نیویارک: 2026 فیفا ورلڈ کپ کا فائنل کل 19 جولائی بروز اتوار ترکیہ کے مقامی وقت کے مطابق رات دس بجے اور پاکستان کے وقت کے مطابق رات بارہ بجے اسپین اور ارجنٹینا کے درمیان کھیلا جائے گا، تاہم یہ مقابلہ صرف عالمی چیمپئن کے تعین تک محدود نہیں رہے گا بلکہ ٹورنامنٹ کی تاریخ میں کئی نئی روایات اور منفرد ریکارڈ بھی قائم کرے گا۔
نیویارک نیو جرسی اسٹیڈیم میں تقریباً 80 ہزار شائقین کی موجودگی میں ہونے والے اس فائنل کے دوران پہلی مرتبہ سپر باؤل کی طرز پر وقفۂ میں شاندار موسیقی اور تفریحی شو پیش کیا جائے گا۔
اس خصوصی شو کی نگرانی معروف بینڈ کولڈ پلے کے مرکزی گلوکار کرس مارٹن کر رہے ہیں، جبکہ عالمی شہرت یافتہ فنکاروں میں جسٹن بیبر، شکیرا، برنا بوائے، بی ٹی ایس، میڈونا اور وینزویلا کے معروف آرکسٹرا کنڈکٹر گستاوو دودامیل اپنی فنکارانہ صلاحیتوں کا مظاہرہ کریں گے۔
فیفا نے اس پروگرام کے ذریعے دنیا بھر کے بچوں کو معیاری تعلیم اور فٹ بال کی بہتر سہولتیں فراہم کرنے کے لیے 100 ملین ڈالر جمع کرنے کا ہدف مقرر کیا ہے۔ تاہم اس شو کے دورانیے پر بحث جاری ہے۔ اگرچہ فیفا نے ابتدا میں وقفۂ کے دوران صرف 11 منٹ کی پرفارمنس کا اعلان کیا تھا، لیکن مجموعی وقفہ 20 منٹ سے بھی زیادہ ہونے کا امکان ظاہر کیا جا رہا ہے۔
گزشتہ برس اسی اسٹیڈیم میں کلب ورلڈ کپ کے فائنل کے دوران موسیقی کا پروگرام تقریباً 10 منٹ جاری رہا تھا، تاہم پورا وقفہ 24 منٹ سے تجاوز کر گیا تھا۔ دوسری جانب بین الاقوامی فٹ بال ایسوسی ایشن بورڈ (IFAB) کے قوانین کے مطابق ہاف ٹائم کا دورانیہ 15 منٹ سے زیادہ نہیں ہونا چاہیے، البتہ ریفری کی منظوری سے اس میں تبدیلی کی جا سکتی ہے۔
چیمپئن ٹیم کو پہلی مرتبہ خصوصی رنگ بھی دی جائے گی
ورلڈ کپ کی تاریخ میں پہلی بار فاتح ٹیم کے کھلاڑیوں کو روایتی ٹرافی اور تمغوں کے ساتھ خصوصی چیمپئن شپ رنگ بھی دی جائے گی۔
ایوارڈ تقریب کے دوران ابتدائی طور پر فاتح ٹیم کے کپتان اور ہیڈ کوچ کو علامتی رنگ پیش کی جائے گی، جبکہ بعد ازاں 30 ذاتی نوعیت کی خصوصی رنگز تیار کر کے چیمپئن کھلاڑیوں کے حوالے کی جائیں گی۔ اس رنگ کے ایک جانب فیفا ورلڈ کپ کی ٹرافی جبکہ دوسری جانب فاتح ٹیم کی شناخت پر مبنی منفرد ڈیزائن کندہ ہوگا۔
ورلڈ کپ میں اسپین اور ارجنٹینا کا دوسرا تاریخی آمنا سامنا
دونوں ٹیمیں ورلڈ کپ کی تاریخ میں صرف دوسری مرتبہ ایک دوسرے کے مدمقابل آئیں گی۔ اس سے قبل 1966 کے ورلڈ کپ کے گروپ مرحلے میں ارجنٹینا نے اسپین کو 1-2 سے شکست دی تھی۔
یہ بھی پہلی مرتبہ ہوگا کہ موجودہ یورپی چیمپئن اور موجودہ جنوبی امریکی چیمپئن ورلڈ کپ کے فائنل میں آمنے سامنے ہوں گے۔ مزید برآں، 1992 میں فیفا عالمی رینکنگ کے اجراء کے بعد پہلی مرتبہ عالمی درجہ بندی کی پہلی اور دوسری نمبر کی ٹیمیں ورلڈ کپ کے فائنل میں ٹکرائیں گی۔
اسپین دوسری، ارجنٹینا چوتھی عالمی فتح کا خواہاں
اسپین 2010 کے بعد اپنی دوسری عالمی چیمپئن شپ حاصل کرنے کے لیے میدان میں اترے گا، جبکہ ارجنٹینا 1978، 1986 اور 2022 کے بعد چوتھی مرتبہ عالمی تاج اپنے نام کرنے کا خواہش مند ہے۔
اگر اسپین کامیاب ہو جاتا ہے تو وہ ایک سے زائد مرتبہ ورلڈ کپ جیتنے والی ساتویں قوم بن جائے گا۔ مزید برآں، لوئس ڈی لا فوئنٹے کی قیادت میں اسپین مردوں اور خواتین دونوں کی عالمی چیمپئن ٹیموں کا اعزاز بیک وقت رکھنے والا دنیا کا پہلا ملک بھی بن جائے گا۔
دفاعی اعتبار سے اسپین کی شاندار کارکردگی
اسپین نے اس ورلڈ کپ میں غیر معمولی دفاعی کھیل کا مظاہرہ کیا ہے۔ ٹیم نے مسلسل چھ میچوں میں اپنی گول پوسٹ محفوظ رکھتے ہوئے ایک نیا عالمی ریکارڈ قائم کیا، جبکہ پورے ٹورنامنٹ میں سات میچوں کے دوران صرف ایک گول کھایا، جو کوارٹر فائنل میں بیلجیم کے خلاف ہوا تھا۔ اسپین کے گول کیپر اونائی سیمون کی کارکردگی اس کامیابی میں کلیدی حیثیت رکھتی ہے۔
ڈی لا فوئنٹے کا ناقابلِ شکست سفر
اسپین کے ہیڈ کوچ لوئس ڈی لا فوئنٹے نے ورلڈ کپ اور یورپی چیمپئن شپ میں اب تک کوئی میچ نہیں ہارا۔ 65 سالہ کوچ نے دونوں بڑے ٹورنامنٹس میں مجموعی طور پر 14 میچوں میں ٹیم کی قیادت کرتے ہوئے 13 فتوحات اور ایک ڈرا حاصل کیا۔
اسپین اس وقت مسلسل 37 بین الاقوامی میچوں سے ناقابلِ شکست ہے، جن میں 28 کامیابیاں اور 9 برابر نتائج شامل ہیں۔ اس طرح اس نے اٹلی کے طویل ناقابلِ شکست رہنے کے ریکارڈ کی بھی برابری کر لی ہے۔
اسکالونی کی نظریں تاریخی اعزاز پر
ارجنٹینا کے کوچ لیونل اسکالونی اگر اپنی ٹیم کو فائنل میں فتح دلا دیتے ہیں تو وہ اٹلی کے عظیم کوچ وٹوریو پوتزو کے تاریخی ریکارڈ کے برابر آ جائیں گے، جنہوں نے 1934 اور 1938 میں مسلسل دو ورلڈ کپ جیتنے کا منفرد اعزاز حاصل کیا تھا۔
میسی ایک اور تاریخی سنگِ میل کے قریب
39 سالہ لیونل میسی اگر فائنل میں میدان میں اترتے ہیں تو وہ برازیل کے عظیم کپتان کافو کے بعد تین مختلف ورلڈ کپ فائنلز کھیلنے والے دنیا کے صرف دوسرے فٹبالر بن جائیں گے۔
اگر میسی اس مقابلے میں گول کرنے میں کامیاب رہے تو وہ دو مختلف ورلڈ کپ فائنلز میں گول کرنے والے تاریخ کے چھٹے مرد کھلاڑی ہوں گے۔ اس سے قبل واوا، پیلے، پال بریٹنر، زین الدین زیدان اور کیلیان ایمباپے یہ اعزاز حاصل کر چکے ہیں۔
دوسری جانب ارجنٹینا کے مڈفیلڈر الیکسس میک ایلسٹر بھی ایک منفرد ریکارڈ اپنے نام کر چکے ہیں۔ وہ مسلسل 13 ورلڈ کپ میچ کھیلنے کے باوجود شکست نہ کھانے والے تاریخ کے پہلے فٹبالر بن گئے ہیں۔