صدر رجب طیب ایردوان نے آج ترکیہ کے سب سے بڑے عسکری بحری جہاز ٹی سی جی انادولو کو ترک بحریہ کے حوالے کرنے کی تقریب سے خطاب کرتے ہوئے دفاعی صنعت کے حوالے سے بڑے اہم پیغامات جاری کیے ہیں۔ صدر ایردوان نے اس موقع پر بحری جہاز ٹی سی جی انادولو کا عوام کی جانب سے قریبی جائزہ لینے کا موقع فراہم کرنے اور اس بحری جہاز کو چند دنوں کے لیے عوام کی زیارت کے لیے کھول دینے کا اعلان کیا ہے۔
دنیا کا پہلا مسلح ڈرانز اور ترکیہ کا سب سے بڑا عسکری بحری جہاز ٹی سی جی انادولو ایک تقریب کے ساتھ صدارتی دفاعی صنعت کی طرف سے نیول فورسز کمانڈ کے حوالے کردیا گیا۔
اس موقع پر منعقد ہونے والی تقریب سے خطاب کرتے ہوئے صدر ایردوان نے کہا کہ اس بحری جہاز کی تعمیر کا آغاز 30 اپریل 2016 کو یہاں شروع ہوا تھا اور سات سال کے طویل عرصے کے بعد اس جہاز ٹی سی جی انادولو کو مقامی وسائل استعمال کرتے ہوئے تعمیر کرنے میں کامیابی حاصل کرنے پر ہم فخر محسوس کررہے ہیں۔
ترکیہ کی ترقی کی علامت
صدر ایردوان نے خطاب کرتے ہوئے کہا کہ ہماری خواہش ہے کہ یہ ملک کا سب سے بڑا عسکری بحری جہاز ترکیہ آرمڈ فورسز کے لیے طاقت کا سرچشمہ ثابت ہو۔ پہلی کامیابی حاصل کرنے کے بعد اب دوسرے مرحلے کے کام کا آغاز کردیا گیا ہے اور اب ہم نے مختلف ممالک کو اس قسم کے بحری جہاز فروخت کرنے کے کام کا آغاز کردیا ہے۔ہم اس بحری جہاز کو ترکیہ کی ترقی کی علامت کے طور پر دیکھتے ہیں۔ یہ بحری جہاز ترک صدی میں ترکیہ کی پوزیشن کو مضبوط بنانے میں اہم کردار ادا کرے گا اور دنیا میں اپنا مقام بنانے میں کامیاب رہے گا۔ انہوں نے اس موقع پر اس بحری جہاز کی تعمیر میں حصہ لینے والے تمام افراد کا شکریہ ادا کیا۔
دنیا میں اپنی طرز کا واحد بے مثال منصوبہ
نجی شپ یارڈ میں 36 ماہ میں بیک وقت 3 جہازوں کی تعمیر اور انہیں ترک نیول فورسز تک پہنچانے کا ہدف دنیا کا ایک منفرد منصوبہ ہے۔
اپنی طرز کا دنیا کا پہلا جنگی بحری جہاز
ٹی سی جی انادولو عسکری بحری جہاز جسےترک بحریہ کے حوالے کردیا گیا ہے اپنی طرز کا دنیا کا پہلا جنگی بحری جہاز ہے جس پر ڈرانز اور بھاری ہیلی کاپٹر لینڈنگ اور ٹیک آف کر سکتے ہیں۔اس بحری جہاز پر قزل ایلما، حر جیٹ ، بائراکتارٹی بی 2 کی طرح ڈرانز لینڈ اور ٹیک آف کرسکیں گے۔
بحری جہاز کی 70 فیصد مقامی وسائل سے تیاری
یہ بحری جہاز دنیا میں ہر مقام پر فوجی آپریشن کرنے کی صلاحیتوں کا مالک ہے ۔ یہ بحری جہاز جسے 70 فیصد مقامی وسائل سے تیار کیا گیا ہے کو ایمر جنسی کی صورت میں بڑی آسانی سے منتقل کیا جاسکتا ہے۔ ترکیہ میں تیار ہونے والے تمام بحری جہازوں کو ترکیہ ہی کی تیار کردہ مقامی ٹیکنالوجی کو استعمال کرنے کو ترجیح دی جا رہی ہے اور یہ بحری جہاز ترکیہ ٹیکنالوجی کا منہ بولتا ثبوت ہے۔
ترکیہ کی دفاعی صنعت نے گزشتہ 20 سالوں میں ایک انقلاب برپا کیا ہے اور اس شعبے میں ابھرتا ہوا ستارہ بننا کوئی آسان کام نہیں تھالیکن ترکیہ نے دنیا میں اپنی طرز کا واحد بحری جہاز تیار کرکے دنیا پر اپنی ترقی کی مہر ثبت کردی ہے۔
بڑی تعداد میں ترک کمپنیاںمنصوبے میں شامل ہیں
ترکیہ میں دفاعی صنعت کے منصوبوں کی تعداد جو کہ 62 تھی اب بڑھ کر 750 تک پہنچ گئی ہے۔ صدر ایردوان نے کہا کہ جب ہم حکومت میں آئے تھے تو دفاعی صنعت کے لیے بجٹ صرف 5.5 ارب ڈالر مختص تھا جو اب بڑھ کر 60 ارب ڈالر سے تجاوز کر چکا ہے۔ دفاعی صنعت میں کئی ایک کمپنیاں ایک ساتھ کام کررہی ہیں۔
تاریخی کامیابی
ترکیہ اپنا دفاعی صنعت کا بجٹ 75 بلین ڈالر تک بڑھا رہا ہے ۔ اس شعبے کی برآمدات کا 4 ارب 400 ملین ڈالر کی ریکارڈ سطح پر پہنچ جانا کامیابی کی علامت ہے۔ ہم اپنے غیر ملکی انحصار کو کم کرکے تاریخی کامیابی حاصل کرچکے ہیں اور اب ہم مقامی وسائل کو 20 فیصد سے بڑھا کر 80 فیصد تک کرنے میں کامیاب ہو چکے ہیں۔
غیر ممالک سے بڑھتی ہوئی ڈیمانڈ
ترکیہ کی دفاعی صنعت، سیکورٹی یونٹس کی تمام ہی ضروریات کو پورا کرنے کے قابل ہو چکی ہےاور بڑی تعداد میں غیر ممالک کی ڈیمانڈ میں اضافہ ہوتا جا رہا ہے۔ اب ہم مستقبل کے جنگوں کے لیے اپنی تیاریاں کررہے ہیں ۔ ہمیں خوشی ہے کہ ہماری سیکیورٹی فورسز کے زیر استعمال مصنوعات بھی دوست ممالک کی فہرست میں شامل ہو چکی ہیں۔ ہم دنیا میں دفاعی صنعت میں ترکیہ کا پرچم بلند کرچکے ہیں جس پر ہمیں فخر ہے۔