انقرہ: ڈی-8 تنظیم برائے اقتصادی تعاون کے سیکریٹری جنرل سفیر سہیل محمود نے 17 اور 18 اگست 2026 کو انقرہ کا دو روزہ سرکاری دورہ کیا، جس کے دوران انہوں نے اعلیٰ حکومتی حکام، جامعات و تحقیقی اداروں، صنعت و ٹیکنالوجی کے شعبے سے وابستہ شخصیات اور پارلیمنٹ کے ارکان سے اہم ملاقاتیں کیں۔
یہ دورہ ڈی-8 کے رکن ممالک کے درمیان ادارہ جاتی روابط مضبوط بنانے، باہمی تعاون کو مزید مؤثر بنانے اور تنظیم کے ترجیحی شعبوں میں عملی منصوبوں کو آگے بڑھانے کی کوششوں کا حصہ تھا۔
دورے کے دوران ڈی-8 کے سیکریٹری جنرل نے وزارتِ خارجہ میں جمہوریہ ترکیہ کی ڈی-8 کمشنر سفیر آئلِن سکیز کیوکسے ملاقات کی۔ ملاقات میں جنوری 2026 میں سفیر سہیل محمود کے منصب سنبھالنے کے بعد سے ڈی-8 کی مختلف سرگرمیوں اور اقدامات کا تفصیلی جائزہ لیا گیا۔
اس موقع پر تنظیم کی ادارہ جاتی استعداد بڑھانے، مختلف شعبوں میں تعاون کو وسعت دینے، رکن ممالک اور شراکت داروں کے ساتھ روابط مزید گہرے کرنے اور عالمی سطح پر ڈی-8 کے کردار، مؤثریت اور تشخص کو اجاگر کرنے کے حوالے سے بھی تبادلۂ خیال ہوا۔
سفیر سہیل محمود نے بانی رکن اور ڈی-8 سیکریٹریٹ کے میزبان ملک کی حیثیت سے ترکیہ کی مسلسل حمایت کو سراہتے ہوئے صدر رجب طیب اردوان اور وزیر خارجہ حاقان فیدان کی قیادت میں ترکیہ کے تعاون پر اظہارِ تشکر کیا۔ انہوں نے بالخصوص ترک وزارتِ خارجہ کی جانب سے ڈی-8 سیکریٹریٹ کو متعلقہ وزارتوں، سرکاری اداروں اور دیگر قومی اداروں کے ساتھ روابط میں فراہم کی جانے والی سہولتوں اور تنظیم کے مالی و انسانی وسائل کو مستحکم کرنے کی جاری کوششوں میں تعاون کو قابلِ تحسین قرار دیا۔
سیکریٹری جنرل نے جولائی 2026 میں استنبول میں ماحولیات کے حوالے سے ڈی-8 کی پہلی بین الاقوامی وزارتی کانفرنس کے کامیاب انعقاد پر بھی ترکیہ کو مبارک باد دی۔ اجلاس کے اختتام پر منظور ہونے والے تاریخی “استنبول اعلامیے“ کو ماحولیاتی تبدیلی سے نمٹنے کے لیے ڈی-8 کے مشترکہ اقدامات میں اہم پیش رفت قرار دیتے ہوئے کہا گیا کہ ترکیہ کی COP31 صدارت کے دوران موسمیاتی اقدامات کے حوالے سے رکن ممالک کے درمیان رابطہ مزید مضبوط بنایا جائے گا۔ ملاقات میں ترجیحی شعبوں میں تعاون تیز کرنے اور ڈی-8 کے فیصلوں کو عملی نتائج میں تبدیل کرنے کے طریقوں پر بھی غور کیا گیا۔
SESRIC کے ساتھ تعاون مزید بڑھانے پر اتفاق
ڈی-8 کے سیکریٹری جنرل نے اسلامی ممالک کے لیے شماریاتی، اقتصادی اور سماجی تحقیق و تربیت کے مرکز SESRIC کا بھی دورہ کیا، جہاں انہوں نے ادارے کی ڈائریکٹر جنرل زہرا زمرُت سلجوق سے ملاقات کی۔
ملاقات میں ڈی-8 اور SESRIC کے درمیان جاری تعاون کا جائزہ لیتے ہوئے شماریات، سماجی و اقتصادی تحقیق، استعدادِ کار میں اضافے اور تربیتی پروگراموں کے شعبوں میں تعاون کو مزید وسعت دینے پر تبادلۂ خیال کیا گیا۔ اس ضمن میں ڈی-8 کے ترجیحی شعبوں سے متعلق خصوصی تجزیاتی اور شماریاتی رپورٹس کی تیاری کی تجاویز بھی زیرِ غور آئیں۔
دونوں جانب سے باہمی اتفاقِ رائے کے شعبوں میں مشترکہ سرگرمیوں، کانفرنسوں اور ورکشاپس کے انعقاد کو فروغ دینے پر اتفاق کیا گیا، جبکہ بڑھتے ہوئے تعاون کو مزید منظم اور ادارہ جاتی بنیادوں پر استوار کرنے، بالخصوص باضابطہ تعاون کے کسی فریم ورک کے قیام کے امکانات کا جائزہ لینے کا فیصلہ بھی کیا گیا۔
ترکیہ کے ممتاز تھنک ٹینک سے تحقیقی شراکت داری پر گفتگو
سفیر سہیل محمود نے وزارتِ خارجہ ترکیہ سے وابستہ ممتاز تھنک ٹینک مرکز برائے تزویراتی تحقیق (SAM) کا دورہ بھی کیا، جہاں انہوں نے ادارے کے صدر پروفیسر ڈاکٹر رمضان اَرداغ سے ملاقات کی۔
ملاقات ڈی-8 کی جانب سے تھنک ٹینکس، جامعات، پالیسی ماہرین، دانشوروں اور نوجوانوں کے ساتھ روابط وسیع کرنے کی کوششوں کا حصہ تھی۔ دونوں جانب سے اس امر پر تبادلۂ خیال کیا گیا کہ SAM کی تحقیقی اور علمی صلاحیتوں کو ڈی-8 کے ترجیحی اہداف کے فروغ کے لیے کس طرح بروئے کار لایا جا سکتا ہے۔
اس موقع پر مشترکہ تحقیقی منصوبوں، پالیسی مکالموں، کانفرنسوں، گول میز اجلاسوں اور دیگر علمی سرگرمیوں کے انعقاد پر غور کیا گیا۔ ساتھ ہی ڈی-8 کے رکن ممالک میں قائم تھنک ٹینکس اور جامعات کے درمیان روابط اور باہمی تعاون بڑھانے کی ضرورت پر بھی زور دیا گیا۔
مصنوعی ذہانت، ٹیکنالوجی اور صنعتی تعاون ترجیحی شعبے
سیکریٹری جنرل نے اوسٹِم ٹیکنیکل یونیورسٹی کا بھی دورہ کیا، جہاں انہوں نے اوسٹِم آرگنائزڈ انڈسٹریل زون کے بورڈ کے چیئرمین اور اوسٹِم ٹیکنیکل یونیورسٹی کے بورڈ آف ٹرسٹیز کے چیئرمین اورحان آیدن، یونیورسٹی کے ریکٹر پروفیسر ڈاکٹر مراد یولک، اوسٹِم ٹیکنوپارک کے جنرل منیجر ڈاکٹر دریا چاغلار اور ادارے کے اعلیٰ حکام سے ملاقات کی۔
ملاقات میں ڈی-8 اور اوسٹِم ٹیکنیکل یونیورسٹی کے درمیان جاری تعاون کا جائزہ لیا گیا اور اس بات پر غور کیا گیا کہ اوسٹِم کے جامع جامعہ، صنعت اور ٹیکنالوجی کے ماحولیاتی نظام سے ڈی-8 کے رکن ممالک کس طرح فائدہ اٹھا سکتے ہیں۔
خصوصاً مصنوعی ذہانت، تحقیق و اختراع، ٹیکنوپارکس، کاروباری سرگرمیوں اور نئے کاروباری اداروں، چھوٹے اور درمیانے درجے کے کاروبار، صنعتی کلسٹرز، تحقیقی نتائج کو تجارتی سطح پر بروئے کار لانے اور جامعات و صنعت کے درمیان روابط مضبوط بنانے کے شعبوں میں تعاون کے امکانات کا جائزہ لیا گیا۔
سفیر سہیل محمود نے اس امر پر زور دیا کہ ڈی-8 کے رکن ممالک میں جامعات، ٹیکنوپارکس، محققین، کاروباری افراد اور چھوٹے و درمیانے درجے کے کاروباروں کو ایک دوسرے سے جوڑ کر ایسے عملی منصوبے شروع کیے جا سکتے ہیں جن کے نتیجے میں تنظیم کے رکن ممالک میں ٹیکنالوجی، اختراع اور اقتصادی ترقی کو نئی رفتار ملے گی۔
ترک پارلیمنٹ میں ڈی-8 کے کردار کو اجاگر کرنے پر تبادلۂ خیال
دورۂ انقرہ کے دوران ڈی-8 کے سیکریٹری جنرل نے ترکیہ کی گرینڈ نیشنل اسمبلی (TBMM) میں وان سے رکنِ پارلیمنٹ اور یورپی یونین ہم آہنگی کمیٹی کے چیئرمین برہان قایا ترک سے بھی ملاقات کی۔
سفیر سہیل محمود نے انہیں ڈی-8 کی ترجیحات، جاری سرگرمیوں اور مستقبل کے منصوبوں سے آگاہ کیا۔ ملاقات میں رکن ممالک کے درمیان اقتصادی تعاون، باہمی روابط اور عوامی سطح پر تعلقات کو مزید مضبوط بنانے کے امکانات پر تبادلۂ خیال کیا گیا۔
انہوں نے اس بات پر زور دیا کہ ڈی-8 کے بنیادی مقاصد اور مشن سے متعلق آگاہی بڑھانے اور تنظیم کے لیے وسیع تر ملکی سطح کی حمایت پیدا کرنے میں پارلیمانی روابط اہم کردار ادا کر سکتے ہیں۔
انڈونیشیا کے یومِ آزادی کی تقریب میں شرکت
دورۂ انقرہ کے دوران ڈی-8 کے سیکریٹری جنرل نے ترکیہ میں انڈونیشیا کے سفارت خانے کی جانب سے ملک کے 81ویں یومِ آزادی کے موقع پر دی گئی سفارتی استقبالیہ تقریب میں بھی شرکت کی۔
اس موقع پر انہوں نے ترکیہ میں انڈونیشیا کے سفیر احمد رضال پورناما سے ملاقات کی اور انڈونیشیا کی حکومت اور عوام کو یومِ آزادی کی مبارک باد پیش کی۔
ڈی-8 کے سیکریٹری جنرل کا دورۂ انقرہ دراصل تنظیم کے عملی اور نتیجہ خیز سفارتی روابط کے فروغ کی حکمتِ عملی کا عکاس ہے، جس کے تحت حکومتی اداروں کے ساتھ ساتھ تحقیقی مراکز، جامعات، صنعت، ٹیکنالوجی کے اداروں، تھنک ٹینکس اور پارلیمانی حلقوں کو بھی ڈی-8 کے تعاون کے دائرے میں شامل کیا جا رہا ہے۔
اس وسیع تر ادارہ جاتی رابطہ کاری کا مقصد رکن ممالک کے درمیان اقتصادی تعاون اور ترقی کے ایجنڈے کو محض اعلانات تک محدود رکھنے کے بجائے اسے ٹھوس شراکت داری، مشترکہ منصوبوں اور عملی نتائج میں تبدیل کرنا ہے۔
ڈی-8 کے سیکریٹری جنرل کے ایگزیکٹو اسسٹنٹ محمد بلال خان بھی اس دورے کے دوران ان کے ہمراہ تھے۔