رپورٹ : ڈاکٹر فرقان حمید
14 اگست 2025ء کی شام، انقرہ کا آسمان سورج کے ڈھلتے رنگوں اور لہراتے سبز ہلالی پرچموں سے آراستہ تھا۔ ہلکی ہوا میں ملی نغموں کی دھنیں گونج رہی تھیں اور پاکستان ہاؤس کا ہر گوشہ محبت، خوشی اور بھائی چارے کے رنگوں سے سجا ہوا تھا۔ اس شام سفارت خانۂ پاکستان انقرہ نے پاکستان کے 78ویں یومِ آزادی کے موقع پر ایک ایسی تقریب کا اہتمام کیا جو محض ایک سفارتی استقبالیہ نہیں بلکہ تاریخ، ثقافت اور دوستی کا زندہ استعارہ تھی۔
وطن کی خوشبو اور روایتی مہمان نوازی
پاکستان ہاؤس میں داخل ہوتے ہی مہمان ایک ایسے ماحول میں پہنچ جاتے جہاں ہر رنگ اور ہر خوشبو پاکستان کی یاد دلاتی تھی۔ داخلی راستے پر پاکستانی پرچم کے رنگوں میں سجی آرائش، تازہ پھولوں کی خوشبو، اور روایتی ملبوسات پہنے میزبانوں کی مسکراہٹیں ، یہ سب مل کر ایک ایسا منظر تخلیق کر رہے تھے جو دل کو فوراً چھو لے۔مہمانوں کے استقبال میں وہی خلوص اور گرمی جھلک رہی تھی جو پاکستان کی ثقافت کا بنیادی حوالہ ہے۔
تقریب کا آغاز ، روحانیت اور ولولے کے ساتھ
پروگرام کا آغاز تلاوتِ کلامِ پاک سے ہوا جس نے محفل کو ایک روحانی سکون عطا کیا۔ اس کے بعد پاکستان اسکول کے بچوں نے پاکستان اور ترکیہ کے قومی ترانے نہایت والہانہ جذبے سے پیش کیے۔ حاضرین میں بیٹھے ترک اور پاکستانی مہمان، سب کے سب ان طلباء کی آوازوں سے مسحور ہو گئے۔
معرکۂ حق:ترک فوجی دستے کی تقریب میں شرکت
تقریب کا سب سے متاثر کن لمحہ وہ تھا جب حالیہ “معرکۂ حق” اور “آپریشن بنیانُ المرصوص” کی کامیابیوں پر مشتمل ایک دستاویزی فلم دکھائی گئی۔ یہ فلم محض ایک عسکری کارنامہ نہیں بلکہ دو قومی نظریے کی تازہ دھڑکن تھی۔ اس میں پاکستان کی بہادر افواج کی جرأت، قربانی اور عزم کو اس انداز میں پیش کیا گیا کہ سامعین کے دل فخر سے بھر گئے۔
اس دستاویز میں پاکستان کے یومِ آزادی کی مرکزی تقریب میں ترک فوجی دستے کی شمولیت کا منظر بھی شامل تھا ، ایک ایسا لمحہ جو صرف سفارتی تعلقات نہیں بلکہ دلوں کے رشتے کی دلیل تھا۔
مہمانِ خصوصی برہان قایا ترک کے تاریخی الفاظ
تقریب کے معزز مہمان، سابق چیئرمین پاکستان-ترکیہ پارلیمانی دوستی گروپ اور ترک گرینڈ نیشنل اسمبلی کے رکنِ پارلیمنٹ جناب برہان قایا ترک نے اپنے خطاب میں کہا:
“پاکستان اور ترکیہ کا رشتہ اللہ کی عطا کردہ نعمت ہے، جس کی بنیاد اعتماد، احترام اور محبت پر ہے۔“
انہوں نے اپنی ذاتی زندگی کا ایک دلچسپ باب بیان کیا کہ انہوں نے اپنی طالب علمی کے قیمتی سال پاکستان میں گزارے، اور وہاں کے عوام کی محبت کو اپنی زندگی کا انمول سرمایہ قرار دیا۔
اسی موقع پر ترک گرینڈ نیشنل اسمبلی کے رکن اور چیئرمین پاکستان-ترکیہ پارلیمانی دوستی گروپ جناب علی شاہین کا اردو میں دیا گیا خصوصی پیغام بھی سنایا گیا۔ ان کے الفاظ میں دونوں ممالک کے رشتے کی گہرائی اور اسے آئندہ نسلوں تک برقرار رکھنے کی خواہش جھلک رہی تھی۔
سفیر پاکستان کا ولولہ انگیز خطاب
پاکستان کے سفیر برائے ترکیہ، ڈاکٹر یوسف جُنید نے اپنے خطاب میں پاکستانی کمیونٹی کی خدمات کو سراہتے ہوئے کہا کہ وہ پاکستان کے مثبت تشخص کو اجاگر کرنے، قومی مفادات کے فروغ اور دونوں ممالک کے عوام کو قریب لانے میں نمایاں کردار ادا کر رہی ہے۔ انہوں نے بانیانِ پاکستان کی قربانیوں کو خراجِ عقیدت پیش کرتے ہوئے عزم ظاہر کیا کہ پاکستان امن، ترقی اور خوشحالی کی راہ پر گامزن رہے گا۔ انہوں نے کہا کہ بانیانِ پاکستان کی قربانیاں محض تاریخ کا حصہ نہیں بلکہ ہمارے مستقبل کی سمت کا تعین کرتی ہیں۔
انہوں نے “معرکۂ حق” اور “آپریشن بنیانُ المرصوص” کی کامیابیوں کا حوالہ دیتے ہوئے کہا کہ یہ فتوحات نہ صرف عسکری میدان میں پاکستان کی طاقت کی علامت ہیں بلکہ دو قومی نظریے کی حقانیت کا عملی ثبوت بھی ہیں۔ انہوں نے کشمیر کے مسئلے پر پاکستان کے اصولی مؤقف کو دہراتے ہوئے کہا کہ پاکستان اپنے کشمیری بھائیوں کے ساتھ غیر متزلزل یکجہتی قائم رکھے گا اور ان کے جائز حقِ خود ارادیت کے لیے سیاسی، اخلاقی اور سفارتی حمایت جاری رکھے گا۔
تقریب کا اختتام : محبت اور امید کے ساتھ
اختتامی لمحات میں پاکستان کی ترقی، امن اور خوشحالی کے لیے اجتماعی دعائیں کی گئیں۔ اس کے بعد مہمان پاکستانی کھانوں اور مٹھائیوں سے لطف اندوز ہوئے، اور میٹھے آموں کی خوشبو نے محفل میں ایک اور چاشنی گھول دی۔
یہ شام محض ایک یومِ آزادی کی تقریب نہیں تھی۔ یہ ایک پیغام تھا کہ پاکستان اور ترکیہ کا رشتہ وقت کی دھول میں مٹنے والا نہیں، بلکہ ہر گزرتے سال کے ساتھ اور گہرا اور مضبوط ہو رہا ہے۔ انقرہ کی اس یادگار رات نے ایک بار پھر ثابت کر دیا کہ دو قومیں اگر دلوں سے جڑی ہوں تو فاصلے اور سرحدیں محض نقشے کی لکیریں رہ جاتی ہیں۔