وزیراعظم شہباز شریف اور ترکیہ کے صدر رجب طیب ایردوان کے درمیان ٹیلیفونک رابطہ ہوا جس میں دونوں رہنماؤں نے ایک دوسرے کو عیدالاضحیٰ کی مبارکباد پیش کرتے ہوئے پاکستان اور ترکیہ کے عوام کے لیے نیک تمناؤں کا اظہار کیا۔
وزیراعظم شہباز شریف نے اس موقع پر ترک قیادت اور برادر عوام کے لیے خیرسگالی کے جذبات کا اظہار کرتے ہوئے کہا کہ پاکستان اور ترکیہ کے درمیان تعلقات محض سفارتی شراکت داری نہیں بلکہ تاریخ، ثقافت اور باہمی اعتماد پر قائم ایک مضبوط برادرانہ رشتہ ہیں۔
وزیراعظم ہاؤس کے مطابق گفتگو کے دوران دونوں رہنماؤں نے پاکستان اور ترکیہ کے درمیان حالیہ اعلیٰ سطحی روابط اور ملاقاتوں کا تفصیلی جائزہ لیا اور اس عزم کا اعادہ کیا کہ دوطرفہ تعلقات کو مزید وسعت دینے کے لیے مشترکہ فیصلوں پر تیز رفتار عملدرآمد یقینی بنایا جائے گا۔ اس موقع پر تجارت، سرمایہ کاری، دفاعی تعاون، توانائی، انفارمیشن ٹیکنالوجی اور انفراسٹرکچر سمیت مختلف شعبوں میں شراکت داری کو مزید فروغ دینے پر بھی اتفاق کیا گیا۔
دونوں رہنماؤں نے خطے کی مجموعی صورتحال اور جاری سفارتی و امن کوششوں پر بھی تبادلہ خیال کیا۔ وزیراعظم شہباز شریف نے علاقائی امن، استحکام اور مذاکرات کے فروغ کے لیے پاکستان کی کوششوں کی حمایت پر صدر اردوان کا شکریہ ادا کیا، جبکہ صدر اردوان نے خطے میں کشیدگی کم کرنے اور سیاسی حل کی کوششوں میں پاکستان کے کردار کو سراہا۔
ٹیلیفونک گفتگو میں اس بات پر بھی اتفاق کیا گیا کہ پاکستان اور ترکیہ خطے میں پائیدار امن، باہمی تعاون اور مشترکہ مفادات کے تحفظ کے لیے قریبی رابطے اور مشاورت کا سلسلہ جاری رکھیں گے۔ دونوں رہنماؤں نے اس عزم کا اعادہ کیا کہ اسلام آباد اور انقرہ کے درمیان اسٹریٹجک شراکت داری آنے والے دنوں میں مزید مضبوط ہوگی اور دونوں ممالک ہر اہم علاقائی و عالمی معاملے پر ایک دوسرے کے ساتھ تعاون جاری رکھیں گے۔