استنبول ( نمائندہ خصوصی ) پاکستان کے وزیر برائے ریونیو (محصولات) اشفاق تولا نے کہا ہے کہ پاکستانیوں کے بیرون ملک میں موجود غیر قانونی اثاثوں کی معلومات کے حصول کیلئے نئی سفارشات تیار کی گئی ہیں۔ اشفاق تولا جو کہ ریفارمز اینڈ ریونیو موبلائزیشن کمیشن کے چیئرمین بھی ہیں کا کہنا تھا کہ یہ سفارشات جلد ہی وزیر خزانہ اسحاق ڈار کو پیش کی جائیں گی۔ انہوں نے کہا کہ ان سفارشات میں دبئی کی حکومت سے ایسے پاکستانی شہریوں کے بارے میں معلومات کا تبادلہ کرنے کی درخواست بھی شامل ہے جو دبئی میں کئی جائیدادوں کے مالک ہیں۔ انہوں نے دعویٰ کیا کہ یہ درخواست دبئی حکومت کی طرف سے پہلے سے قائم کی گئی مثال کے تحت تیار کی گئی ہے جس میں دبئی حکومت نے بھارت کی حکومت کو ایسے بھارتی سرمایہ کاروں کے بارے میں معلومات فراہم کی تھیں جن کی جائیدادوں کی مالیت 50 لاکھ ڈالر سے زیادہ تھی۔ اسی مثال کے تحت، حکومت پاکستانِ بھی دبئی حکومت اور حکومت پاکستان کے درمیان معلومات کے تبادلے کا طریقہ کار قائم کرنا تھا۔
اشفاق تولا نے یہ بھی واضح کیا کہ اس اقدام کا مقصد شفافیت کو فروغ دینا اور اس بات کو یقینی بنانا ہے کہ بیرون ملک خاص طور پر دبئی میں نمایاں جائیدادیں رکھنے والے افراد متعلقہ ٹیکس قوانین اور ضوابط پر عمل کرتے ہیں یا کہ نہیں۔ کچھ تجزیہ کاروں کی رائے ہے کہ ان سفارشات پر عمل درآمد کیلئے متعلقہ حکام کے درمیان مزید بات چیت، مذاکرات اور اقدامات کی ضرورت ہوگی۔ اشفاق تولا نے پاکستان سے باہر غیر قانونی اثاثہ جات کے حوالے سے مسائل کے حل اور ایسے کیسز سے نمٹنے کیلئے سخت اقدامات کی سفارش کی ہے۔ اشفاق تولا کا کہنا تھا کہ موثر اقدامات پر عمل اور متعلقہ معلومات جمع کرکے حکومت پاکستانی شہریوں میں شفافیت اور احتساب کو یقینی بنانا چاہتی ہے۔ انہوں نے اس خواہش کا اظہار کیا کہ وہ وزیر خزانہ اسحاق ڈار اور حکومت پاکستان کو قائل کریں گے کہ متحدہ عرب امارات کی حکومت کے ساتھ بات چیت کرکے ایسے پاکستانی سرمایہ کاروں کے بارے میں معلومات کے تبادلے کیلئے اقدامات کیے جائیں جن کی امارات میں منافع بخش جائیدادیں یا بھاری سرمایہ کاری ہے۔
اشفاق تولا نے اس بات پر زور دیا کہ حکومتِ پاکستان کو ایسے افراد سے کوئی مسئلہ نہیں جنہوں نے اپنا سرمایہ قانونی ذرائع سے اپنا پیسہ پاکستان سے باہر منتقل کیا ہے۔ تاہم، انہوں نے ایسے افراد سے نمٹنے کی ضرورت پر زور دیا جنہوں نے اپنا سرمایہ پاکستان سے باہر چھپا رکھا ہے، اور تجویز پیش کی کہ ایسے افراد پر ٹیکس کے مناسب اقدامات کا اطلاق کیا جائے۔ وزیر ریونیو کے مطابق، آئی ایم ایف کے ساتھ ہونے والے معاہدے کے نتیجے میں پاکستان کو ٹیکس دہندگان کو دستاویزی شکل دینے کی ضرورت ہے تاکہ ان کا درست حساب کتاب ہو سکے۔ مزید برآں، اشفاق تولا نے بتایا کہ ٹیکس کے حوالے سے محفوظ ٹھکانے سمجھے جانیوالے دنیا کے مختلف ممالک سے پاکستان کو 2017ء سے پاکستانی سرمایہ کاروں کے بارے میں معلومات حاصل ہو رہی ہیں۔
معاشی تجربہ کاروں کا کہنا ہے کہ ان سفارشات پر عملدرآمد ناممکن دکھائی دیتا ہے کیونکہ بیرون ممالک بےنامی سرمایہ کاری اور جائیدادوں کی کوئی منی ٹریل بھی نہیں ہے اور یہ ہی متعلقہ سرمایہ کاری ان افراد نے اپنے نام سے رجسٹر کروا رکھی ہے۔ اس طرح کی سرمایہ کاری اور جائیدادیں ہمیشہ کسی نہ کسی فرنٹ میں کے ذریعے رکھی جاتی ہیں۔ مزید برآں موجودہ پاکستانی وزیر خزانہ اسحاق ڈار کی بھی مبینہ طور پر بے نامی جائیدادیں اور بھاری سرمایہ کاری دبئی میں بھی ہے۔