وزیر خارجہ حقان فیدان نے اپنے دورۂ آسٹریا کے دوران آسٹریا کی وفاقی وزیر برائے یورپی و بین الاقوامی امور Beate Meinl-Reisinger سے ملاقات کی، جس کے بعد مشترکہ پریس کانفرنس سے خطاب کرتے ہوئے انہوں نے خطے کی تازہ صورتحال، جاری سفارتی کوششوں اور یورپ کے ساتھ تعلقات پر تفصیلی اظہارِ خیال کیا۔
ترک وزیرِ خارجہ حقان فیدان نے اپنے دورۂ آسٹریا کے دوران آسٹریا کی وفاقی وزیر برائے یورپی و بین الاقوامی امور Beate Meinl-Reisinger سے ملاقات کرنے کے بعد پریس کانفرنس سے خطاب کرتے ہوئے کہا کہ امریکہ اور ایراان کے درمیان مذاکرات ایک نازک مرحلے میں داخل ہو چکے ہیں اور ترکیہ اس عمل کی بھرپور حمایت کر رہا ہے۔ ان کے بقول سب سے اہم ترجیح جنگ بندی کا تسلسل ہے تاکہ خطہ دوبارہ تصادم کی طرف نہ لوٹے۔ انہوں نے واضح کیا کہ ابتدائی طور پر 15 روزہ جنگ بندی کا اعلان ایک مثبت پیش رفت تھی، تاہم پیچیدہ معاملات کی کثرت کے باعث اس محدود مدت میں حتمی معاہدہ ممکن نہیں، اس لیے مزید توسیع ناگزیر ہو سکتی ہے۔
انہوں نے اس بات پر زور دیا کہ آئندہ چند روز نہایت فیصلہ کن ہیں، کیونکہ فریقین اس وقت حساس نکات کو حتمی شکل دینے میں مصروف ہیں۔ ان کا کہنا تھا کہ مستقل امن کے قیام کے لیے دونوں جانب سے سنجیدہ نیت اور عملی اقدامات ضروری ہیں، بالخصوص آبنائے ہرمز کو دوبارہ کھولنے کی کوششیں غیر معمولی اہمیت رکھتی ہیں۔ انہوں نے اس ضمن میں پاکستان کے کردار کو سراہتے ہوئے کہا کہ انہیں پاکستانی ثالثوں کی صلاحیت پر مکمل اعتماد ہے اور ترکیہ اس عمل میں اپنا تعاون جاری رکھے گا۔
یورپی یونین سے متعلق سوال کے جواب میں Hakan Fidan نے کہا کہ ترکیہ نے کبھی بھی بغیر شرائط پوری کیے رکنیت حاصل کرنے کی خواہش ظاہر نہیں کی، تاہم اصل مسئلہ یہ ہے کہ یورپی یونین کے اندر ترکیہ کی ممکنہ رکنیت کے حوالے سے مطلوبہ سیاسی عزم موجود نہیں۔ ان کے مطابق اگرچہ یورپی ممالک کے ساتھ دوطرفہ سطح پر تعلقات عمومی طور پر مثبت اور مضبوط ہیں، لیکن جب معاملہ یورپی یونین کے ادارہ جاتی ڈھانچے تک پہنچتا ہے تو صورت حال پیچیدہ ہو جاتی ہے۔
انہوں نے مزید بتایا کہ ترکیہ یورپ کے ساتھ تعلقات کو ہر شعبے میں فروغ دینے کے لیے کوشاں ہے۔ حال ہی میں برطانیہ کے ساتھ اسٹریٹجک شراکت داری کے فریم ورک معاہدے پر دستخط اسی سلسلے کی ایک کڑی ہے، جس کا مقصد تعلقات کو مزید مستحکم اور منظم بنانا ہے۔