استنبول: ترقی پذیر آٹھ اسلامی ممالک کی تنظیم ڈی-8 (Developing-8 Organization for Economic Cooperation) اور اسلامی تعاون تنظیم (او آئی سی) سے وابستہ اسلامک کوآپریشن یوتھ فورم (ICYF) نے نوجوانوں کو بااختیار بنانے، ان کی قیادت کو فروغ دینے، پیشہ ورانہ مہارتوں میں اضافہ کرنے اور نوجوان کاروباری افراد کے لیے نئے مواقع پیدا کرنے کی غرض سے اپنے باہمی تعاون کو مزید مضبوط بنانے پر اتفاق کیا ہے۔
یہ فیصلہ استنبول میں واقع ڈی-8 سیکریٹریٹ میں ہونے والی اعلیٰ سطحی ملاقات کے دوران کیا گیا، جس میں ڈی-8 کے سیکریٹری جنرل سفیر سہیل محمود اور آئی سی وائی ایف کے صدر طٰہٰ آیحان نے نوجوانوں سے متعلق مشترکہ حکمتِ عملی اور مستقبل کے تعاون کے مختلف پہلوؤں پر تفصیلی تبادلۂ خیال کیا۔ اجلاس میں ڈی-8 سیکریٹریٹ کے ڈائریکٹر سفیر مصطفیٰ اوزجان اور آئی سی وائی ایف کے ڈائریکٹر جنرل یونس سونمیز بھی اپنے اپنے وفود کے ہمراہ شریک تھے۔
سیکریٹری جنرل سفیر سہیل محمود نے آئی سی وائی ایف کے صدر کا خیرمقدم کرتے ہوئے او آئی سی کے پلیٹ فارم پر نوجوانوں کے لیے ان کی متحرک قیادت اور خدمات کو سراہا۔ انہوں نے کہا کہ ڈی-8 اور آئی سی وائی ایف کا مشترکہ وژن مسلم دنیا کے نوجوانوں کو تعلیم، جدید مہارتوں، اختراع، کاروباری مواقع اور مؤثر قیادت کے ذریعے بااختیار بنانا ہے، تاکہ وہ اپنے ممالک کی معاشی اور سماجی ترقی میں فعال کردار ادا کر سکیں۔
انہوں نے اس امر پر بھی زور دیا کہ دونوں اداروں کے درمیان 2025ء میں طے پانے والی مفاہمتی یادداشت (MoU) کو عملی شکل دینا وقت کی اہم ضرورت ہے، کیونکہ اس کے ذریعے نوجوانوں کے لیے مشترکہ منصوبوں اور ترقیاتی پروگراموں کے نئے دروازے کھلیں گے۔
سفیر سہیل محمود نے ڈی-8 کی یوتھ پالیسی میں ہونے والی اہم پیش رفت کا جائزہ پیش کرتے ہوئے بتایا کہ بنگلہ دیش کی میزبانی میں 2021ء میں پہلا ڈی-8 یوتھ سمٹ ورچوئل طور پر منعقد ہوا، جس کے بعد 2024ء میں ڈھاکہ میں نوجوانوں کے وزرا کا پہلا اجلاس اور 2025ء میں آذربائیجان کے دارالحکومت باکو میں پہلا ڈی-8 یوتھ ڈائیلاگ کامیابی سے منعقد کیا گیا۔ ان سرگرمیوں نے رکن ممالک کے نوجوانوں کے درمیان تعاون، تجربات کے تبادلے اور مشترکہ وژن کو فروغ دینے میں اہم کردار ادا کیا۔
اس موقع پر ڈی-8 سیکریٹریٹ کے ڈائریکٹر سفیر مصطفیٰ اوزجان نے “باکو یوتھ ڈیکلریشن“ کے نمایاں نکات پیش کیے، جس میں نوجوانوں کو اقتصادی ترقی، ڈیجیٹل اختراع، پائیدار ترقی، فیصلہ سازی اور علاقائی تعاون کے عمل میں زیادہ فعال کردار دینے پر زور دیا گیا ہے۔
آئی سی وائی ایف کے صدر طٰہٰ آیحان نے کہا کہ ان کا ادارہ او آئی سی کے رکن ممالک میں نوجوانوں کی قیادت، تعلیم، مہارتوں کے فروغ، اختراع اور سماجی و اقتصادی شمولیت کے لیے مختلف پروگراموں پر کامیابی سے عمل پیرا ہے۔ انہوں نے کہا کہ ڈی-8 کے اقتصادی تعاون اور پائیدار ترقی کے اہداف آئی سی وائی ایف کے وژن سے مکمل ہم آہنگ ہیں، اسی لیے دونوں ادارے مشترکہ اقدامات کے ذریعے نوجوان نسل کے لیے مزید مؤثر مواقع پیدا کر سکتے ہیں۔
انہوں نے یقین دلایا کہ آئی سی وائی ایف مشترکہ مقاصد کے حصول کے لیے ہر ممکن تعاون کرے گا اور ایسے تمام منصوبوں میں بھرپور کردار ادا کرے گا جو نوجوانوں کی صلاحیتوں کو نکھارنے اور انہیں عالمی سطح پر باوقار مقام دلانے میں معاون ثابت ہوں۔
اجلاس میں اس بات پر اتفاق کیا گیا کہ آئندہ تعاون کا محور نوجوان قیادت، استعداد کار میں اضافہ، جدید مہارتوں کی تربیت، کاروباری صلاحیتوں کے فروغ اور اختراعی سوچ کو پروان چڑھانے پر ہوگا۔ اس مقصد کے لیے مشترکہ تربیتی پروگرام، ورکشاپس، سیمینارز، علمی تبادلوں اور دیگر عملی اقدامات کو فروغ دیا جائے گا۔
دونوں اداروں نے 2025ء کی مفاہمتی یادداشت کے تحت مجوزہ “انویسٹمنٹ اینڈ یوتھ انٹرپرینیورشپ فورم“ کو جلد فعال بنانے پر بھی اتفاق کیا، تاکہ نوجوان سرمایہ کاروں، اسٹارٹ اپس اور ابھرتے ہوئے کاروباری افراد کو ایک ایسا مشترکہ پلیٹ فارم فراہم کیا جا سکے جہاں وہ سرمایہ کاری، جدت اور علاقائی تعاون کے نئے امکانات سے فائدہ اٹھا سکیں۔
فریقین نے یہ بھی طے کیا کہ مختلف بین الاقوامی کانفرنسوں، اقتصادی فورمز اور علاقائی اجتماعات کے موقع پر مشترکہ تقریبات، مکالموں اور نوجوانوں پر مرکوز سرگرمیوں کا انعقاد کیا جائے گا، تاکہ ڈی-8 اور او آئی سی کے رکن ممالک کے نوجوانوں کے درمیان روابط مزید مستحکم ہوں۔
اس سلسلے کی پہلی مشترکہ سرگرمی کے طور پر آئی سی وائی ایف، ڈی-8 سیکریٹریٹ کے اشتراک سے “ڈی-8 یوتھ برجز پروگرام“ میں شریک ہوگا، جس کا انعقاد 12 اگست 2026ء کو عالمی یومِ نوجوانان کے موقع پر کیا جائے گا۔ اس پروگرام کا مقصد مختلف رکن ممالک کے نوجوانوں کے درمیان باہمی روابط کو فروغ دینا، ثقافتی ہم آہنگی کو مضبوط بنانا اور انہیں مستقبل کی مشترکہ اقتصادی و سماجی ترقی میں مؤثر کردار ادا کرنے کے لیے ایک دوسرے کے قریب لانا ہے۔
ملاقات کے اختتام پر دونوں اداروں نے اپنے مضبوط اور دیرینہ ادارہ جاتی تعلقات پر اطمینان کا اظہار کرتے ہوئے اس عزم کا اعادہ کیا کہ نوجوانوں کی تعلیم، قیادت، اختراع، کاروباری سرگرمیوں اور پائیدار ترقی کے شعبوں میں باہمی تعاون کو مزید وسعت دی جائے گی، تاکہ مسلم دنیا کی نوجوان نسل مستقبل کی اقتصادی ترقی، سماجی استحکام اور علاقائی خوشحالی میں ایک مؤثر اور فیصلہ کن قوت کے طور پر اپنا کردار ادا کر سکے۔