اسلام آباد: پنجاب کے سرائیکی علاقے میں مردم شماری کے عمل کے دوران ایک خاتون ورکر اس وقت چکرا کر رہ گئی جب ایک گھر سے مردم شماری کے لئے گھر کے سربراہ غلام قادر نے خاتون ورکر کو اپنے خاندان کی تفصیلات بتانا شروع کیں۔
غلام قادر نے مردم شماری کے لئے آئی ہوئی خاتون ورکر کو یہ بتایا کہ اس کی تین بیویاں ہیں اور ہر بیوی سے اٹھارہ اٹھارہ بچے بھی ہیں جن کا سن کر خاتون ورکر کا حیرت سے سر گھوم گیا۔
پہلے تو مردم شماری اندراج کی ڈیوٹی پر مامور خاتون ورکر کو یقین ہی نہیں آیا لیکن جب تمام دستاویزات کا بغور جائزہ لیا تو وہ حیران و پریشان ہو گئی۔
مردم شماری پر مامور خاتون ورکر کا اپنے آفیسر کو ایک دلچسپ اور حیرت میں ڈوبی ہوا وائس میسج موصول ہوا جس میں وہ کہہ رہی ہے کہ وہ مردم شماری اندراج نمبر 0229 کے لئے ایک گھر پر موجود ہے جہاں ایک ہی شخص کی تین بیویاں ہیں اور ہر بیوی سے اٹھارہ اٹھارہ بچے ہیں، اتنے افراد کے اندراج پر تو اس کا پورا دن ایک ہی گھر پر صرف ہو جائے گا لہذا مجھ سے کام میں کوتاہی کی کوئی شکایت نہ کیجئے گا۔
اس وائس میسج سے دفتر کا تمام عملہ خوب محظوظ ہوتا رہا۔