ترکیہ کے وزیرِ انصاف گور لیک نے کہا ہے کہ غزہ کے لیے انسانی امداد لے کر جانے والے عالمی صمود فلوٹیلا کے کارکنوں پر بین الاقوامی پانیوں میں کیے گئے حملے کے معاملے میں عدالتی کارروائی پوری شدت اور عزم کے ساتھ جاری ہے۔
وزیرِ انصاف کے مطابق استنبول کی 11ویں ہائی کریمنل کورٹ میں زیرِ سماعت مقدمہ نمبر 2026/108 میں مجموعی طور پر 35 ملزمان کے خلاف کارروائی کی جا رہی ہے، جن میں اسرائیلی وزیرِ اعظم بنیامین نیتن یاہو اور افک موسکووچ بھی شامل ہیں۔
انہوں نے بتایا کہ مقدمے کے سلسلے میں بنیامین نیتن یاہو اور افک موسکووچ کے خلاف نسل کشی کے الزام میں 14 جولائی 2026 کو گرفتاری کے وارنٹ جاری کیے گئے تھے۔ ان احکامات کی بنیاد پر ترکیہ کی وزارتِ انصاف نے دونوں ملزمان کو بین الاقوامی سطح پر مطلوب قرار دینے اور ان کے خلاف ریڈ نوٹس جاری کرانے کے لیے وزارتِ داخلہ سے باضابطہ درخواست کی ہے، جبکہ متعلقہ دستاویزات وزارتِ خارجہ کو بھی ارسال کردی گئی ہیں۔
ترکیہ کے وزیرِ انصاف نے کہا کہ بنیامین نیتن یاہو اور افک موسکووچ کو غزہ کے لیے انسانی امداد لے جانے والے شہریوں کے خلاف بین الاقوامی پانیوں میں مسلح کارروائی اور امدادی کارکنوں کو حراست میں لینے سے متعلق واقعات کے تناظر میں متعدد سنگین الزامات کا سامنا ہے۔ ان میں انسانیت کے خلاف جرائم، نسل کشی، کسی شخص کو سنگین نوعیت کے حالات میں اس کی آزادی سے محروم کرنا، دانستہ جسمانی نقصان پہنچانا، اذیت رسانی، املاک کو نقصان پہنچانا، سنگین نوعیت کی لوٹ مار اور ذرائعِ نقل و حمل کو اغوا کرنا شامل ہیں۔
انہوں نے مزید کہا کہ غزہ میں نسل کشی کی پالیسی اختیار کرنے والی نیتن یاہو حکومت کو اس تصور کی بنیاد پر تحفظ حاصل نہیں دیا جا سکتا کہ وہ قانون سے بالاتر ہے اور اس سے کسی قسم کا احتساب نہیں کیا جا سکتا۔ ترکیہ ایسے کسی رویے کو ہرگز تسلیم نہیں کرتا۔
وزیرِ انصاف کا کہنا تھا کہ غزہ میں ہونے والے جرائم پر پردہ ڈالنے یا ان کے ذمہ داروں کو مکمل استثنیٰ اور عدمِ احتساب کی ڈھال فراہم کرنے کی اجازت نہیں دی جائے گی۔ ترکیہ قومی اور بین الاقوامی قانون کے تحت دستیاب تمام قانونی ذرائع کو پوری ثابت قدمی کے ساتھ استعمال کرے گا۔
انہوں نے کہا کہ صدر رجب طیب اردوان کی قیادت میں ترکیہ فلسطینی عوام، مظلوموں اور عالمی انسانی ضمیر کے ساتھ مضبوطی سے کھڑا رہے گا اور انسانیت کے خلاف جرائم کے مرتکب افراد کو قانون کے کٹہرے میں لانے کے لیے تمام ضروری اقدامات پوری عزم کے ساتھ جاری رکھے گا۔