انقرہ میں سفارتخانہ پاکستان نے پاکستان ایمبیسی انٹرنیشنل اسٹڈی گروپ (PEISG) کے اشتراک سے ایک شاندار ثقافتی تقریب کا اہتمام کیا، جو پاکستان کے وزیراعظم جناب محمد شہباز شریف کے خصوصی اقدام کے تحت ترکیہ کا دورہ کرنے والے اُن اعلیٰ کارکردگی کے حامل پاکستانی طلبہ کے اعزاز میں منعقد کی گئی۔ اس پروگرام کا مقصد علمی و ثقافتی تبادلے کو فروغ دینا اور دونوں برادر ممالک کے درمیان تعلیمی تعلقات کو مزید مستحکم کرنا تھا۔
اس موقع پر سفیڑ پاکستان ڈاکٹر یوسف جُنید، اوستِم ٹیکنیکل یونیورسٹی کے ریکٹر پروفیسر ڈاکٹر مراد علی یولک، وزارتِ تعلیمِ پاکستان کے سینئر جوائنٹ سیکریٹری جناب آفتاب رشید، ترکیہ کی وزارتِ قومی تعلیم کے اعلیٰ حکام، ماہرینِ تعلیم اور دیگر معزز مہمانوں نے شرکت کی۔
اپنے خطاب میں سفیرِ پاکستان ڈاکٹر یوسف جُنید نے کہا کہ یہ دورہ وزیراعظم محمد شہباز شریف کے اُس وژن کی عملی تعبیر ہے جس کے تحت نوجوان نسل کو بااختیار بنانا اور ترکیہ کے ساتھ تعلیمی تعاون کو مزید گہرا کرنا مقصود ہے۔ اُنہوں نے طلبہ پر زور دیا کہ وہ پاکستان کے نوجوان سفیر کی حیثیت سے ترکیہ کے تعلیمی و ثقافتی تجربات سے سیکھیں اور دونوں ممالک کے درمیان دوستی کے رشتے کو مزید مضبوط بنائیں۔ سفیرِ پاکستان نے ترکیہ کی وزارتِ قومی تعلیم کی مسلسل حمایت پر شکریہ ادا کیا اور اس عزم کا اعادہ کیا کہ پاکستان طلبہ کے تبادلے، اساتذہ کی تربیت اور نصاب کی ترقی کے شعبوں میں ترکیہ کے ساتھ تعاون کو مزید فروغ دیتا رہے گا۔
اپنی تقریر کے اختتام پر سفیر جُنید نے پاکستان اور ترکیہ کے درمیان ازلی و ابدی رشتے کو خراجِ تحسین پیش کرتے ہوئے کہا کہ ’’پاکستان اور ترکیہ دراصل ایک قوم اور دو ریاستیں ہیں۔‘‘
اوستِم ٹیکنیکل یونیورسٹی کے ریکٹر پروفیسر ڈاکٹر مراد علی یولک نے اپنے خطاب میں کہا کہ اس نوعیت کے تبادلے نوجوان نسل کو ایک دوسرے کی ثقافتوں کو سمجھنے اور پائیدار دوستیوں کی بنیاد رکھنے میں مدد دیتے ہیں۔ اُنہوں نے PEISG کے کردار کو سراہتے ہوئے کہا کہ یہ ادارہ دونوں ممالک کے درمیان علمی ترقی، فکری ہم آہنگی اور باہمی مفاہمت کے فروغ میں ایک اہم پل کا کردار ادا کر رہا ہے۔
مہمانوں کا پرتپاک استقبال ڈائریکٹر PEISG جناب غالب گیلانی نے کیا۔ انہوں نے دورہ کرنے والے پاکستانی طلبہ کو ادارے کے وژن، سرگرمیوں اور گزشتہ برسوں میں حاصل ہونے والی نمایاں کامیابیوں کے بارے میں تفصیلی آگاہی دی۔ تقریب کے دوران PEISG کے طلبہ نے پاکستان اور ترکیہ کی مشترکہ ثقافتی وراثت کی عکاسی کرتی ہوئی رنگا رنگ پیشکشیں بھی پیش کیں، جنہیں حاضرینِ محفل نے بے حد سراہا۔
وزیراعظم پاکستان کے اس خصوصی اقدام کے تحت ملک کے 26 سرکاری تعلیمی بورڈز سے تعلق رکھنے والے 149 نمایاں کارکردگی کے حامل طلبہ کو ترکیہ کے دورے کا موقع فراہم کیا گیا۔ طلبہ کے دو گروپوں پر مشتمل یہ وفد ترکیہ کی ممتاز جامعات کے مطالعاتی دوروں کے ساتھ ساتھ استنبول اور انقرہ کے اہم تاریخی و ثقافتی مقامات کا بھی مشاہدہ کرتا رہا۔ یہ تجربہ اُن کے علمی شعور اور ذاتی نشوونما میں نہایت اہم کردار ادا کرے گا اور اُن کے لیے ایک یادگار سرمایہ ثابت ہوگا۔