ڈی ایٹ آرگنائزیشن فار اکنامک کوآپریشن کے سیکریٹری جنرل سفیر سہیل محمود نے زیرو ویسٹ فورم 2026 کے تحت منعقدہ اعلیٰ سطحی وزارتی اجلاس سے خطاب کرتے ہوئے توانائی کے مؤثر استعمال، وسائل کے بہتر انتظام اور پائیدار ترقی کے لیے عالمی تعاون کو مزید مضبوط بنانے کی ضرورت پر زور دیا۔
یہ اعلیٰ سطحی اجلاس ترکیہ کی وزارتِ توانائی و قدرتی وسائل اور زیرو ویسٹ فاؤنڈیشن کے اشتراک سے منعقد ہوا، جس کی صدارت ترکیہ کے وزیرِ توانائی و قدرتی وسائل الپ ارسلان بیرقدار نے کی۔ فورم ترکیہ کی خاتونِ اوّل امینہ ایردوان کی سرپرستی میں منعقد کیا گیا، جو زیرو ویسٹ تحریک کی عالمی سطح پر پہچان میں اہم کردار ادا کر رہی ہیں۔
زیرو ویسٹ فورم 2026 کو دنیا کے بڑے پائیداری اجتماعات میں شمار کیا جا رہا ہے، جس میں 180 سے زائد ممالک سے پانچ ہزار سے زیادہ شرکا شریک ہوئے۔ ان میں 120 سے زائد وزرا، اعلیٰ پالیسی ساز، عالمی اداروں کے نمائندے، ماہرین اور نجی شعبے کی اہم شخصیات شامل تھیں۔
اجلاس سے خطاب کرتے ہوئے ترک وزیر الپ ارسلان بیرقدار نے کہا کہ توانائی کی بچت اور زیرو ویسٹ پائیدار ترقی کے دو اہم ستون ہیں۔ ان کے مطابق موجودہ دور میں دنیا کو توانائی، موسمیاتی تبدیلی اور وسائل کے تحفظ جیسے بڑے چیلنجز کا سامنا ہے، جن سے نمٹنے کے لیے مؤثر منصوبہ بندی اور بین الاقوامی تعاون ناگزیر ہے۔ انہوں نے بتایا کہ ترکیہ 2024 سے 2030 تک کے توانائی مؤثریت ایکشن پلان کے تحت 20 ارب ڈالر کی سرمایہ کاری کا ہدف رکھتا ہے، جس کا مقصد صنعت، ٹرانسپورٹ، زراعت اور عمارتوں سمیت مختلف شعبوں میں توانائی کے بہتر استعمال کو فروغ دینا ہے۔
ڈی ایٹ کے سیکریٹری جنرل سفیر سہیل محمود نے اپنے خطاب میں ترکیہ حکومت، وزارتِ توانائی و قدرتی وسائل اور زیرو ویسٹ فاؤنڈیشن کو اس اہم فورم کے انعقاد پر خراجِ تحسین پیش کیا۔ انہوں نے خاتونِ اوّل امینہ ایردوان کی قیادت کو سراہتے ہوئے کہا کہ زیرو ویسٹ اقدام اب ایک قومی پروگرام سے بڑھ کر عالمی تحریک کی شکل اختیار کر چکا ہے، جسے اقوامِ متحدہ کی جنرل اسمبلی کی سطح پر بھی پذیرائی حاصل ہوئی ہے۔
سفیر سہیل محمود نے کہا کہ ڈی ایٹ اپنے تعاون کے ایجنڈے میں پائیداری کو مسلسل مرکزی حیثیت دے رہا ہے، کیونکہ توانائی کی بچت، سرکلر اکانومی اور وسائل کا ذمہ دارانہ استعمال مستقبل کی معاشی مضبوطی اور پائیدار ترقی کے لیے نہایت ضروری ہیں۔ انہوں نے اس سلسلے میں ڈی ایٹ کے حالیہ اقدامات کا ذکر کیا، جن میں “D-8 Voices for a Zero-Waste Future” کے عنوان سے پہلی ورچوئل نمائش، باکو میں 13ویں ورلڈ اربن فورم کے دوران ڈی ایٹ انرجی اینڈ اربن ڈائیلاگ، اور یکم جون 2026 کو آذربائیجان کی میزبانی میں ڈی ایٹ وزرائے توانائی کے پہلے اجلاس کا انعقاد شامل ہے، جس میں “باکو اعلامیہ برائے توانائی تعاون” منظور کیا گیا۔
انہوں نے بتایا کہ باکو میں قائم کیا جانے والا ڈی ایٹ انرجی اینڈ کلائمیٹ سینٹر رکن ممالک کے درمیان توانائی کی مؤثریت، معدنی وسائل، موسمیاتی استحکام، جدت اور پائیدار ترقی کے شعبوں میں عملی تعاون کے لیے ایک اہم ادارہ جاتی پلیٹ فارم ثابت ہوگا۔
سیکریٹری جنرل نے اس موقع پر تین عملی تجاویز بھی پیش کیں۔ ان میں توانائی مؤثریت اور وسائل کے انتظام کے لیے گلوبل ساؤتھ پلیٹ فارم کا قیام، سرکلر اکانومی اور زیرو ویسٹ پارٹنرشپ اقدام کا آغاز، اور گرین سکوک سمیت جدید مالیاتی ذرائع کے ذریعے توانائی، قابلِ تجدید ذرائع اور سرکلر اکانومی منصوبوں کی مالی معاونت شامل ہے۔
انہوں نے ترک وزیر الپ ارسلان بیرقدار کی جانب سے کوپ 31 کے موقع پر انطالیہ میں ڈی ایٹ وزارتی اجلاس بلانے کی تجویز کا بھی خیرمقدم کیا اور کہا کہ یہ اقدام ڈی ایٹ رکن ممالک کے درمیان توانائی، ماحولیات اور پائیدار ترقی کے شعبوں میں تعاون کو مزید فروغ دینے کا اہم موقع فراہم کرے گا۔
اجلاس میں بنگلہ دیش، آذربائیجان، گنی، مالدووا، ترک جمہوریہ شمالی قبرص اور دیگر ممالک کے وزرا و اعلیٰ نمائندوں کے علاوہ عالمی بینک، بین الاقوامی قابلِ تجدید توانائی ایجنسی، ترک ریاستوں کی تنظیم، بلیک سی اکنامک کوآپریشن، اقوامِ متحدہ کے اداروں، تعلیمی حلقوں اور نجی شعبے کے نمائندوں نے بھی شرکت کی۔
شرکا نے اس بات پر اتفاق کیا کہ توانائی کے مؤثر استعمال، وسائل کے دانشمندانہ انتظام، سرمایہ کاری کے فروغ اور جدید ٹیکنالوجی کے استعمال کے ذریعے ہی ایک زیادہ محفوظ، پائیدار اور وسائل کے اعتبار سے مضبوط مستقبل کی بنیاد رکھی جا سکتی ہے۔