ترکیہ کے صدرِ مملکت اور جسٹس اینڈ ڈیولپمنٹ پارٹی کے سربراہ رجب طیب ایردوان نے ایسکی شہر کے ضلع میحال غازی کی بلدیہ کی چئیر پرسن زینب گونیش آق گیون سے ٹیلی فون پر رابطہ کر کے اُن کے خلاف سوشل میڈیا پر کیے جانے والے توہین آمیز حملوں کی سختی سے مذمت کی اور اُن سے مکمل حمایت و یکجہتی کا اظہار کیا ہے۔
یہ رابطہ آق پارٹی کی مرکزی مجلسِ عاملہ (MYK) کے اجلاس کے دوران قائم کیا گیا، جس میں صدر ایردوان نے بلدیہ کی چئیر پرسن زینب گونیش آق گیون کو بدھ کے روز منعقد ہونے والے پارٹی کے پارلیمانی گروپ اجلاس میں خصوصی طور پر شرکت کی دعوت دی۔ صدرِ مملکت نے نہایت پُراثر اور حوصلہ افزا انداز میں کہا کہ وہ سو خواتین کے ہمراہ اجلاس میں شریک ہوں اور اس موقع پر اتحاد، وقار اور تبدیلی کی علامت کے طور پر سفیددوپٹہ یا شال زیبِ تن کریں۔
صدر ایردوان نے گفتگو کے دوران اس امر پر زور دیا کہ حکومت فوجی دور کے آئین سے نجات اور ایک سویلین آئین کی تشکیل کے لیے سنجیدہ اور مسلسل کوششیں کر رہی ہے۔ انہوں نے بلدیہ کی چئیر پرسن زینب گونیش آق گیون کی جانب سے سویلین آئین کے مطالبے کو سراہتے ہوئے کہا کہ یہ جدوجہد صرف حکومت کی نہیں بلکہ عوام کی بھی ہے اور ان شاء اللہ اس مقصد میں کامیابی حاصل کی جائے گی۔
صدر ایردوان نے کہا کہ اس وقت پارٹی کی اعلیٰ قیادت مرکزی مجلسِ عاملہ کے اجلاس میں موجود ہے اور تمام قائدین بلدیہ کی چئیر پرسن زینب گونیش آق گیون کے لیے نیک تمناؤں، دعاؤں اور بھرپور حمایت کا پیغام دے رہے ہیں۔ انہوں نے کہا کہ میحال غازی اس جدوجہد میں ایک علامتی کردار ادا کرے گا اور یہ کامیابی مشترکہ ہوگی۔
آق پارٹی کے نائب چیئرمین فاروق آجار نے اس موقع پر ہونے والی گفتگو کی ویڈیو سوشل میڈیا پر شیئر کرتے ہوئے کہا کہ بلدیہ کی چئیر پرسن زینب گونیش آق گیون کا شائستہ لب و لہجہ، خلوص اور اصولی موقف اس بات کا ثبوت ہے کہ ایسی قیادت اور ایسے رہنما موجود ہوں تو ترکیہ مضبوط اور باوقار انداز میں آگے بڑھتا رہے گا۔
واقعے کا پس منظر
واضح رہے کہ ایسکی شہر میں آق پارٹی سے تعلق رکھنے والی میحال غازی کی بلدیہ کی چئیر پرسن زینب گونیش آق گیون اِی پارٹی (گڈ پارٹی )کے رکن محمد امین قورقماز نے اُن کے لباس کی بنیاد پر سوشل میڈیا پر توہین آمیز اور تضحیک آمیز الفاظ کے ذریعے نشانہ بنایا تھا، جس پر ملک بھر میں شدید عوامی ردِعمل سامنے آیا۔
بعد ازاں ملزم نے اپنے سوشل میڈیا اکاؤنٹس بند کر دیے، تاہم پولیس نے کارروائی کرتے ہوئے انہیں حراست میں لے لیا۔ عدالت نے انہیں ‘عوام کو نفرت اور دشمنی پر اکسانے’ کے الزام میں گرفتار کر کے جیل بھیج دیا۔
یہ واقعہ ترکیہ میں خواتین سیاست دانوں کے احترام، سیاسی اخلاقیات اور جمہوری اقدار کے حوالے سے ایک اہم موڑ کے طور پر دیکھا جا رہا ہے، جہاں صدر ایردوان کی جانب سے بروقت اور واضح حمایت نے قومی سطح پر ایک مضبوط پیغام دیا ہے۔
‘ایسکی شہر / میحال غازی کی بلدیہ کی چیئرپرسن کو دیکھیے! 😁😁
کیا اس سیاسی اسلام پسند شلوار پوش عورت کی ذمہ داری ضلع کا انتظام چلانا ہے،
یا اپنے باڑے میں گائے کا دودھ دوہنا؟
غالباً یہ خاتون اپنی جگہ سے بھٹک گئی ہیں، ویسے بھی آق پارٹی کو ایسی ہی چیزیں زیب دیتی ہیں۔
کیا دن آ گئے ہیں، واقعی! دوست تو حقیقت میں کٹر بنیاد پرست نکلے!
دنیا کوؤں کے حوالے ہو چکی ہے؛
اور بلدیہ نہ جانے کن لوگوں کے ہاتھوں میں چلی گئی ہے!
خدا کی قسم، میری ماں اس سے بہتر انتظام چلا لیتی ہے؛
کم از کم اس کا لباس بہتر ہے ، رکھ رکھاؤ ہے اور اس نے تعلیم بھی حاصل کررکھی ہے