ترکیہ میں اپوزیشن کے چھ جماعتی اتحاد ’ملت اتحاد‘ نے زلزلے سے متعلق خصوصی ایجنڈے کےساتھ ہونے والے اجلاس کے بعد تحریر بیان جاری کیا ہے۔ چار گھنٹے جاری رہنے والے خصوصی اجلاس کی پریس کوریج کی اجازت نہیں دی گئی ۔
ملت اتحاد
’ تعمیرات سے متعلق ایمنسٹی‘
بیان میں کہا گیا ہے کہ ترکیہ جہاں اکثرو بیشتر زلزلے آتے رہتے ہیں ۔ حالات نے ثابت کردیا ہے کہ زلزلے سے قبل کسی قسم کی کوئی تیار نہیں کی گئی تھی اور نہ ہی کوئی احتیاطی تدابیر اختیار کی گئی تھیں۔ ترکیہ کا ڈیزاسٹر اینڈ مینجمنٹ ادارہ AFAD جو اس سے قبل وزارتِ اعظمیٰ کے تحت کام کرتا تھا موجودہ دور میں کمزور پڑنے کی اصلی وجہ میرٹ اور صلاحیت کی پرواہ کیے بغیر اعلیٰ عہدوں پر افسران کی تقرریکرنا ہے۔ زلزلے کے جھٹکوں اور شدت کا مقابلہ کرنے سے متعلق کسی قسم کی رپورٹ پیش کیے بغیر سب کو ایمنسٹی دیا جانا اور کنسٹرکشن کے شعبے میں رشوت کے دروازے پوری طرح کھول دیے جانے اور بے بہا آمدنی کا ذریعہ بنائے جانے کی وجہ سےبڑے پیمانے پر زلزلے سے ہلاکتیں ہوئی ہیں ۔
بیان میں کہا گیا ہے کہ ملک کے تمام اداروں میں میرٹ آزادی اور شفافیت کی کمی کی وجہ سے ڈیزاسٹر مینجمنٹ ادارہ بھی زلزلے سے نمٹنے میں بُری طرح متاثر ہوا ہے۔ ملک میں بیوروکریٹس کے اپنے تئیں اقدمات اٹھانے کی صلاحیت سے عاری ہونے اور تمام احکامات صدارتی نظام کی وجہ سے صرف اور صرف ایک شخص کے ہاتھوں ہونے کی وجہ سے بڑے پیمانے پر جانی اور مالی نقصان اٹھانا پڑا ہے ۔ بدقسمتی سے زلزلے کے فوراً بعد تباہی سے بچنے کے عمل میں کسی قسم کا کوئی نظم و نسق نہیں دیکھا گیا ہے جسکی وجہ سے تاخیر ہوئی بڑے پیمانے پر جانی نقصان اٹھانا پڑا۔ یہ ایک تلخ حقیقت ہے کہ بنیادی ضروریات کی فراہمی اور امدادی سرگرمیوں کو درست طریقے سے مربوط نہیں کیا جاسکا، نتیجتاً تباہی کے اثرات سنگین سطح پرمرتب ہوئے ہیں۔ بدقسمتی سے، میونسپلٹیز اور این جی اوز کے درمیان فرق کیا گیا اور اس عمل میں ان کی شمولیت میں تاخیر ہوئی ہے۔ ایک ہی مرکز سے کیے جانے والے فیصلوں کی وجہ سے سست روئی دیکھی گئی۔ قانون نافذ کرنے والے اہلکاروں، کان کنوں اور تعمیراتی مشینوں کو فیلڈ میں تاخیر سے روانہ کیا گیا، سوشل میڈیا پلیٹ فارمز کی راہ میں رکاوٹیں کھڑی کرنے ، اسٹاک مارکیٹ کو بند نہ کرنے جیسے غیر معقول طریقے اپنانے سے ناقابلِ تلافی نقصان ہوا ہے۔
’ ہمیں اپنے شہر اور مستقبل کو مشترکہ کاوشوں اور پلاننگ ہی سے تعمیر کرنے کی ضرورت ہے‘
بیان میں حکومت پر الزام لگایا گیا ہے کہ حکومت نے زلزلے کے علاقے میں مناسب اقدامات نہیں کیے، حکومت نے ابھی تک پناہ گاہوں، موبائل ٹوائلٹس اور حفظان صحت کے حوالے سے مناسب اقدامات نہیں کیے اور نہ ہی اس نے وبائی امراض کے خطرے کے خلاف ضروری اقدامات کیے ہیں۔ زلزلے سے متاثرہ علاقوں سے دوسرے علاقوں میں نقل مکانی کے حوالے سے کوئی منصوبہ بندی یا رہنمائی نہیں کی گئی۔ تمام خرابیاں اور کوتاہیاں سب کے سامنے ہے۔ قومی اتحاد کے طور پر، ہمارے کندھوں پر بھاری ذمہ داریاں عائد ہوتی ہیں۔ اب ایک مشکل امتحان ہمارا منتظر ہے۔ اس تباہی سے سبق سیکھ کر ہمیں پلاننگ کرتے ہوئے نئے شہروں کو تعمیر کرنا ہوگا۔ ہم مختصر، درمیانی اور طویل مدتی کاموں کے لیے ایک کمیشن قائم کریں گے اور زلزلے کے اثرات کے خاتمے کے لیے مشترکہ تحقیقات کریں گے۔
’آفت کے علاقوں میں غیر ملکیوں کو مکانات، زمین اور پلاٹس کی فروخت ممنوع قرار دی جائے‘
بیان میں حکومت کو متنبہ کیا گیا ہے کہ آفت زدہ علاقوں میں غیر ملکیوں کو مکانات، پلاٹس اور زمینوں کی فروخت فوری طور پر ممنوع قرار دی جائے۔ خطے کی تعمیر نو کے دوران، خاص طور پر حطائے سمیت تمام اعلاقوں میں آبادیاتی اور سماجی ڈھانچے کو محفوظ رکھنا بہت اہمیت کا حامل ہے۔ ہم خاص طور پر اس مسئلے کی پیروی کر رہے ہیں۔
’یونیورسٹیوں میں آن لائن ایجوکیشن کے فیصلے پر نظرثانی کرنے کی ضرورت ہے‘
حکومت کو یونیورسٹیوں میں چھٹیوں کا اعلان کرتے ہوئے آن لائن ایجوکیشن کو جاری رکھنے کے فیصلے پر فوری طور پر نظر ثانی کرنے اور یونیورسٹیاں کھولنے کی ضرورت ہے۔ بیان میں کہا گیا ہے کہ نوجوانوں کو معیاری تعلیم کے حق سے محروم کر نے کا فیصلہ حقیقت پر مبنی فیصلہ نہیں ہے۔ اسے فوری طور پر واپس لینے کی ضرورت ہے۔ سیاحت کے شعبے کی استعداد اور میٹروپولیٹن شہروں میں خالی مکانات کو ہمارے زلزلہ زدگان کی پناہ گاہوں کی ضروریات کے لیے استعمال کرنے کی ضرورت ہے اور اس سمت میں فوری طور پر کام شروع کیا جانا چاہیے۔