پاکستان کے یومِ دفاع و شہدا کی مناسبت سے پاکستانی سفارتخانے انقرہ میں ایک پروقار استقبالیے کا اہتمام کیا گیا، جس میں ترکیہ کے وزیرِ قومی دفاع یاشار گیولر نے بطور مہمانِ خصوصی شرکت کی۔ تقریب میں ترک مسلح افواج کی اعلیٰ قیادت، سینئر حکام، سفارتی و عسکری نمائندوں اور پاکستانی کمیونٹی کی اہم شخصیات نے شرکت کی۔
تقریب میں ترک جنرل اسٹاف کے کمانڈر جنرل سلچوک بایراکتار اولو، ترک بری فوج کے کمانڈر جنرل متین توکل، بحریہ کے کمانڈر ایڈمرل ارجمنت طاطلی اولو اور فضائیہ کے کمانڈر جنرل رفعت دال کیران سمیت متعدد اعلیٰ ترک عسکری حکام موجود تھے۔ سابق نائب وزیرِاعظم و وزیرِ صحت رجپ آق داغ، نائب وزیرِ خارجہ حاجی علی اوزل، ڈی ایٹ کے سیکریٹری جنرل سہیل محمود، مختلف ممالک کے ملٹری اتاشیز، پاکستانی کمیونٹی کے نمائندوں اور دیگر ممتاز شخصیات نے بھی تقریب میں شرکت کی۔
استقبالیے کا آغاز تلاوتِ کلامِ پاک سے ہوا، جس کے بعد پاکستان اور ترکیہ کے قومی ترانے پیش کیے گئے۔ پاکستان ایمبیسی انٹرنیشنل اسٹڈی گروپ کے طلبہ نے اپنے نغموں سے حاضرین کے دل مو ہ لیے ، جبکہ دستاویزی فلموں کے ذریعے یومِ دفاع و شہدا کی تاریخی اہمیت اور پاکستانی قوم کی قربانیوں کو اجاگر کیا گیا۔
تقریب سے خطاب کرتے ہوئے ترکیہ کے وزیرِ قومی دفاع یاشار گیولر نے پاکستانی قوم کو یومِ دفاع و شہدا کی مبارکباد دی اور پاکستان کے شہدا اور غازیوں کو خراجِ عقیدت پیش کیا۔ انہوں نے پاکستان اور ترکیہ کے درمیان تاریخی رشتوں اور گہرے برادرانہ تعلقات کو اجاگر کرتے ہوئے پاکستان کو ترکیہ کا اہم تزویراتی شراکت دار قرار دیا۔
یاشار گیولر نے کہا کہ دونوں ممالک کے درمیان دفاع اور سلامتی کے شعبوں میں تعاون مسلسل فروغ پا رہا ہے اور باہمی اعتماد پر مبنی یہ شراکت داری خطے میں امن و استحکام کے لیے بھی اہمیت رکھتی ہے۔
ترک وزیرِ دفاع نے اپنے خطاب میں ترکیہ، پاکستان اور سعودی عرب کے مکہ دفاعی اتحاد کو خصوصی اہمیت دیتے ہوئے اسے تینوں ممالک کے درمیان تزویراتی تعاون کے حوالے سے ایک تاریخی پیش رفت قرار دیا۔ ان کے مطابق یہ اتحاد اجتماعی دفاعی صلاحیت اور بازدار قوت کو مضبوط بنانے کے ساتھ ساتھ خطے میں امن و استحکام کے قیام میں بھی اہم کردار ادا کرسکتا ہے۔
یاشار گیولر کا مکہ دفاعی اتحاد کے حوالے سے یہ بیان ایسے وقت میں سامنے آیا ہے جب پاکستان، ترکیہ اور سعودی عرب کے درمیان دفاعی اور سلامتی کے شعبوں میں تعاون نئی جہتیں اختیار کر رہا ہے۔ انقرہ میں منعقدہ یومِ دفاع و شہدا کی تقریب میں اس اتحاد کا اعلیٰ ترین ترک دفاعی قیادت کی جانب سے واضح اور مثبت انداز میں ذکر اس کی بڑھتی ہوئی تزویراتی اہمیت کی بھی عکاسی کرتا ہے۔
اس سے قبل پاکستان کے ترکیہ میں سفیر ڈاکٹر یوسف جنید نے اپنے خطاب میں قومی دفاع کے لیے جانوں کا نذرانہ پیش کرنے والے شہدا کو خراجِ عقیدت پیش کیا۔ انہوں نے کہا کہ پاکستانی قوم نے مشکل ترین حالات میں اتحاد، حوصلے اور استقامت کا مظاہرہ کیا، جبکہ پاکستانی مسلح افواج نے ملکی دفاع کے ساتھ ساتھ قدرتی آفات سے نمٹنے اور اقوامِ متحدہ کے امن مشنز میں بھی نمایاں خدمات انجام دی ہیں۔
ڈاکٹر یوسف جنید نے جموں و کشمیر کے تنازع کا بھی حوالہ دیتے ہوئے کہا کہ یہ مسئلہ تقسیمِ ہند کا ایک نامکمل ایجنڈا ہے اور آج بھی اقوامِ متحدہ کی سلامتی کونسل کے ایجنڈے پر موجود ہے۔ انہوں نے اس عزم کا اعادہ کیا کہ پاکستان اس دیرینہ تنازع کا پرامن حل اقوامِ متحدہ کی سلامتی کونسل کی متعلقہ قراردادوں اور جموں و کشمیر کے عوام کی آزادانہ مرضی کے مطابق چاہتا ہے۔
سفیر پاکستان کے خطاب سے قبل پاکستان کے دفاعی و فضائی اتاشی ایئر کموڈور محمد آصف بھٹی نے اپنے خطاب میں 6 ستمبر 1965ء کے شہدا اور غازیوں کو خراجِ عقیدت پیش کرتے ہوئے کہا کہ پاکستان کی مسلح افواج اور عوام نے ملکی دفاع کے لیے غیر معمولی جرأت اور قربانی کا مظاہرہ کیا۔ انہوں نے واضح کیا کہ پاکستان خطے میں امن و استحکام کا خواہاں ہے، تاہم اپنی خودمختاری، علاقائی سالمیت اور قومی سلامتی کے تحفظ کے لیے اپنے عزم سے بھی پوری طرح آگاہ ہے۔
تقریب کے اختتام پر پاکستان اور ترکیہ کے درمیان دوستانہ تعلقات کی علامت کے طور پر شرکاء کے ساتھ گروپ فوٹو بنوائی گئی، جبکہ پاکستانی سفارتخانے کی رہائش گاہ میں معزز مہمانوں کی پاکستانی کھانوں اور دیگر روایتی لوازمات سے تواضع کی گئی۔