ترکیہ اور قطر کی کاوشوں سے افغانستان اور پاکستان کے درمیان جنگ بندی کا معاہدہ
گزشتہ کئی روز سے جاری خونریز جھڑپوں کے بعد ترکیہ کی مؤثر سفارتی کوششوں اور ثالثی کے نتیجے میں افغانستان اور پاکستان نے ہنگامی جنگ بندی پر اتفاق کر لیا۔ دوحہ میں ہونے والے تاریخی مذاکرات میں دونوں ملکوں نے پائیدار امن اور استحکام کے لیے مشترکہ نظام اور رابطہ جاتی ڈھانچے قائم کرنے پر اتفاق کیا۔ اس پیش رفت کے بعد ترکیہ کی وزارتِ خارجہ کی جانب سے جاری بیان میں کہا گیاکہ ترکیہ، دونوں برادر ممالک اور خطے میں پائیدار امن و استحکام کے قیام کے لیے اپنی حمایت جاری رکھے گا۔
صدر ایردوان کی ہدایت پر خفیہ سروس (MIT) کے سربراہ ابراہیم قالن کا کردار
سلامتی سے متعلق باوثوق ذرائع کے مطابق، صدر ایردوان کے خصوصی حکم پر ایم آئی ٹی کے سربراہ ابراہیم کالن نے پاکستان اور افغانستان کے وفود کے ساتھ قطر کے دارالحکومت دوحہ میں ہونے والے مذاکرات میں براہِ راست شرکت کی۔
ترکیہ اور قطر کی مشترکہ ثالثی میں ہونے والے ان مذاکرات کے دوران دونوں فریقین کے درمیان براہِ راست مکالمہ ممکن ہوا۔ بات چیت کا مقصد سرحدی کشیدگی کا خاتمہ اور دیرپا امن کا قیام تھا۔
گزشتہ کئی دنوں سے جاری خونریز تصادم کے بعد قطر نے اعلان کیا کہ افغانستان اور پاکستان نے فوری جنگ بندی پر رضامندی ظاہر کر دی ہے۔ دونوں ممالک، جن کے درمیان حالیہ جھڑپوں میں درجنوں افراد ہلاک اور سیکڑوں زخمی ہوئے، بحران کے آغاز کے بعد پہلی بار ایک ہی میز پر آمنے سامنے بیٹھے۔
دوحہ میں تاریخی ملاقات: ترکیہ بطور ثالث
قطر کی وزارتِ خارجہ نے اتوار کے روز اعلان کیا کہ افغانستان اور پاکستان کے وفود دوحہ میں ایک اہم اجلاس میں شریک ہوئے۔ مذاکرات کے دوران فریقین نے دیرپا امن و استحکام کے لیے مشترکہ میکانزم تشکیل دینے اور آئندہ مذاکرات کے تسلسل پر اتفاق کیا۔
پاکستان اور افغانستان کے درمیان کئی دنوں سے جاری سرحدی جھڑپوں کے بعد بالآخر جنگ بندی کا فیصلہ سامنے آیا۔ اس پورے عمل میں صدر رجب طیب ایردوان کی ہدایت پر ترکیہ کی خفیہ ایجنسی (ایم آئی ٹی) نے فعال کردار ادا کیا۔
دونوں ممالک کے خفیہ اداروں اور وزرائے دفاع کی شرکت
جنگ بندی سے متعلق اس اہم اجلاس میں دونوں ممالک کے خفیہ اداروں کے سربراہان اور وزرائے دفاع شریک ہوئے۔ اجلاس کا مرکزی ایجنڈا حالیہ سرحدی جھڑپوں کے بعد جنگ بندی کے تسلسل اور پرتشدد واقعات کے پائیدار حل سے متعلق نکات پر مشتمل تھا۔
مذاکرات رات گئے تک جاری رہے، اور ترکیہ، پاکستان اور قطر کے رہنماؤں کو لمحہ بہ لمحہ اس عمل سے آگاہ رکھا گیا۔
جنگ بندی کے تکنیکی پہلو وں پر استنبول میں غور کیا جائے گا
دوحہ مذاکرات کے اختتام پر فریقین اس بات پر متفق ہوئے کہ جنگ بندی کو پائیدار اور قابلِ تصدیق بنانے کے لیے ایک تکنیکی کمیٹی تشکیل دی جائے۔یہ طے پایا کہ اس کمیٹی کا پہلا اجلاس استنبول میں منعقد ہوگا۔
چودہ گھنٹے طویل مذاکرات کے بعد سامنے آنے والے فیصلے نے ایک بار پھر خطے میں استحکام اور مکالمے کے فروغ کے حوالے سے ترکیہ کے کلیدی کردار کو نمایاں کر دیا۔
دہشت گردی، نقل مکانی اور سرحدی سلامتی زیرِ غور ہوں گے
استنبول میں ہونے والے آئندہ اجلاس میں دہشت گردی کے خلاف اقدامات، پناہ گزینوں کے انتظام اور سرحدی سلامتی جیسے اہم امور پر تبادلۂ خیال کیا جائے گا۔ فریقین نے طویل المدتی حل کے لیے تکنیکی سطح پر مسلسل رابطہ برقرار رکھنے پر اتفاق کیا۔
11 اکتوبر کو تین ملکی انٹیلیجنس اجلاس ہوا تھا
یہ پیش رفت اس ملاقات کے بعد سامنے آئی ہے جو 11 اکتوبر کو استنبول میں ترکیہ، پاکستان اور قطر کے انٹیلیجنس سربراہان کے درمیان منعقد ہوئی تھی۔ اس دوران افغانستان کے ساتھ بھی بیک وقت رابطے جاری رکھے گئے تھے۔
ایک ہفتے میں درجنوں ہلاکتیں اور سینکڑوں زخمی
سرحدی علاقوں میں ایک ہفتے سے زیادہ عرصے تک جاری رہنے والی جھڑپوں میں دونوں جانب سے درجنوں فوجی اور شہری ہلاک ہوئے۔ افغانستان کے مشرقی صوبہ پکتیکا میں پاکستان کی فضائی کارروائی میں جاں بحق ہونے والوں کی نمازِ جنازہ میں ہزاروں افراد شریک ہوئے۔
پاکستان کا مؤقف: کارروائیاں دہشت گردی کے خلاف ردِعمل تھیں
پاکستانی حکام نے وضاحت کی کہ فضائی حملے سرحد پار سے ہونے والی دہشت گرد کارروائیوں کے خاتمے کے لیے کیے گئے تھے۔انہوں نے کہا کہ یہ حملے شدت پسند گروپ حافظ گل بہادر کے ٹھکانوں پر کیے گئے، جو ایک روز قبل خیبر پختونخوا میں ہونے والے خودکش حملے کے ردِعمل میں تھے۔
ترکیہ کی وزارتِ خارجہ کا مؤقف
ترکیہ کی وزارتِ خارجہ نے اپنے بیان میں کہا کہ ترکیہ، دونوں برادر ممالک اور پورے خطے میں پائیدار امن و استحکام کے قیام کے لیے اپنی حمایت اور کوششیں جاری رکھے گا۔