ترقی پذیر آٹھ اسلامی ممالک کی تنظیم ڈی ایٹ (D-8) کے سیکریٹریٹ کے زیرِ اہتمام ویزا سہولت کاری سے متعلق ایک اعلیٰ سطحی ورچوئل اجلاس منعقد ہوا، جس میں رکن ممالک کے درمیان آمدورفت کو آسان بنانے، باہمی روابط کو فروغ دینے اور اقتصادی تعاون کو مزید مستحکم کرنے کے امور پر تفصیلی غور کیا گیا۔
اجلاس کی صدارت عوامی جمہوریہ بنگلہ دیش نے کی، جبکہ اس میں ڈی ایٹ کے کمشنرز اور رکن ممالک کے سینئر نمائندوں نے شرکت کی۔ اجلاس کے دوران شریک ممالک کے درمیان سفری سہولیات میں نرمی سے متعلق مختلف تجاویز زیرِ بحث آئیں۔
ڈی ایٹ کے سیکریٹری جنرل، سفیر سہیل محمود نے اپنے افتتاحی کلمات میں کہا کہ اقتصادی انضمام، ادارہ جاتی تعاون اور نجی شعبے کے درمیان روابط کو مضبوط بنانے کے لیے آسان اور مؤثر سفری نظام ناگزیر ہے۔ انہوں نے زور دیا کہ ویزا اور سفر کے طریقۂ کار میں سہولت پیدا کرنے سے تجارت اور سرمایہ کاری کے تعلقات کو فروغ ملے گا، مشترکہ منصوبوں پر تیزی سے عملدرآمد ممکن ہوگا، ادارہ جاتی ہم آہنگی بہتر ہوگی اور عوامی سطح پر روابط میں اضافہ ہوگا۔
سیکریٹری جنرل نے “سافٹ کنیکٹیویٹی” کی بڑھتی ہوئی اہمیت کا ذکر کرتے ہوئے کہا کہ یہ اقدام ڈی ایٹ کے عشرہ روڈ میپ 2030-2020 کے اہداف سے ہم آہنگ ہے، جس کا مقصد رکن ممالک کے درمیان باہمی تجارت میں اضافہ اور اقتصادی تعاون کو مزید گہرا کرنا ہے۔
اجلاس میں “ڈی ایٹ رکن ممالک کے تاجروں کے لیے ویزا طریقۂ کار کو آسان بنانے کے معاہدے” پر عملدرآمد کی موجودہ صورتحال کا جائزہ لیا گیا۔ اس کے علاوہ سفارتی اور سرکاری/سروس پاسپورٹ رکھنے والوں کے لیے موجود دوطرفہ ویزا استثنیٰ کے انتظامات اور کاروباری شخصیات کو مزید سہولت فراہم کرنے کے امکانات پر بھی غور کیا گیا۔
رکن ممالک کے نمائندوں نے اس معاملے کے قانونی، تکنیکی اور انتظامی پہلوؤں پر اپنے خیالات کا اظہار کرتے ہوئے اس امر پر زور دیا کہ ایسے عملی اور باہمی مفاد پر مبنی اقدامات کیے جائیں جو نقل و حرکت، باہمی روابط، اقتصادی تعاون اور عوامی سطح پر تعلقات کو فروغ دے سکیں۔
سفیر سہیل محمود نے اس موقع پر اس عزم کا اعادہ کیا کہ ڈی ایٹ سیکریٹریٹ آئندہ بھی رکن ممالک کے درمیان مشاورت کے عمل کو آگے بڑھانے اور تکنیکی معاونت فراہم کرنے کے لیے اپنا کردار جاری رکھے گا۔
واضح رہے کہ ترقی پذیر آٹھ اسلامی ممالک کی تنظیم (ڈی ایٹ) میں بنگلہ دیش، مصر، انڈونیشیا، ایران، ملائیشیا، نائیجیریا، پاکستان، ترکیہ اور آذربائیجان شامل ہیں۔ تنظیم کا بنیادی مقصد رکن ممالک کے درمیان اقتصادی تعاون، تجارت کے فروغ اور پائیدار ترقی کو یقینی بنانا ہے۔