ترکیہ کے عالمی شہرت یافتہ انتخابی امور کے ماہر اورکوندہ KONDA سروئے کمپنی کے ڈائریکٹر جنرل بیکر آعردیر جن کے گزشتہ تمام ہی سروئیز سو فیصد کے لگ بھگ درست ثابت ہوئے ہیں نے 14 مئی کو ہونے والے انتخابات سے متعلق اپنا جائزہ پیش کرتے ہوئے کہا ہے کہ صدارتی امیدواروں میں سے مملکت پارٹی کے چئیرمین محرم اِنجے جنہیں اس وقت 6 فیصد کے لگ بھگ ووٹروں کی حمایت حاصل ہے اگر ان کے حامی ووٹروں کی تعداد میں اضافہ ہوتا چلا گیا تو پھرانتخابات دوسرے مرحلے تک جاسکتے ہیں اور دوسرے مرحلے میں ایردوان کے جیتنے کے امکانات بڑھ سکتے ہیں۔ انہوں نے پہلی بار اپنے ووٹ استعمال کرنے والے نوجوان نسل کی جانب بھی توجہ مبذول کرواتے ہوئے کہا کہ یہ ووٹ بھی بڑی اہمیت کے حامل ہیں اور یہ چھ ملین کے لگ بھگ ووٹ جو پہلی بار استعمال کیے جائیں گے کسی بھی امیدوار کو کامیاب کروانے میں بڑا اہم کردار ادا کرسکتے ہیں۔
انہوں نے کہا کہ جوں جوں ترکیہ میں 14 مئی کا دن قریب آتا جا رہا ہے سیاسی صورتِ حال واضح ہوتی جا رہی ہے۔ صدارتی امیدواروں کا اعلان ہو چکا ہے اور پارلیمانی فہرستوں کی بھی تیاری جاری ہے اور تین دن کے اندر اندر ان فہرستوں کو بھی حتمی شکل دے دی جائے گی۔ عالمی شہرت یافتہ ریسرچر بیکر آعردیر نے کہا کہ 14 مئی کو ہونے والے انتخابات میں اگر محرم اِنجے نے چھ فیصد سے زاہد ووٹ حاصل کرلیے تو انتخابات پہلے راونڈ تک محدود نہیں رہیں گے بلکہ دوسرے راونڈ میں فیصلہ کن معرکہ ہوگا اور دوسرے راونڈ میں موجودہ حکومت اپنے تمام ریاستی اختیارات اور وسائل استعمال کر نے سے گریز نہیں کرے گی اور ان وسائل کو استعمال کرنے میں ایردوان اپنا ثانی نہیں رکھتے ہیں اور اس طرح دوسرے مرحلے میں صدر ایردوان کے جیتنے کے امکانات بڑھ جائیں گے۔
نوجوانوں کے مطالبات کی طرف توجہ دینے کی ضرورت ہے
بیکر آعردیر نے کہا کہ محرم اِنجے نوجوان نسل میں بڑے مقبول ہیں اور نوجوانوں میں سے نصف کے لگ بھگ انہیں ووٹ دے سکتے ہیں۔ اس لیے تمام امیدواروں کو نوجوانوں کو اپنی جانب راغب کرنے کے لیے ان کے مطالبات کی جانب فوری توجہ دینے کی ضرورت ہے۔
ایردوان کے جیتنے کے امکانات بڑھتے جا رہے ہیں
بیکر آعردیر نے کہا کہ ملت اتحاد کو اس وقت سب سے پہلے محرم اِنجے کے ووٹوں کی تعداد میں ہونے والے اضافے کی طرف فوری طور پر توجہ دینے اور محرم اِنجے کے ساتھ (جو ری پبلیکن پیپلز پارٹیCHP ہی کے سابق رکن ہیں ) کے ساتھ کمال کلیچدار اولو کے مذاکرات مثبت طریقے سے جاری رکھنے کی ضرورت ہے اور محرم اِنجے کو رام کرنے کی صورت میں ملت اتحاد پہلے ہی راونڈ میں بڑی آسانی سے کامیابی حاصل کرسکتا ہےورنہ دوسرے راونڈ تک معرکہ جانے سے ایردوان، ملت اتحاد کے صدارتی امیدوار کو شکست سے بھی دوچار کرسکتے ہیں۔
پارلیمنٹ میں کوئی بھی اتحاد 301 سےزاہدنشستیں حاصل نہیں کرسکتا
بیکر آعردیر نے صدارتی انتخابات کے علاوہ پارلیمنٹ کےانتخابات کی طرف بھی روشنی ڈالتے ہوئے کہا ہے کہ موجودہ صورتِ حال میں ملت اتحاد اور جمہور اتحاد کا اگر قریب سے جائزہ لیا جائے تو پتہ چلتا ہے کہ ان دونوں اتحادوں میں سے کوئی بھی اتحاد پارلیمنٹ میں 301 نشستیں حاصل کرنے میں کامیاب نہیں ہوسکتا ہے۔