ترک وزیر داخلہ علی یرلی قایا کی وزیراعظم شہباز شریف سے ملاقات
وزیراعظم شہباز شریف سے ترکیہ کے وزیر داخلہ نے اسلام آباد میں ملاقات کی۔ اس موقع پر دیرینہ اور مضبوط برادرانہ تعلقات کا اعادہ کیا گیا۔
وزیر اعظم شہباز شریف نے ترک صدر کے لیے تہنیتی پیغام بھیجا۔ سیکیورٹی، ڈیزاسٹر منیجمنٹ، تجارت اور دیگر شعبوں میں دو طرفہ تعاون مزید مضبوط کرنے کے عزم کا اعادہ کیا۔
وزیراعظم نے اہم امور پر پاکستان کے مؤقف کے لیے ترکیہ کی مضبوط اور غیر متزلزل حمایت کو سراہا اور کہا ترک وزیر داخلہ کا دورہ، دونوں ملکوں کے درمیان مضبوط برادرانہ تعلقات کی عکاسی کرتا ہے۔
اس موقع پر ترک وزیر داخلہ نےصدر اردوان کی جانب سے وزیراعظم کے لیے تہنیتی پیغام پہنچایا۔ وزیراعظم نے پاک افغانستان امن مذاکرات میں سہولت کاری پر ترکیہ کی قیادت کا خصوصی شکریہ ادا کیا۔
ملاقات میں وفاقی وزرا اسحاق ڈار، محسن نقوی، وزیر مملکت طلال چودھری، معاون خصوصی طارق فاطمی، چیئرمین این ڈی ایم اے، سیکریٹری داخلہ اور خارجہ بھی موجود تھے۔
ترک وزیر داخلہ کی پاکستان نیشنل پولیس اکیڈمی کی گریجویشن تقریب میں شرکت
بعد میں ترک وزیر داخلہ نے دوست اور برادر ملک پاکستان میں پاکستان نیشنل پولیس اکیڈمی کی گریجویشن تقریب میں شرکت کی
انہوں نے اپنے پیغام میں کہا ہے کہ ترکیہ اور پاکستان مشترکہ عقیدے اور ایک ہی لڑنے والے جذبے کے حامل دو برادر ملک ہیں۔
انہوں نے کہا کہ ہم ایک صدی پہلے لاہور کے آسمانوں سے اٹھنے والی دعاؤں اور جنگ آزادی میں جو امداد پہنچائی گئی اسے نہ بھولے ہیں اور نہ بھولیں گے۔
انہوں نے مزید کہا کہ آج، اسی عقیدے کے ساتھ، ہم دہشت گردی کے خلاف جنگ سے لے کر سائبر سیکیورٹی تک، بین الاقوامی جرائم سے لے کر منشیات کے خلاف جنگ تک، ایک ہی مقصد کے لیے ایک ساتھ چل رہے ہیں۔
انہوں نے کہا کہ ایک کی سلامتی دوسرے کی سلامتی ہے۔ایک کی کامیابی دوسرے کا فخر ہے۔
ترک پولیس اور پاکستانی پولیس جرات، وفاداری اور قربانی کی علامت ہیں۔
انہوں نے کہا کہ مجھے یقین ہے کہ ہمارے بھائی چارے کا یہ اٹوٹ رشتہ مستقبل کو محفوظ، زیادہ مستحکم اور مضبوط بنائے گا۔
خدا ہمارے اتحاد کو قائم رکھے۔
پاکستان زندہ باد