پاکستان اور ترکیہ دو ایسے ممالک ہیں جو ہمیشہ ایک دوسرے کے سنگ سنگ رہتے ہوئے بین الاقوامی پلیٹ فارم پر ایک دوسرے کی نہ صرف کھل کر حمایت کرتے ہیں بلکہ دنیا کے دیگر ممالک کو بھی اپنی اس محبت میں پرونے کی کوشش کرتے ہیں ۔
صدر ایردوان نے 24 فروری سے جاری روس – یوکرین جنگ کے آغاز ہی سے اس جنگ کو رکوانے کے لیے اور خطے میں امن کے قیام کے لیے اپنی کوششوں کا آغاز کردیا۔ دنیا کے کسی اور لیڈر کو یہ اعزاز حاصل نہیں ہے کہ وہ روس کے صدر پوتن اور یوکرین کے صدر زیلنیسکی کے ساتھ مسلسل رابطے میں رہیں اور دونوں ممالک کے رہنماوں کو نہ صرف مذاکرات کی غرض سے ترکیہ مدعو کریں بلکہ دونوں ممالک کے درمیان جنگ کو رکوانے کے لیے صدر ایردوان خود بھی ان دونوں ممالک کا دورہ کریں اور مذاکرات کو جاری رکھیں۔ اگرچہ دیگر کئی ایک عالمی رہنماوں نے اپنے تئیں جن میں فرانس کے صدر ماکروں اور جرمنی کے صدر والٹر سٹئین مئیر بھی شامل ہیں، کوششیں کرچکے ہیں لیکن صدر ایردوان کو جو عزت و مقام صدر پوتن اور صدر زیلنسیکی کی نظروں میں حاصل ہے وہ کسی اور لیڈر کو نصیب نہیں ہوسکا ۔
صدر ایردوان نے امن کے قیام ہی کے لیے کوششیں صرف نہیں کی ہیں بلکہ انہوں نے دنیا کو غلے کی قلت خاص طور پر افریقی ممالک کو اس قلت سے بچانے کے لیے جو کردار ادا کیا ہے دنیا کا کوئی اور لیڈر ایسا کرنے کی سکت ہی نہیں رکھتا ہے۔ صدر ایردوان نے روس کی اجازت سے ترکیہ میں غلے کی راہداری کھول کر نہ صرف دنیا پر احسان کیا ہے بلکہ غلے کے قحط یا قلت کی وجہ سے دنیا میں جو بے چینی پیدا ہونی تھی اور غلے کی قیمتوں میں ہوشربا جو اضافہ ہونا تھا اس کی پیش بندی کرتے ہوئے انسانیت پر بہت بڑا احسان کیا ہے۔
صدر ایردوان کے اس انمول کردار کو محسوس کرتے ہوئے پاکستان سینٹ کے چئیرمین محمد صادق سنجرانی نے نوبل امن ایوارڈ کمیٹی کے اراکین کے نام اپنے خط میں صدر ایردوان کے نہ صرف اس جنگ کو رکوانے بلکہ اس جنگ کےنیوکلئیر جنگ کا روپ اختیار کرنے سے رکوانے کے لیے جو حتیٰ الوسع کوششیں صرف کی ہیں انکی ان کوششوں کے اعتراف کے طور پر نوبل امن ایوارڈ دینے کی درخواست کی ہے۔
پاکستان پہلا ملک ہے جس نے اپنے برادر اور دوست ملک اور پاکستان کے خیر خواہ صدر رجب طیب ایردوان کو نوبل امن ایوارڈ دلوانے کے لیے بین الاقوامی سطح پر اپنی کوششوں کا آغاز کیا ہے اور صدر ایردوان کو یہ نوبل امن ایوارڈ دلوانے تک اپنی کوششوں کو جاری رکھنے سے بھی آگاہ کیا ہے۔