ترکیہ کے دارالحکومت انقرہ میں یوم دفاع اور شہداء کی یاد میں شاندار تقریب ، دفاعی تعاون پر مشکور ہیں:سفیر پاکستان

پاک ترک تعلقات مثالی، دونوں ممالک سٹریٹجک پارٹنرہیں

  ترکیہ کے دارالحکومت  انقرہ میں یوم دفاع اور شہداء کی یاد  میں تقریب

 ترکیہ کے دارالحکومت انقرہ میں پاکستان کا یوم دفاع  و  شہدا جوش و جذبے اور جذبہ حب الوطنی سے منایا گیا۔

سفیر پاکستان کی رہائش گاہ پر   منعقد ہونے والی  اس تقریب میں بڑی تعداد میں اعلیٰ ترک سول اور فوجی حکام، سفارتکاروں ، میڈیا کے نمائندوںاور پاکستانی کمیونٹی  سے تعلق رکھنے والے افراد نے شرکت کی۔

سفیرِ پاکستان ڈاکٹر یوسف جنید نےاپنی رہائش گاہ پر  تمام مہمانوں کا فرداً فرداً استقبال کیا ۔          

یومِ دفاع پاکستان کی اس تقریب میں ترک وزیر تجارت پروفیسر ڈاکٹر عمر بولات اور  چیف آف جنرل اسٹاف جنرل  متین گیوراک   نے مہمانِ خصوصی کی حیثیت سے اس تقریب میں شرکت کی۔

سفیر پاکستان کی رہائش گاہ پر منعقد ہونے والے تقریب سے خطاب کرتے ہوئے سفیرِ پاکستان ڈاکٹر یوسف جنید نے  6 ستمبر کی اہمیت کو اجاگر کرتے ہوئے کہا کہ 16 روزہ جنگ نے یہ سبق چھوڑا کہ امن پسند، بہادر اور خوددار قومیں جو اپنے ملک کے لیے جانیں قربان کرنے کے لیے پرعزم ہیں انہیں طاقت اور جارحیت سے شکست نہیں دی جا سکتی۔

تقریب سے خطاب کرتے ترکیہ کے وزیر تجارت  پروفیسر ڈاکٹر عمر بولات نے مثالی اور تاریخی دوطرفہ تعلقات،  بالخصوص فروغ پاتے دفاعی تعلقات اور دونوں ممالک کی مسلح افواج کے درمیان بہترین تعاون کو سراہا۔

اس موقع پر ترک مسلح افواج کے سربراہ  جنرل متین گیوراک نے پاکستان ترکیہ  سٹریٹجک پارٹنرشپ کو اجاگر کرتے ہوئے پاکستان کی مسلح افواج کے شہداء کی قربانیوں اور بہادری کو خراج تحسین پیش کیا۔