ترک اداکاراؤں نے خوبصورتی کے عالمی مقابلے میں ایک بار پھر اپنی دھاک بٹھا دی۔ نیٹیزنز چوائس میگزین کی جانب سے کرائے گئے ’’2026 کی خوبصورت خاتون‘‘ کے سالانہ عوامی انتخاب میں تین ترک اداکاراؤں نے ٹاپ فائیو میں جگہ بنالی، جبکہ مجموعی طور پر چھ ترک اداکارائیں دنیا کی 20 خوبصورت ترین خواتین میں شامل ہوئیں۔
پہلی پانچ خوبصورت ترین اداکاروں میں تین ترک اداکاریں شامل
یہ انتخاب کسی جیوری، فیشن ماہرین یا میگزین کے مدیران کی پسند کی بنیاد پر نہیں بلکہ ہر سال کی طرح امسال بھی دنیا بھر کے عوام کے ووٹوں سے کیا گیا۔ ویب سائٹ، موبائل ایپلی کیشن اور سوشل میڈیا پلیٹ فارمز کے ذریعے لاکھوں افراد نے اپنے پسندیدہ امیدواروں کے حق میں ووٹ دیا۔ ہالی ووڈ کی معروف اداکاراؤں سے لے کر کے پاپ کی مقبول شخصیات تک، دنیا بھر سے نامور خواتین اس فہرست کا حصہ بنیں، تاہم ترک اداکاراؤں نے نمایاں پوزیشنیں حاصل کرکے سب کی توجہ اپنی جانب مبذول کرالی۔
پانچویں نمبر پر سو برجو یازگی جوشکونSU BURCU YAZGI COŞKUN
ترکیہ کی نوجوان اور مقبول اداکارہ سُو برجو یازگی چوشکون نے عالمی فہرست میں پانچویں پوزیشن حاصل کی۔ بیرون ملک بھی بڑی تعداد میں مداح رکھنے والی چوشکون نے ٹاپ فائیو میں جگہ بنا کر ترک اداکاراؤں کی شاندار کارکردگی میں اہم اضافہ کیا۔
تیسری پوزیشن یامور یوکسل YAĞMUR YÜKSELکے نام
یاغمور یوکسل نے تیسری پوزیشن حاصل کی۔ بیرون ملک بھی وسیع حلقۂ مداح رکھنے والی یوکسل اس سے قبل 2024ء میں اس انتخاب میں پہلی پوزیشن حاصل کرچکی ہیں۔ رواں سال تیسری پوزیشن حاصل کرنے کے ساتھ ہی گزشتہ تین برسوں کی فاتح خواتین پہلی تین پوزیشنوں پر یکجا ہوگئیں۔
سِلا تُرک اولو SILA TÜRKOĞLUدوسرے نمبر پر
2025ء میں دنیا کی خوبصورت ترین خاتون قرار پانے والی ترک اداکارہ سِلا تُرکوغلو اس بار پہلے نمبر کی پوزیشن برقرار نہ رکھ سکیں، تاہم انہوں نے دوسری پوزیشن حاصل کرکے ایک بار پھر اپنی مقبولیت ثابت کردی۔
پہلی پوزیشن تھائی اداکارہ کے نام
فہرست میں پہلی پوزیشن تھائی اداکارہ لنگ لنگ سِریلاک کوانگ نے حاصل کی، جنہیں 22 ملین سے زائد ووٹ ملے۔ گزشتہ سال کی فاتح سِلا تُرکوغلو دوسرے جبکہ 2024ء کی فاتح یاغمور یوکسل تیسرے نمبر پر رہیں۔
ٹاپ 20 میں چھ ترک اداکارائیں
ترک اداکاراؤں کی کامیابی صرف ٹاپ فائیو تک محدود نہیں رہی۔ اِلسو دمیرجی نے آٹھویں اور جمرے آردا نے دسویں پوزیشن حاصل کی، جبکہ معروف ترک ڈراما سیریل ’’دور شہر‘‘ (Uzak Şehir) میں ’’آلیا‘‘ کا کردار ادا کرنے والی اداکارہ سینم اُنصال بھی پہلی مرتبہ اس فہرست میں شامل ہوکر 19ویں نمبر پر رہیں۔
یوں 2026ء کی دنیا کی 20 خوبصورت ترین خواتین کی فہرست میں چھ ترک اداکاراؤں کی شمولیت نے نہ صرف ترک فنکاراؤں کی عالمی مقبولیت کو اجاگر کیا بلکہ بین الاقوامی سطح پر ترک ڈراموں اور ان کے فنکاروں کے بڑھتے ہوئے اثر و رسوخ کا بھی ایک اور ثبوت فراہم کردیا۔