نے اس بات کا اعادہ کیا کہ پرعزم ترک قوم اس قدرتی آفت سے پہلے سے زیادہ طاقت اور عزم کے ساتھ اپنے پاوں پر کھڑا ہونے میں کامیاب ہو جائے گی۔
وزیر اعظم شہباز شریف ، ترکیہ میں آنے والے شدید زلزلے کے تناظر میں ترکیہ کے ساتھ پاکستان کی یکجہتی اور حمایت کے اظہار کرنے کی غرض سے ترکیہ کے دورے پر تشریف لائے ہیں۔ وزیراعظم شہباز شریف زلزلے سے متاثرہ علاقوں کا دورہ بھی کریں گے اور زمین پر موجود پاکستانی ریسکیو اور ریکوری ٹیموں سے بھی ملاقات کریں گے۔
وزیر اعظم کے ہمراہ وفاقی وزیر اطلاعات و نشریات مریم اورنگزیب، ایس اے پی ایم جناب طارق فاطمی اور چیئرمین این ڈی ایم اے لیفٹیننٹ جنرل انعام حیدر ملک بھی ہمراہ ہیں۔